សត្វដំរីព្រៃបីក្បាលងាប់ជាបន្តបន្ទាប់ នៅក្បែឧទ្យានជាតិប្រទេសថៃ

ប្រទេសថៃ ៖ សត្វដំរីព្រៃចំនួន៣ក្បាល បានដេកងាប់បន្តបន្ទាប់គ្នាក្បែរមាត់ទឹក ដែលសមត្ថកិច្ចកំពុងស្រាវជ្រាវ ព្រោះអាចមានមនុស្សដាក់ពង្រាយលួសខ្សែភ្លើងដើម្បីឆក់។

បើតាមក្រុមមន្ត្រីជំនាញ ដែលគ្រប់គ្រងសួនឧទ្យានជាតិមួយកន្លែង ក្នុងខេត្តឈុនបុរី បាននិយាយថា ដំរី៣ក្បាលនេះ គឺគេបានឃើញនៅក្នុងសួននៅឡើយ កាលពីថ្ងៃទី១ ខែមិថុនា កន្លងទៅ លុះដល់ថ្ងៃ២ ក៏ស្រាប់តែឮដំណឹងថា ដេកងាប់ក្បែរមាត់ទឹកឧទ្យានជាតិទៅវិញ។ ដោយដំរីទី១ ឈ្មោល អាយុប្រហែល១០ឆ្នាំ ទី២ ជាសត្វដំរីញី អាយុប្រហែល៧ឆ្នាំ និងទី៣ ជាកូនដំរីញី អាយុប្រហែល៣ឆ្នាំ ។

 ក្រុមការងារកោសល្យវិច្ច័យ និងក្រុមគ្រូពេទ្យ បានដាក់ឧបករណ៍ចុះមកពិនិត្យផ្ទាល់ ដោយបានធ្វើការវះកាត់រក មើលក្រែងមានសារធាតុពុលនៅក្នុងក្រពះ ព្រោះជំហានដំបូងគេបានធ្វើការសន្និដ្ឋានលើ៣ចំណុច ទី១ អាចស៊ីចំណីប៉ះចំថ្នាំសម្លាប់សត្វល្អិត នៅតាមចម្ការ នៅក្បែរកន្លែងកើតហេតុ មានការដាំស្មៅជា​ច្រើរ៉ៃទុក​សម្រាប់ចិញ្ចឹមសត្វ, ទី២ ដំរីអាចងាប់ដោយសារឆក់ខ្សែភ្លើង ព្រោះនៅក្បែរនោះគេបានរកឃើញខ្សែលួស ដែលអាចតភ្ជាប់ជាមួយចរន្ត ដើម្បីឆក់សត្វព្រៃ, និងទី៣ អាចជួបគ្រោះធម្មជាតិដោយសាររន្ទះបាញ់។

 នៅទីបំផុត ការវះកាត់រកសារធាតុពុលនៅក្នុងក្រពះ គឺមិនមានទេ ដោយក្រុមមន្ត្រីជំនាញបានសន្និដ្ឋានថា ដំរីទាំង៣ក្បាលនេះ អាចងាប់ដោយសារឆក់ខ្សែភ្លើង ព្រោះលើប្រមោយមានស្នាមដាច់រលាត់យ៉ាងខ្លាំង ដោយមន្ត្រីឧទ្យានជាតិ បានសំណូមពរឱ្យសមត្ថកិច្ចធ្វើយ៉ាងណាតាមរកឃាតករឱ្យឃើញ ដើម្បីយកមកផ្តន្ទាទោស​តាមផ្លូវច្បាប់ ព្រោះការងាប់របស់សត្វដំរីនៅពេលនេះ គឺងាប់ដោយសារស្នាដៃមនុស្ស មិនមែនងាប់​ដោយធម្មជាតិនោះឡើយ ៕

អត្ថបទ ៖ សោ និយមរ័ត្ន