កីឡា

ពេជ្រ ប៊ុនសិទ្ធ ចែករំលែកប្រាក់ខ្លះពីការឈ្នះខ្សែក្រវាត់ដល់មិត្តរួមក្លិប

បានផុស

៣ years មុន

នៅ

ថ្ងៃពុធ ២៨ មិថុនា ២០២៣

ដោយ

អ្នកលេងគុនខ្មែរ ពេជ្រ ប៊ុនសិទ្ធ ដែលទើបតែឈ្នះខ្សែក្រវាត់ខារ៉ាបាវ និងទទួលបានប្រាក់រង្វាន់ ៦ ពាន់ដុល្លារអាមេរិក បានចែកថវិកាខ្លះដល់មិត្តរួមក្លិបដែលនេះវប្បធម៌នៃការចែករំលែក និងជាគំរូល្អ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពេជ្រ ប៊ុនសិទ្ធ ជាសិស្សនៅក្លិបចលនាយុវជនកម្ពុជា១៥៧គុនខ្មែរដែលមានលោក ពេជ្រ សុផាន់ ជាគ្រូបង្ហាត់។ កាលពីម្សិលមិញនេះ ម្ចាស់ខ្សែក្រវាត់ថ្មីថ្មោងបានចែកប្រាក់ផ្ទាល់ខ្លួនមួយចំនួនដល់មិត្តរួមក្លិបប្រហែលជា២០នាក់ដែលក្នុងម្នាក់ៗទទួលបានខ្ទង់៣ម៉ឺនរៀល។

ការចែករំលែកនេះក៏មិនខុសអីពីជើងខ្លាំង ពេជ្រ សម្បត្តិ ដែលបានចែកលុយដល់មិត្តរួមក្លិបដែរ បន្ទាប់ពីបានឈ្នះខ្សែក្រវាត់ខារ៉ាបាវកាលពីឆ្នាំ២០២២។

ថវិកាមួយចំណែកទៀត ពេជ្រ ប៊ុនសិទ្ធ បានផ្ញើទៅអ្នកម្ដាយដើម្បីទិញគោចិញ្ចឹមនៅស្រុកកំណើត។

ក្រោយពីចំណាយពេលជាច្រើនសប្ដាហ៍ក្នុងកម្មពិធី ប្រដាល់គុនខ្មែរ «ម្ចាស់ជើងឯកខ្សែក្រវាត់ខារ៉ាបាវ» ដំរីយោលដៃ ពេជ្រ ប៊ុនសិទ្ធ បានសម្រេចបំណងប្រាថ្នារបស់ខ្លួនជាលើកដំបូងក្នុងអាជីពប្រដាល់ក្នុងការក្លាយជាម្ចាស់ខ្សែក្រវាត់។

នេះជាជោគជ័យដ៏ធំរបស់លោកគ្រូ ពេជ្រ សុផាន់ ដែលមានកូនសិស្សឈ្នះខ្សែក្រវាត់២រដូវកាលជាប់គ្នា គឺក្របីព្រៃ ពេជ្រ សម្បត្តិ បានឈ្នះរដូវកាលទី៨ ឆ្នាំ២០២២ និង ពេជ្រ ប៊ុនសិទ្ធ បានឈ្នះរដូវកាលទី៩ ឆ្នាំ២០២៣។

ក្រោយពីបានឃើញសកម្មភាពនៃការចែករំលែកជាថវិកាខ្លះដល់មិត្តរួមក្លិប មហាជននិងអ្នកគាំទ្រ ពេជ្រ ប៊ុនសិទ្ធ បានកោតសរសើរដល់អ្នកលេងគុនខ្មែររូបនេះចំពោះទឹកចិត្តនៃការចែករំលែក៕