ព័ត៌មានជាតិ

គ្រោះធម្មជាតិ កើតឡើងជាង ៦៨០ លើក បង្កឱ្យមនុស្សស្លាប់-របួស ជិត ១៥០ នាក់ និងបំផ្លាញផ្ទះជាង ៦ ពាន់ខ្នង ក្នុងរយៈពេល ៥ ខែ

បានផុស

១ នាទីute មុន

នៅ

ថ្ងៃសៅរ៍ ៧ មិថុនា ២០២៥

ដោយ

នៅក្នុងរយៈពេល ៥ ខែ ឆ្នាំ ២០២៥ នេះ គ្រោះមហន្តរាយធម្មជាតិរួមមាន ខ្យល់កន្ត្រាក់ រន្ទះបាញ់ និងអគ្គិភ័យ បានកើតឡើងជាង ៦៨០ លើក បង្កឱ្យមនុស្សស្លាប់ជិត ១៥០ នាក់ បំផ្លាញផ្ទះជាង ៦ ពាន់ខ្នង និងហេដ្ឋារចនាសម្ព័ន្ធមួយចំនួនទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍នៅព្រឹកថ្ងៃទី ៧ មិថុនា នេះថា ក្នុងរយៈពេល ៥ ខែ ឆ្នាំនេះ ខ្យល់កន្ត្រាក់ រន្ទះបាញ់ និងអគ្គិភ័យ បានកើតឡើងចំនួន ៦៨៣ លើក បណ្តាលឱ្យប៉ះពាល់ផ្ទះចំនួន ៦ ០៩៧ ខ្នង ស្លាប់មនុស្ស ៤៨ នាក់ និងរបួស ៩៨ នាក់។

លោកបានបន្តថា ក្នុងនោះ រយៈពេល ៥ ខែ ឆ្នាំ ២០២៥ នេះ ខ្យល់កន្ត្រាក់បានកើតឡើង ១៦១ លើក បណ្តាលឱ្យរលំផ្ទះ និងខូចខាតធ្ងន់ធ្ងរចំនួន ៣៦១ ខ្នង របើកដំបូល និងខូចខាតមធ្យមផ្ទះចំនួន ៥ ២២៥ ខ្នង សាលារៀន ៣៥ កន្លែង រលំតូបផ្សារ ១៩ តូប អគាររដ្ឋបាល ១៥ កន្លែង ស្លាប់មនុស្ស ៥ នាក់ និងរបួស ២៣ នាក់។ ចំណែកបាតុភូតរន្ទះបាញ់ បានកើតឡើងចំនួន ៥១ លើក បណ្តាលឱ្យខូចខាតផ្ទះ ៦ ខ្នង ស្លាប់មនុស្ស ២៨ នាក់ របួស ៤៦ នាក់ និងងាប់គោក្របី ៥២ ក្បាល។ រីឯគ្រោះអគ្គិភ័យវិញបានកើតឡើងចំនួន ៤៧១ លើក បណ្តាលឱ្យឆេះផ្ទះ ៤០៥ ខ្នង តូបផ្សារ ៤៧ តូប ឃ្លាំងទំនិញ ១៨ កន្លែង រោងចក្រសិប្បកម្ម ៩ កន្លែង អគាររដ្ឋបាល ៩ កន្លែង ស្លាប់មនុស្ស ១៥ នាក់ និងរបួស ២៩ នាក់។ ចំនួននេះបើធៀបទៅនឹងរយៈពេលដូចគ្នាឆ្នាំ ២០២៤ កន្លងទៅ ឃើញថា មានចំនួនប្រហាក់ប្រហែលគ្នា តែ ៥ ខែ ឆ្នាំនេះ មានអ្នករងគ្រោះច្រើនជាងឆ្នាំមុន ដោយ ៥ ខែឆ្នាំមុន គ្រោះធម្មជាតិ បានកើតឡើងចំនួន ៦៨២ លើក បណ្តាលឱ្យប៉ះពាល់ផ្ទះ ៣ ០២២ ខ្នង ស្លាប់មនុស្ស ៤៨ នាក់ និងរបួស ៨៦ នាក់។

លោកបានបញ្ជាក់ថា ដោយឡែក ក្នុងរយៈពេល ៥ ខែ ឆ្នាំ ២០២៤ ខ្យល់កន្ត្រាក់ បានកើតឡើងចំនួន ១៣៨ លើក បណ្តាលឱ្យផ្ទះរលំខូចខាតធ្ងន់ធ្ងរ ២៩០ ខ្នង របើកដំបូល និងខូចខាតមធ្យម ២ ២៥៥ ខ្នង របើកដំបូលសាលារៀន ២៧ ខ្នង របើកតូបផ្សារ ៦ តូប អគាររដ្ឋបាល ៨ កន្លែង ស្លាប់មនុស្ស ៣ នាក់ និងរបួស ១៧ នាក់ ខណៈបាតុភូតរន្ទះបាញ់ បានកើតឡើងចំនួន ៥៨ លើក បណ្តាលឱ្យខូចខាតផ្ទះ ១៤ ខ្នង ស្លាប់មនុស្ស ៣៣ នាក់ របួស ២៨ នាក់ និងងាប់គោក្របី ២០ ក្បាល និងគ្រោះអគ្គិភ័យបានកើតឡើងចំនួន ៤៤១ លើក បណ្តាលឱ្យឆេះផ្ទះ ៤៦៣ ខ្នង តូបផ្សារ ៥៧ តូប ឃ្លាំងទំនិញ ៩ កន្លែង រោងចក្រសិប្បកម្ម ១៦ កន្លែង អគាររដ្ឋបាល ៦ កន្លែង ស្លាប់មនុស្ស ១២ នាក់ និងរបួស ៤១ នាក់៕

អត្ថបទ ៖ សំអឿន