ក្រុមហ៊ុន Mattel ណែនាំតុក្កតា Barbie ដែលមានជំងឺ Down syndrome ជាលើកដំបូង

កាលពីថ្ងៃអង្គារ ទី ២៥ ខែមេសា ក្រុមហ៊ុនផលិតប្រដាប់ក្មេងលេង Mattel ប្រកាសពីការចេញលក់តុក្កតា Barbies ដែលមានជំងឺ Down syndrome បន្ទាប់ពីសហការជាមួយអង្គការសង្គមជាតិ Down syndrome នៅសហរដ្ឋអាមេរិកបានសម្រេច ។

ក្រុមហ៊ុនផលិតប្រដាប់ក្មេងលេង Mattel និយាយថាតុក្កតាចេញថ្មីមានមុខមូល ភ្នែកដូចគ្រាប់អាល់មុន ត្រចៀកតូច និងច្រមុះកំប៉ិត សូម្បីបាតដៃក៏មានខ្សែបន្ទាត់មួយឆ្នូតទាក់ទងនឹងជំងឺ Down syndrome ដែរ ។ ចំណែកសំលៀកបំពាក់វិញគឺជារ៉ូបប៉ោងស្មារូបមេអំបៅនិងផ្កាពណ៌លឿង និងពណ៌ខៀវដែលជាប្រភេទពណ៌ទាក់ទងនឹងការយល់ដឹងពីជំងឺ Down syndrome ដូចគ្នា ។

ក្រុមហ៊ុន Mattel ពណ៌នាពីគ្រឿងអលង្ការ Barbie ថា “នាងពាក់ខ្សែកពណ៌ផ្កាឈូក បន្តោងសញ្ញាព្រួញបាញ់ទៅខាងលើ ៣ តំណាងឲ្យច្បាប់ចម្លងនៃក្រូម៉ូសូមទី ២១ ជាមួយនិងប្រដាប់ដាក់ជើងពណ៌ផ្កាឈូកមួយគូទៀត” ។

ជាចុងក្រោយ Lisa McKnight អនុប្រធានប្រតិបត្តិ និងជាប្រធានសកលនៃ Mattel មានប្រសាសន៍ថា “គោលដៅរបស់យើងគឺចង់ឱ្យកុមារទាំងអស់មើលឃើញខ្លួនឯងនៅក្នុងតុក្កតា Barbie ដ៏ស្រស់ស្អាត និងលើកទឹកចិត្តក្មេងៗឲ្យលេងជាមួយតុក្កតាដែលខុសពីពួកគេ” ៕

ប្រែសម្រួល ៖ វារី

ចុចអាន ៖ សម្រស់តុក្កតាព្រះនាង ​Disney​ ជាទម្រង់មុខមនុស្ស ពិតជាស្រស់ស្អាតខ្លាំងណាស់