អ្នកធ្លាប់ស្រលាញ់ Labubu សម្រុកប្រមូល​ ដុតចោល ព្រោះជឿថា ជាតុក្កតាបិសាច

បន្ទាប់ពីផ្ទុះនូវពាក្យចចាមអារ៉ាមថា តុក្កតាសិល្បៈចិនដ៏ល្បីល្បាញ Labubu ត្រូវបានបិសាចកាន់កាប់និងចូលស្នងរូបនោះ បាមនាំឲ្យរីករាលដាលតាមប្រព័ន្ធអ៊ីនធឺណែត រហូតអ្នកគាំទ្រមួយចំនួនបានសម្រុកប្រមូលតុក្កតារបស់ពួកគេ មកដុតបំផ្លាញចោលថែមទៀតផង។

Labubu គឺជាស៊េរីតុក្កតាដ៏គួរឲ្យស្រលាញ់ ដែលផលិតដោយក្រុមហ៊ុនចិន Pop Mart និងរចនាដោយវិចិត្រករហុងកុងលោក Kasing Lung ។ តួអង្គនេះត្រូវបានសម្គាល់ដោយធ្មេញស្រួចៗប្រាំបួនរបស់វា ដែលផ្តល់ឲ្យវានូវរូបរាងអាក្រក់ផង គួរឲ្យស្រលាញ់ផង។ ប៉ុន្តែ​រូបរាង​ដ៏​ពិសេស​នេះ​ បាន​ក្លាយ​ជា​ភ្លើង​បញ្ឆេះ​កំហឹងពីមនុស្សជាច្រើនទៅវិញ។

អ្នកប្រើប្រាស់ប្រព័ន្ធផ្សព្វផ្សាយសង្គមដែលមិនមែនជាជនជាតិចិនបាននិយាយថា ឈ្មោះ Labubu ត្រូវបានភ្ជាប់ជាមួយ Pazuzu ដែលជាបិសាចនៅក្នុងរឿងព្រេងនិទាន Mesopotamian (រាប់​ពាន់​ឆ្នាំ​មុន) ដែល​មាន​មុខ​តោ ឬ​ឆ្កែ ហើយ​មាន​ភ្នែក​ប៉ោង។ រូបថ្លុកដ៏ពេញនិយមដែលពណ៌នាអំពីបិសាចញញឹម ធ្មេញមុតស្រួចដែលមើលទៅស្រដៀងនឹង Labubu បេះដាក់។

បុគ្គលមួយចំនួនបានព្រមានអំពីហានិភ័យដែលអាចកើតមាននៃការកាន់កាប់ដោយបិសាច ប្រសិនបើពួកគេរក្សាតុក្កតា Labubu របស់ពួកគេ។ ជនបរទេសជាច្រើនថែមទាំងដុតតុក្កតារបស់ពួកគេ ហើយចែករំលែកវីដេអូនេះតាមអ៊ីនធឺណិតយ៉ាងគគ្រឹកគគ្រេង។

ទោះ​បី​ជា​យ៉ាង​ណា​ក៏​ដោយ លោក Kasing Lung ជា​វិចិត្រករ​ដែល​បាន​បង្កើត Labubu លោក​ធ្លាប់​បាន​ផ្តល់​បទសម្ភាសន៍​មួយ​ថា ប្រដាប់​ក្មេង​លេង​សិល្បៈ​នេះ​ត្រូវ​បាន​បំផុស​គំនិត​ដោយ​រឿងព្រេង​និទាន​អេលហ្វ​អឺរ៉ុប​បុរាណ។ គាត់បានណែនាំ Labubu គឺផ្នែកមួយនៃគ្រួសារ The Monsters ដែលរួមបញ្ចូលតួអង្គដូចជា Tycoco និង Zimomo ជាំពិសេស វាមានចរិតល្អ ថ្វីបើមានរូបរាងអាក្រក់ក៏ដោយ។

Labooboo បានក្លាយជាការពេញនិយមទូទាំងពិភពលោកបន្ទាប់ពីសិល្បករលំដាប់ពិភពលោកមួយចំនួនដូចជា Rihanna និង Lisa (BLACKPINK) បានបង្ហោះរូបថត Labooboo នៅលើប្រព័ន្ធផ្សព្វផ្សាយសង្គម។ ប្រដាប់​ក្មេង​លេង​សិល្បៈ​នេះ​មាន​ការ​ពេញ​និយម​ខ្លាំង​ណាស់​ដែល​វា​ច្រើន​តែ​លក់​ដាច់។ តម្លៃជាមធ្យមនៃប្រអប់អាថ៌កំបាំង Labooboo គឺ ៩៩ យន់ ប៉ុន្តែវត្ថុសម្ងាត់ (កម្រ) អាចលក់បានជាង ២,០០០ យន់ ។

ជាងនេះទៅទៀត Pop Mart បានរាយការណ៍ថាប្រាក់ចំណូលសកលនៅក្នុងឆមាសទីមួយនៃឆ្នាំ ២០២៥បានកើនឡើងច្រើនជាង ២០០% បើប្រៀបធៀបទៅនឹងឆ្នាំមុន។ ប្រាក់ចំណូលសរុបមានចំនួន ១៣.៧ ពាន់លានយន់ភាគច្រើនដោយសារតែការកើនឡើងនៃប្រជាប្រិយភាពរបស់ Labubu ។

យាងណាមិញ ពាក្យចចាមអារ៉ាមថា Labubu ត្រូវបានគ្រប់គ្រងដោយបិសាច ក៏ត្រូវបានពិភាក្សានៅលើប្រព័ន្ធផ្សព្វផ្សាយសង្គមចិនផងដែរ។ ដូចដែលអ្នកលេងអ៊ីនធឺណិតចិនជាច្រើនបាននិយាយថា ពួកគេតែងតែគិតថាតុក្កតានេះគឺឲ្យខ្លាច និងមិនចូលចិត្ត​រូបរាង​របស់​វាតាំងពីដំបូងមកម៉្លេះ ប៉ុន្តែ​ពួកគេ​បាន​ឮ​ថា​ការ​ទិញ Labubu នឹង​ធ្វើ​ឲ្យ​អ្នក​មាន ហើយមាន​សំណាង​ព្រោះ​តម្លៃ​ឡើង​ថ្លៃ៕

អត្ថបទ៖ សាង ស្រីល័ក្ខ

ចុចអាន៖បុគ្គលិកមហោស្រពភាពយន្ត Busan ជាប់គុកពីបទលួចថតមិត្តរួមការងារពេលរួមភេទ