សម្ដេចតេជោ ៖ មន្ទីរពេទ្យដែលមានសមត្ថភាព ក៏ជួយបង្កើតជំនឿទុកចិត្តពីអ្នកការទូត វិនិយោគិន និងអ្នកទេសចរ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា លើកឡើងថា ការកសាងមន្ទីរពេទ្យដែលសមត្ថភាព មិនមែនគ្រាន់តែបង្កើតជំនឿទុកចិត្ត សម្រាប់តែប្រជាពលរដ្ឋខ្មែរនោះទេ តែក៏ជួយបង្កើតនូវជំនឿទុកចិត្តពីអ្នកការទូត វិនិយោគិន និងអ្នកទេសចរ។

ការលើកឡើងរបស់សម្ដេចតេជោ ហ៊ុន សែន ធ្វើឡើងក្នុងពិធីសម្ពោធដាក់ឲ្យប្រើប្រាស់ជាផ្លូវការ អគារមជ្ឈមណ្ឌលពហុឯកទេស «អគារតេជោអភិវឌ្ឍន៍» នៅមន្ទីរពេទ្យកាល់ម៉ែត នៅព្រឹកថ្ងៃទី ២៣ ខែឧសភា ឆ្នាំ ២០២៣។

សម្ដេចតេជោ ហ៊ុន សែន បានថ្លែងថា ការកសាងបានមន្ទីរពេទ្យដែលល្អ វាមិនមែនគ្រាន់តែបង្កើតជំនឿទុកចិត្តសម្រាប់ប្រជាពលរដ្ឋកម្ពុជាប៉ុណ្ណោះទេ។ ប៉ុន្តែការកសាងមន្ទីរពេទ្យដែលសមត្ថភាពសង្រ្គោះ ពិនិត្យ ព្យាបាល វាក៏ជួយដល់កម្ពុជាក្នុងការបង្កើតជំជឿទុកចិត្តពីអ្នកការទូត វិនិយោគិន និងអ្នកទេសចរផងដែរ។

សម្ដេចតេជោ ហ៊ុន សែន បានថ្លែងបន្តថា «នោះហើយដែលយើងត្រូវខិតខំរួមគ្នា ធ្វើឲ្យវិស័យសុខាភិបាលរបស់យើងឆ្លើយតបបានទៅនឹងតម្រូវការ សម្រាប់ប្រជាពលរដ្ឋខ្លួនឯងផង និងសម្រាប់ទិដ្ឋភាពផ្សេងទៀត ដូចដែលខ្ញុំបាននិយាយអំបាញ់មិញ»។

សម្ដេចតេជោ ហ៊ុន សែន ទៀតថា ជនបរទេសក៏ត្រូវការមន្ទីរពេទ្យដែលសមត្ថភាព វិនិយោគិនក៏ត្រូវការ និងអ្នកទេសចរក៏ត្រូវការ៕