កីឡា

វឿន វាសនា នឹងទៅលេងនៅតៃវ៉ាន់២ឆ្នាំទទួលតម្លៃខ្លួនជាង១០ម៉ឺនដុល្លារ

បានផុស

៣ years មុន

នៅ

ថ្ងៃពុធ ២០ កញ្ញា ២០២៣

ដោយ

កីឡាករបាល់ទះជម្រើសជាតិកម្ពុជាលេខ៩ វឿន វាសនា នឹងទៅប្រកបអាជីពនៅលីគបាល់ទះរបស់កោះតៃវ៉ាន់រយៈពេល២ឆ្នាំ បន្ទាប់ពីចប់ភារកិច្ចជាមួយក្រុមជម្រើសជាតិកម្ពុជាក្នុងព្រឹត្តិការណ៍កីឡាទ្វីបអាស៊ី លើកទី១៩ ឆ្នាំ២០២៣ នៅប្រទេសចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អាំង សេរីពិសិដ្ឋ អនុប្រធាន និងជាអគ្គលេខាធិការនៃសហព័ន្ធកីឡាបាល់ទះកម្ពុជាកាលពីម្សិលមិញបានបង្ហើបឲ្យដឹងក្នុង Live លើផេករបស់លោកថា បន្ទាប់ពីការប្រកួតក្នុងកីឡាអាស៊ី នៅប្រទេសចិនចប់ កីឡាករ វឿន វាសនា នឹងទៅលេងនៅលីគបាល់ទះរបស់កោះតៃវ៉ាន់ រយៈពេល២ឆ្នាំ។

លោកបានបង្ហើបឲ្យដឹងថា វឿន វាសនា នឹងទទួលបានប្រាក់ចំណូលប្រមាណជាង១០ម៉ឺនដុល្លារអាមេរិកសម្រាប់រយៈពេល២ឆ្នាំ។ លោកជឿជាក់ថា រូបគេជាកីឡាករកម្ពុជាដំបូងដែលទទួលបានតម្លៃខ្ពស់ជាងគេ។

ទោះបីជាយ៉ាងណា លោកអគ្គលេខាធិការសហព័ន្ធមិនបានបញ្ជាក់ពីឈ្មោះក្លិបនោះទេ ប៉ុន្តស្ថិតនៅក្នុងលីគបាល់ទះរបស់កោះតៃវ៉ាន់។

សមាជិករបស់ក្លិបវិសាខា វឿន វាសនា អាយុ២២ឆ្នាំ កម្ពស់១,៩១ម៉ែត្រ ជាតួដ៏សំខាន់ក្នុងក្រុមបាល់ទះជម្រើសជាតិកម្ពុជាដែលបានឈ្នះមេដាយប្រាក់ និងសំរិទ្ធស៊ីហ្គេម២លើកចុងក្រោយ។

រូបគេក៏ជាកីឡាករបាល់ទះកម្ពុជាទី១បានទៅលេងនៅប្រទេសវៀតណាម២ដងជាមួយក្លិបអាជីព Lavie Long An កាលពីឆ្នាំ២០២២ដោយទទួលតម្លៃខ្លួនជាង១ម៉ឺនដុល្លារ និងឆ្នាំ២០២៣បានទៅលេងម្តងទៀតដោយទទួលបានតម្លៃខ្លួនជាង២ម៉ឺនដុល្លារអាមេរិក៕