កីឡា

មកដឹងជើងខ្លាំងទាំង ៤រូបប្រចាំទម្ងន់ ៦០គីឡូក្រាមមានទីផ្សារប្រកួតច្រើនទាំងក្នុង និងក្រៅប្រទេស

បានផុស

៣ នាទី មុន

នៅ

ថ្ងៃសុក្រ ១០ កក្កដា ២០២៦

ដោយ

ទីផ្សារប្រកួតគុនខ្មែរទាំងនៅក្នុងស្រុក និងក្រៅប្រទេស មានការកើនឡើងជាបន្តបន្ទាប់ និងសំបូរកម្មវិធីទៀតផងនៅប៉ុន្មានឆ្នាំចុងក្រោយនេះពិសេសចាប់តាំងពីលោក ខូវ ឆាយ ដែលជាប្រធានសហព័ន្ធថ្មីចូលកាន់តំណែងដឹកនាំបន្តអំឡុងឆ្នាំ២០២៤ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ខូវ ឆាយ

ចំពោះប្រភេទទម្ងន់ដែលកក្រើកការគាំទ្រ និងកំពុងមានទីផ្សារប្រកួតខ្លាំងនោះភាគច្រើនគឺទម្ងន់ ៥៧ និង ៦០កីឡូក្រាមដែលបានឆក់យកបេះដូងអ្នកគាំទ្រពិសេសប្រភេទកីឡាករដែលដើរបុក វាយអស់ៗដោយមិនចាំស្ទាបស្ទង់ដៃគូច្រើន។ ថ្ងៃនេះកម្ពុជាថ្មីសូមបង្ហាញមុខកីឡាករទម្ងន់ ៦០គីឡូក្រាមដែលល្បីឈ្មោះ និងមានទីផ្សារប្រកួតក្នុងពេលបច្ចុប្ប ៖

ទី១ កីឡាករ ពេជ្រ សម្បត្តិ

អ្នកប្រដាល់មានដើមកំណើតពីខេត្តកំពង់ស្ពឺរូបនេះអាចចាត់ទុកថាជាកីឡាករឈរលេខ១ ហើយដែលសំបូរកម្មវិធីប្រកួតធំៗ និងអាចឡើងប្រកួតបានគ្រប់ស្ថានីយទូរទស្សន៍ និងគ្រប់កម្មវិធីតែម្ដង ពោលឲ្យតែចរចាតម្លៃខ្លួនត្រូវគ្នា។ កូនសិស្សគ្រូឆ្នើមរូបនេះឡើងប្រកួតម្ដងៗជក់ចិត្ត និងភាគច្រើនផ្ដួលដៃគូឲ្យបោះបង់ការប្រកួត និងមិនសូវធ្វើឲ្យគាំទ្រខកចិត្តនោះឡើយទើបរូបគេមានសន្ទុះទីផ្សារប្រកួតច្រើនមិនថាក្នុងស្រុក ឬនៅក្រៅប្រទេសនោះឡើយ។ សម្បត្តិ ធ្លាប់ចេញទៅប្រកួតកម្មវិធីធំៗនៅឯក្រៅប្រទេសច្រើនដងមកហើយដូចជាទៅអូស្ត្រាលី អាមេរិក បារាំង ចិន ជាដើម។ នៅថ្ងៃទី១៧ ខែកក្កដា ឆ្នាំ២០២៦ រូបគេនឹងធ្វើដំណើរទៅប្រទេសអូស្ត្រាលីជាលើកទី២ ដើម្បីប្រកួត។

