ព័ត៌មានជាតិ

អ្នកនាំពាក្យ ៖ ខេត្តកំពង់ធំ និងខេត្តបន្ទាយមានជ័យ បន្តរងគ្រោះដោយជំនន់ទឹកភ្លៀង

បានផុស

៣ years មុន

នៅ

ថ្ងៃពុធ ១១ តុលា ២០២៣

ដោយ

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍នៅរសៀលថ្ងៃទី ១១ តុលានេះថា ខេត្តកំពង់ធំ និងខេត្តបន្ទាយមានជ័យ នៅតែបន្តរងគ្រោះដោយជំនន់ទឹកភ្លៀង ខណៈខេត្តចំនួន ៥ ទៀត ទឹកកំពុងបន្តស្រកជាបណ្តើរៗ ជិតអស់ហើយ។

លោកបានបន្តថា «ខេត្តកំពង់ធំ នៅបន្តជន់លិច តែទឹកក៏មានការស្រកចុះជាបណ្ដើរហើយដែរ ចំណែកខេត្តបន្ទាយមានជ័យ នៅបន្តជន់លិចដោយសារទឹកហូរធ្លាក់ពីខេត្តបាត់ដំបង ទៅស្ទឹងមង្គមបុរី ជាបន្តបន្ទាប់»។ លោកបានបន្តថា ដោយឡែកខេត្តសៀមរាប ខេត្តបាត់ដំបង ខេត្តព្រះវិហារ ខេត្តកណ្តាល និងខេត្តពោធិ៍សាត់ ទឹកបាននិងកំពុងស្រកជិតអស់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានរំលឹកថា កាលពីដើមខែតុលានេះ ជំនន់ទឹកភ្លៀង បានប៉ះពាល់ ៤ ក្រុងស្រុក ស្មើ ២៥ ឃុំសង្កាត់ នៃខេត្តពោធិ៍សាត់ ប៉ះពាល់ប្រជាពលរដ្ឋ ៩១៩៦ គ្រួសារ ផ្ទះ ៨១០៨ ខ្នង ជម្លៀសប្រជាពលរដ្ឋ ១៣៩៧ គ្រួសារ បានត្រឡប់មកផ្ទះវិញ ហើយស្រូវ ៧១៩៩ ហិតា និងដំណាំរួមផ្សំចំនួន ២៤៤០ ហិតា ខេត្តបាត់ដំបងប៉ះពាល់ ៩ ក្រុងស្រុក ស្មើនឹង ៣៤ ឃុំសង្កាត់ ប៉ះពាល់ប្រជាពលរដ្ឋ ៦១១៧ គ្រួសារ ជម្លៀសប្រជាពលរដ្ឋ ២០០ គ្រួសារ បានវិលត្រឡប់មកផ្ទះវិញហើយ ស្រូវ ៣០៣៤ ហិតា និងដំណាំរួមផ្សំ ១៧៣២ ហិតា ខេត្តសៀមរាបប៉ះពាល់ ៧ ក្រុងស្រុក ស្មើនឹង ២៧ ឃុំសង្កាត់ ប៉ះ ៥៤៥០ គ្រួសារ ផ្ទះ ៣៣៣៨ ខ្នង និងដំណាំស្រូវ ៧២៤៤ ហិតា ខេត្តកំពង់ធំប៉ះពាល់ ៧ ក្រុងស្រុក ស្មើនឹង ២៩ ឃុំសង្កាត់ ប៉ះពាល់ប្រជាពលរដ្ឋចំនួន ៦៩៧៧ គ្រួសារ ផ្ទះ ៣៧២៥ ខ្នង ជម្លៀសប្រជាពលរដ្ឋ ២១៣ គ្រួសារ និងដំណាំស្រូវ ៣៧៥៦ ហិតា ខេត្តព្រះវិហារប៉ះពាល់ស្រុកត្បែងមានជ័យ និងក្រុងព្រះវិហារប៉ះពាល់ប្រជាពលរដ្ឋចំនួន ៤០៦ គ្រួសារ និងស្រូវ ៣៧០ ហិតា ខេត្តបន្ទាយមានជ័យប៉ះពាល់ស្រុកមង្គលបុរីប៉ះពាល់ប្រជាពលរដ្ឋ ៥២ គ្រួសារ និងស្រូវ ១៧៤ ហិតា និងខេត្តកណ្តាលប៉ះពាល់ ៣ ក្រុងស្រុក ស្មើនឹង ៩ ឃុំសង្កាត់ ប៉ះពាល់ប្រជាពលរដ្ឋ ៥១៨ គ្រួសារ ផ្ទះ ២២២ ខ្នង និងដំណាំស្រូវ ៧៣ ហិតា៕

អត្ថបទ ៖ សំអឿន