ចិន ប្តេជ្ញាឆ្លើយតបម៉ឺងម៉ាត់ ចំពោះជំនួបកម្រិតខ្ពស់ រវាងអាមេរិក ជាមួយមេដឹកនាំតៃវ៉ាន់

ក្រសួងការបរទេសចិននៅថ្ងៃព្រហស្បតិ៍ទី០៦ខែមេសា បានថ្កោលទោសជំនួបរវាងប្រធានសភាសហរដ្ឋអាមេរិកលោក Kevin McCarthy និងប្រធានាធិបតីតៃវ៉ាន់លោកស្រី Tsai Ing-wen នៅរដ្ឋកាលីហ្វ័រញ៉ា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Tsai បានជួបជាមួយគណៈប្រតិភូអាមេរិកមកពីគណបក្សសាធារណរដ្ឋ និងប្រជាធិបតេយ្យ អំឡុងពេលឈប់សម្រាកនៅសហរដ្ឋអាមេរិកកាលពីថ្ងៃពុធ បន្ទាប់ពីទៅបំពេញទស្សនកិច្ចនៅប្រទេស ក្វាតេម៉ាឡា និង បេលី ដែលជាសម្ព័ន្ធមិត្តរបស់ទីក្រុងតៃប៉ិ។

យ៉ាងណា​ ក្នុងសេចក្តីថ្លែងការណ៍មួយដែលចេញផ្សាយដោយ Xinhua​ ក្រសួងការបរទេសចិនបាននិយាយថា “ដើម្បីឆ្លើយតបទៅនឹងទង្វើខុសឆ្គងយ៉ាងធ្ងន់ធ្ងរនៃការឃុបឃិតគ្នារវាងសហរដ្ឋអាមេរិកនិងតៃវ៉ាន់ ប្រទេសចិននឹងចាត់វិធានការយ៉ាងម៉ឺងម៉ាត់ និងមានប្រសិទ្ធភាពដើម្បីការពារអធិបតេយ្យជាតិ និងបូរណភាពទឹកដី”។

ក្រសួងបន្តថា ជំនួបកាលពីថ្ងៃពុធ គឺជាការរំលោភយ៉ាងធ្ងន់ធ្ងរលើគោលការណ៍ចិនតែមួយ។ កោះតៃវ៉ាន់គឺជាផលប្រយោជន៍ស្នូលរបស់ចិន និងជាបន្ទាត់ក្រហមទី១ ដែលមិនត្រូវឆ្លងកាត់ឡើយក្នុងទំនាក់ទំនងចិន-អាមេរិក។

លើសពីនេះ ក្រសួងបានគូសបញ្ជាក់ថា “យើងសូមប្រឆាំងយ៉ាងម៉ឺងម៉ាត់ចំពោះគ្រប់ទម្រង់នៃអន្តរកម្មផ្លូវការរវាងសហរដ្ឋអាមេរិកនិងតៃវ៉ាន់ និងរាល់ដំណើរទស្សនកិច្ចរបស់មេដឹកនាំអាជ្ញាធរតៃវ៉ាន់ទៅកាន់សហរដ្ឋអាមេរិកក្នុងនាមណាមួយ ឬក្រោមលេសអ្វីក៏ដោយ”។

គួរបញ្ជាក់ជាថ្មី ទីក្រុងប៉េកាំងបានអះអាងថាកោះតៃវ៉ាន់គឺជាទឹកដីរបស់ខ្លួន ហើយជំទាស់ចំពោះទំនាក់ទំនងផ្លូវការណាមួយរវាងទីក្រុងតៃប៉ិមានជាមួយប្រទេសដទៃ។ មិនតែប៉ុណ្ណឹង ចិន​បាន​ប្ដេជ្ញា​ ​រឹបអូសយកតៃវ៉ាន់​ដោយប្រើកម្លាំង​នៅ​ថ្ងៃ​ណា​មួយ​ទៀតផង៕

ប្រែសម្រួល៖ Vann Vann

ប្រភព៖ CNA

ចុចអាន៖ សេតវិមានប្រាប់ ចិន កុំយកលេសការឈប់សម្រាករបស់លោកស្រី Tsai លើទឹកដី អាមេរិក ដើម្បីលុកលុយ តៃវ៉ាន់