ព័ត៌មានជាតិ

៥ ខែ ដើមឆ្នាំនេះ មានពលរដ្ឋជាង ៤០ នាក់ រងគ្រោះដោយសារអគ្គិភ័យ ថយចុះជាងឆ្នាំមុន

បានផុស

៣០ វិនាទី មុន

នៅ

ថ្ងៃសៅរ៍ ៧ មិថុនា ២០២៥

ដោយ

នៅក្នុងរយៈពេល ៥ ខែ ឆ្នាំ ២០២៥ នេះ អគ្គិភ័យបានកើតឡើងជាង ៤៧០ លើក បង្កឱ្យមនុស្សស្លាប់ និងរបួសជាង ៤០ នាក់ មានការថយចុះ បើធៀបនឹងរយៈពេល ៥ ខែដូចគ្នា កាលពីឆ្នាំ ២០២៤ ដែលមានអ្នករងគ្រោះរហូតដល់ជាង ៥០ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍នៅព្រឹកថ្ងៃទី ៧ មិថុនា នេះថា គ្រោះអគ្គិភ័យក្នុងរយៈពេល ៥ ខែ ឆ្នាំ ២០២៥ នេះ បានកើតឡើងចំនួន ៤៧១ លើក បណ្តាលឱ្យឆេះផ្ទះ ៤០៥ ខ្នង តូបផ្សារ ៤៧ តូប ឃ្លាំងទំនិញ ១៨ កន្លែង រោងចក្រសិប្បកម្ម ៩ កន្លែង អគាររដ្ឋបាល ៩ កន្លែង ស្លាប់មនុស្ស ១៥ នាក់ និងរបួស ២៩ នាក់។

លោកបានបន្តថា ក្នុងចំណោមអ្នកស្លាប់ និងរបួស រាជធានីភ្នំពេញកើតឡើងច្រើនជាងគេមានចំនួន ៨២ លើក បណ្តាលឱ្យឆេះផ្ទះ ៧៨ ខ្នង តូបផ្សារ ១៥ ឃ្លាំងទំនិញ ១០ កន្លែង រោងចក្រសិប្បកម្ម ៣ កន្លែង អគាររដ្ឋបាល ២ កន្លែង ស្លាប់ ៦ នាក់ របួស ១៦ នាក់។ ក្រៅពីនេះ ខេត្តស្ទឹងត្រែងមានអ្នកស្លាប់ ១ នាក់ កំពង់ចាម ២ នាក់ បាត់ដំបង ២ នាក់ និងខេត្តព្រះសីហនុ ៤ នាក់។

លោកបានបន្តទៀតថា តួលេខនេះ បើធៀបទៅនឹងរយៈពេល ៥ ខែដូចគ្នា ឆ្នាំ ២០២៤ កន្លងទៅ ឃើញថា មានការកើនឡើង តែចំនួនអ្នករងគ្រោះមានការថយចុះ ដោយរយៈពេល ៥ ខែ ឆ្នាំ ២០២៤ គ្រោះអគ្គិភ័យបានកើតឡើងចំនួន ៤៤១ លើក បណ្តាលឱ្យឆេះផ្ទះ ៤៦៣ ខ្នង តូបផ្សារ ៥៧ តូប ឃ្លាំងទំនិញ ៩ កន្លែង រោងចក្រសិប្បកម្ម ១៦ កន្លែង អគាររដ្ឋបាល ៦ កន្លែង ស្លាប់មនុស្ស ១២ នាក់ និងរបួស ៤១ នាក់។

បើតាម លោកឧត្ដមសេនីយ៍ឯក នេត វន្ថា ប្រធាននាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ ធ្លាប់បានបញ្ជាក់ថា ដើមចមដែលនាំឱ្យមានគ្រោះអគ្គិភ័យកើតឡើង បណ្ដាលមកពីការឆ្លងចរន្តអគ្គិសនីចំនួន ៤១.៥៥ ភាគរយ , ប្រើប្រាស់ភ្លើងចំនួន ៣៨.២៤ ភាគរយ និងក្ដាប់មិនបានចំនួន ២០.២១ ភាគរយ៕

អត្ថបទ ៖ សំអឿន