ការប្រកួតពាន​សម្តេចតេជោថ្នាក់ជាតិ សប្ដាហ៍ទី២ ចាប់ផ្តើមនៅរសៀលនេះ

ការប្រកួតនពានរង្វាន់ សម្តេចអគ្គមហាសេនាបតីតេជោ ហ៊ុន សែន លើកទី១៧ ឆ្នាំ២០២៣-២០២៤ ថ្នាក់ជាតិ សប្ដាហ៍ទី២ មានចំនួន៤គូ ចូលរួមធ្វើការប្រកួតប្រជែងហើយក៏មានការផ្សាយផ្ទាល់តាម BTV Cambodia ។

សម្រាប់ជំនួបដ៏ជក់ចិត្តមាន២គូសម្រាប់ថ្ងៃនេះគឺក្រុមអង្គរថាយហ្គឺរ បើកទ្វារកីឡដ្ឋាន ហនុមាន ទទួលក្រុមភ្ញៀវ ណាហ្គាវើល៍ នាវេលាម៉ោង៣ៈ៣០នាទី។ ខណៈ១គូទៀតគឺក្រុមម្ចាស់ផ្ទះគិរីវង់សុខសែនជ័យ បើកទ្វារកីឡដ្ឋានទទួលក្រុមភ្ញៀវ កងយោធពលខេមរភូមិ នាវេលាម៉ោង៣ៈ៣០នាទី។ ចំពោះ២គូនេះសុទ្ធតែជាក្រុមលេងនៅលីគកំពូលកម្ពុជាដូចគ្នា ហើយមានកម្រិតសមត្ថភាពប្រហាក់ប្រហែលគ្នា ហើយក្រុមនីមួយៗអាចប្រើប្រាស់កីឡាករបរទេសក្នុងវគ្គនេះ ដូច្នេះទើបធ្វើឲ្យការប្រកួតកាន់តែល្អជក់ចិត្តសម្រាប់អ្នកគាំទ្រ។

ចំពោះ២គូផ្សេងទៀតរួមមាន ក្រុមសៀមរាប អេហ្វសុី ជួប ក្រុមបឹងកេត ខណៈ​សមាគមកីឡាបាល់ទាត់ ក្រសួងមហាផ្ទៃ ប៉ះ​ ក្រុមព្រៃវែង ។ ការប្រកួតចំនួន៤គូថ្ងៃសុទ្ធតែលេងនៅម៉ោង៣ៈ៣០នាទី​រសៀល​នេះ​ទាំងអស់ និង​ធ្វើការផ្សាយផ្ទាល់តាមរយៈ BTV Cambodia៕

អត្ថបទ៖ ផា រតនា