រោងចក្រផលិតស្បែកជើងមានសមត្ថភាពផលិតបាន៣លានគូ ក្នុងមួយឆ្នាំ បើកដំណើរការនៅខេត្តកំពង់ស្ពឺ

ក្រុមហ៊ុន អល វីន ស៊ូ (ខេមបូឌា) បោះទុនវិនិយោគជាង ៦.៤លានដុល្លារ បានបើកដំណើរការរោងចក្រផលិត​ស្បែកជើងសុវត្ថិភាព និងស្បែកជើងសម្រាប់រដូវរងាស្តង់ដារអន្តរជាតិ ដែលមានសមត្ថភាពផលិតបានប្រមាណ ៣លានគូ ក្នុងមួយឆ្នាំ នៅខេត្តកំពង់ស្ពឺ ថ្ងៃទី ១៩ មិថុនានេះ ។

លោក ហ៊ូ ឆាវហួយ អគ្គនាយកក្រុមហ៊ុន អល វីន ស៊ូ (ខេមបូឌា) បានលើកឡើងថា រោងចក្រនេះ ផលិតស្បែក​ជើងសុវត្ថិភាព និងស្បែកជើងសម្រាប់រដូវរងាស្តង់ដារអន្តរជាតិ បម្រើឱ្យការប្រើប្រាស់ក្នុងផ្ទះ ក្នុងឧស្សាហកម្ម ពាណិជ្ជកម្ម និងដើម្បីនាំចេញទៅលក់នៅទីផ្សារសហរដ្ឋអាមេរិក។

នាឱកាសនោះដែរ លោក អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា ការវិនិយោគរបស់ក្រុមហ៊ុននេះ ជាការវិនិយោគថ្មីមួយទៀត សម្រាប់ការផលិតនាំចេញស្បែកជើង ទាំងស្បែកជើង​សុវត្ថិភាព និងស្បែកជើងសម្រាប់រដូវរងាស្តង់ដារអន្តរជាតិ។ លោកបានបន្តទៀតថា នេះជាការបន្ថែមឱកាស​ការងារដល់កម្មករនិយោជិតក្នុងស្រុកជាច្រើនសន្ធឹកសន្ធាប់ បង្កើតប្រាក់ចំណូល និងលើកកម្ពស់ជីវភាព​រស់នៅទាំងកម្រិតបុគ្គល និងកម្រិតសហគមន៍ផងដែរ។

លោករដ្ឋមន្រ្តីក៏បានកោតសរសើរររដ្ឋបាលខេត្តកំពង់ស្ពឺ ដែលកន្លងមកបានយកចិត្តទុកដាក់ដល់កម្មករនិយោជិត និងនិយោជកនៅក្នុងខេត្ត ជាពិសេសការចូលរួមអនុវត្តនូវគោលនយោបាយរបស់រាជរដ្ឋាភិបាល​ក្នុងការជំរុញ​ទាក់ទាញវិនិយោគិនឱ្យចូលមកបណ្តាក់ទុនបង្កើតរោងចក្រ សហគ្រាស ដើម្បីបង្កើតការងារ និងមុខរបរជូន​ប្រជាពលរដ្ឋនៅតាមមូលដ្ឋាន។

លើសពីនេះទៀត លោកបានបញ្ជាក់ថា សមិទ្ធផលនេះ គឺជាជោគជ័យនៃគោលនយោបាយទាក់ទាញវិនិយោគ ការប្រែក្លាយតំបន់ដីចម្ការមីន ដីគ្មានប្រជាពលរដ្ឋរស់នៅ តំបន់អតីតសមរភូមិ តំបន់ជម្លោះព្រំដែន ទៅជាតំបន់សន្តិភាព សហប្រតិការ និងការអភិវឌ្ឍ ក្លាយទៅជាតំបន់ប្រជុំជន មានហេដ្ឋារចនាសម្ពន្ធផ្លូវ ថ្នល់ ស្ពាន មានផ្សារ សាលារៀន មន្ទីរពេទ្យ វត្តអារាម មានរោងចក្រពង្រាយរហូតដល់តាមបណ្តាខេត្ត ប្រជាពលរដ្ឋមានការងារធ្វើ មានមុខរបរចិញ្ចឹមជីវិត មានប្រាក់ចំណូល ក្រៅពីធ្វើស្រែធ្វើចម្ការ។

ជាមួយគ្នានេះ លោក វ៉ី សំណាង អភិបាលខេត្តកំពង់ស្ពឺ បានឱ្យដឹងនាពេលថ្មីៗនេះថា បច្ចុប្បន្នខេត្តកំពង់ស្ពឺ មានរោងចក្រ សហគ្រាសចំនួន ៣៨៥កន្លែង មានកម្មករជាង១៥ម៉ឺន ៥ពាន់នាក់ វិស័យកាត់ដេរមានចំនួន១៩១កន្លែង មានកម្មករសរុបជាង១៤ម៉ឺន៥ពាន់នាក់។ លោកបន្តទៀតថា ចំណូលជាមធ្យមរបស់ខេត្ត ៤០លានដុល្លារ ក្នុងមួយខែ និង ៤៨១លានដុល្លារក្នុងមួយឆ្នាំ៕

អត្ថបទ៖ ផល ធារិត