កីឡាករ ពេជ្រ សម្បត្តិ

ទី២ កីឡាករ ឈុត សេរីវណ្ណថង

ជើងខ្លាំងមកពីខេត្តបាត់ដំបងរូបនេះក៏មានទីផ្សារប្រកួតមិនចាញ់ ពេជ្រ សម្បត្តិ នោះឡើយ។ បើទោះជាមានទីផ្សារប្រកួតច្រើនមែនតែកូនប្រុសលោក ឈុត សេរី រូបនេះមិនសូវប្រកួតញឹកញាប់ដូចកីឡាករដទៃនោះទេពិសេសបើមិនមានពេលវេលាសម្រាប់ហ្វឹកហាត់ ឬត្រៀមខ្លួមបានល្អគ្រប់គ្រាន់នោះ។ វណ្ណថង គេមើលឃើញថាជាកីឡាករវាយអស់ៗ និងមានស្នៀតប្រយុទ្ធច្រើន។ រូបគេក៏ទទួលបានការពេញចិត្តពីសំណាក់អ្នកចាប់គូ ឬម្ចាស់កម្មវិធីធំៗផងដែរដើម្បីយកទៅប្រកួត។ ថ្មីៗនេះអ្នកលេងគុនខ្មែររូបនេះទើបតែមកពីប្រកួតនៅឯប្រទេសបារាំងទៀតផង ខណៈការប្រកួតនៅក្រៅប្រទេសធ្លាប់ឆ្លងកាត់ច្រើនដងច្រើនសារមកហើយ។

កីឡាករ ឈុត សេរីវណ្ណថង

ទី៣ កីឡាករ បឺត សង្ឃឹម

កំពូលអ្នកលេងក្បាច់ត្រកូល «បឺត» រូបនេះក៏មានការគាំទ្រ និងមានទីផ្សារប្រកួតច្រើនដែរនៅតាមកម្មវិធីតូច-ធំ ទាំងក្នុងស្រុក និងក្រៅប្រទេស។ ការប្រកួតដោយប្រើបច្ចេកទេសខ្ពស់ និងសំបូរក្បាច់របស់ បឺត សង្ឃឹម ក៏បានទាក់ទាញអ្នកគាំទ្រផ្នែកវាយក្បាច់នេះច្រើនផងដែរពិសេសគឺម្ចាស់រៀបចំកម្មវិធីធំៗ។ បឺត សង្ឃឹម ប្រកួតក៏មិនសូវចាញ់ដូចកីឡាករទាំងពីរនាក់ខាងលើដែរ។ រូបគេតែងតែបត់បែនគ្រប់នាទី និងគ្រប់ទឹកនៃការប្រកួត ដែលពេលខ្លះផ្ដួលដៃគូឲ្យសន្លប់ និងពេលខ្លះយកឈ្នះត្រឹមពិន្ទុ។ រូបគេជាកីឡាករក្រសោបលុយធំ និងមានឱកាសច្រើនបានទៅប្រកួតលើឆាកអន្តរជាតិ។ កូនសិស្សលោក សេន ប៊ុនថេន រូបគេក៏មានឈ្មោះចេញទៅប្រកួតនៅឯប្រទេសអូស្ត្រាលីជាមួយសិស្សប្អូន ពេជ្រ សម្បត្តិ ផងដែរ។

កីឡាករ បឺត សង្ឃឹម

ទី៤ កីឡាករ ឃីម បូរ៉ា

អ្នកលេងក្បាច់គុនពីខេត្តបន្ទាយមានជ័យរូបនេះក៏មានទីផ្សារប្រកួតច្រើនដែរពិសេសនោះកម្មវិធីផ្សេងៗក្នុងប្រទេស។ ប្អូនប្រុសរបស់ ឃីម ឌីម៉ា រូបនេះចាត់ចូលជាកីឡាករជើងចាស់មួយរូបលើប្រភេទទម្ងន់ ៦០គីឡូក្រាមនេះហើយ។ ក្បាច់វាយមួយៗ និងការចេញច្បាស់ៗ ចិត្តសឿងមិនខ្លាចដៃគូរបស់ បូរ៉ា ក៏បានទាក់ទាញយកសន្ទុះគាំទ្រពីមហាជនបានច្រើនផងដែរពិសេសគឺម្ចាស់កម្មវិធី ឬតាមស្ថានីយទូរទស្សន៍ផ្សេងៗក្នុងស្រុក។ បូរ៉ា ក្រសោបបានកម្មវិធីប្រកួតច្រើនក្នុងស្រុក ប៉ុន្តែកម្មវិធីក្រៅស្រុកមិនសូវញឹកញាប់ដូចកីឡាករ ៣រូបខាងលើនោះឡើយ។ សប្ដាហ៍នេះរូបគេនឹងត្រូវប្រកួតមិត្តភាពអន្តរជាតិជូនអ្នកគាំទ្រនៅឯសង្វៀនបាយ័ន៕