ព័ត៌មានជាតិ

សម្ដេច ឃួន សុដារី ស្នើ អូស្ត្រាលី គាំទ្រគោលដៅអភិវឌ្ឍន៍រដ្ឋសភាកម្ពុជា ទៅជា សភាឌីជីថល

បានផុស

២ years មុន

នៅ

ថ្ងៃអង្គារ ២៣ មករា ២០២៤

ដោយ

សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា ស្នើ ប្រទេសអូស្ត្រាលី ជួយគាំទ្រដល់គោលដៅអភិវឌ្ឍន៍រដ្ឋសភាកម្ពុជា ទៅជាសភាឌីជីថល ដើម្បីលើកកម្ពស់សមត្ថភាព ប្រសិទ្ធភាពការងាររដ្ឋសភា ក្នុងការបម្រើផលប្រយោជន៍ប្រជាពលរដ្ឋ និងប្រទេសជាតិ ស្របតាមការរីកចម្រើនសម័យបច្ចេកវិទ្យា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្នើនេះ ក្នុងឱកាស សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា បានទទួលជួប លោក ចាស្ទីន ខេវិន វ៉ាយអេត (Justin Kevin Whyatt) ឯកអគ្គរដ្ឋទូតអូស្ត្រាលី ប្រចាំនៅព្រះរាជាណាចក្រកម្ពុជា នៅវិមានរដ្ឋសភា កាលពីព្រឹកថ្ងៃទី ២៣ ខែមករា ឆ្នាំ ២០២៤។

នាឱកាសនោះ សម្ដេចមហារដ្ឋសភាធិការធិបតី ឃួន សុដារី បានស្នើ ប្រទេសអូស្ត្រាលី ជួយគាំទ្រដល់គោលដៅអភិវឌ្ឍន៍រដ្ឋសភាកម្ពុជា ទៅជាសភាឌីជីថល ដើម្បីលើកកម្ពស់សមត្ថភាព ប្រសិទ្ធភាពការងាររដ្ឋសភា ក្នុងការបម្រើផលប្រយោជន៍ប្រជាពលរដ្ឋ និងប្រទេសជាតិ ស្របតាមការរីកចម្រើនសម័យបច្ចេកវិទ្យា។ បន្ថែមនោះ សម្ដេច ក៏បានស្នើ ប្រទេសអូស្ត្រាលី ជួយបណ្ដុះបណ្ដាលបច្ចេកវិទ្យា និងផ្ដល់អាហារូបករណ៍ ដល់មន្ត្រីអគ្គលេខាធិការដ្ឋានរដ្ឋសភា បានទៅសិក្សានៅប្រទេសអូស្ត្រាលី។

ក្នុងនាមរដ្ឋសភា សម្ដេចរដ្ឋសភាធិបតី ឃួន សុដារី បានគាំទ្រចំពោះលទ្ធផលពិភាក្សាការងាររវាង លោកឯកអគ្គរដ្ឋទូតអូស្ត្រាលី ជាមួយ សម្ដេចមហាបវរធិបតី ហ៊ុន ម៉ាណែត កាលពីថ្ងៃទី ២២ ខែមករា ឆ្នាំ ២០២៤ ក៏ដូចជាការប្ដេជ្ញាចិត្តយ៉ាងមុតមាំ នៃរដ្ឋាភិបាលប្រទេសទាំងពីរ ក្នុងការពង្រឹងពង្រីកកិច្ចសហប្រតិបត្តិការជាមួយគ្នាឲ្យកាន់តែរឹងមាំ និងស៊ីជម្រៅបន្ថែមទៀត។ សម្ដេច បានគូសបញ្ជាក់ថា ទំនាក់ទំនង នៃប្រទេសទាំងពីរ ជាទំនាក់ទំនងដ៏ល្អ ប្រែក្លាយពីមិត្តភាពដ៏ជិតស្និទ្ធ ជាដៃគូយុទ្ធសាស្ត្រឈរលើសាមគ្គីភាព មិត្តភាព ការស្មោះត្រង់ និងការយោគយល់គ្នា ដើម្បីផលប្រយោជន៍ប្រទេសទាំងពីរ ក៏ដូចជាការចូលរួមរក្សាការពារសុខសន្តិភាពក្នុងតំបន់ និងនៅលើឆាកអន្តរជាតិ។

ទន្ទឹមនោះ សម្ដេចរដ្ឋសភាធិបតី ឃួន សុដារី ក៏បានថ្លែងអំណរគុណដល់ប្រទេសអូស្ត្រាលី ដែលតែងតែជួយគាំទ្រ កម្ពុជា គ្រប់កាលៈទេសៈ មានតាំងពីការស្វែងរកសន្តិភាព និងបានចូលរួមអភិវឌ្ឍន៍នៅកម្ពុជាយ៉ាងសកម្មលើគ្រប់វិស័យ ចាប់ពីឆ្នាំ ១៩៩៣ មក។

ជាមួយគ្នានេះដែរ លោក ចាស្ទីន ខេវិន វ៉ាយអេត (Justin Kevin Whyatt) ឯកអគ្គរដ្ឋទូតអូស្ត្រាលី ប្រចាំនៅព្រះរាជាណាចក្រកម្ពុជា ក្នុងជំនួបជាមួយ សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា បានគូសបញ្ជាក់ថា អូស្ត្រាលី បានគាំទ្រចំពោះយុទ្ធសាស្ត្របញ្ចកោណ ដំណាក់កាលទី ១ របស់រាជរដ្ឋាភិបាល អាណត្តិទី ៧ ក្រោមការដឹកនាំរបស់ សម្ដេចមហាបវរធិបតី ហ៊ុន ម៉ាណែត នៅក្នុងការអភិវឌ្ឍធនធានមនុស្ស លើកកម្ពស់សុខុមាលភាពពលរដ្ឋ ជំរុញកំណើនសេដ្ឋកិច្ចជាតិ លើកកម្ពស់ជីវភាពពលរដ្ឋ និងសមភាពយេនឌ័រ ធ្វើកំណែទម្រង់ និងអភិបាលកិច្ច ពង្រឹងវិស័យសន្តិសុខ និងការពារជាតិ ជាដើម។

លោកឯកអគ្គរដ្ឋទូត បានកោតសរសើរដល់ កម្ពុជា ដែលប្រែក្លាយពីប្រទេសធ្លាប់ទទួលកងកម្លាំងថែរក្សាសន្តិភាពរបស់អង្គការសហប្រជាជាតិ នៅឆ្នាំ ១៩៩១ ជាប្រទេសបញ្ជូនកងកម្លាំងថែរក្សាសន្តិភាព ក្រោមឆត្ររបស់អង្គការសហប្រជាជាតិ ទៅចូលរួមថែរក្សាសុខសន្តិភាព នៅតាមប្រទេសជាច្រើន លើសកលលោកវិញ។

លោក Justin Kevin Whyatt ក៏បានគាំទ្រការលើកឡើងរបស់ សម្ដេចរដ្ឋសភាធិបតី ឃួន សុដារី និងគូសបញ្ជាក់ថា មន្ត្រីអគ្គលេខាធិការដ្ឋានរដ្ឋសភា អាចដាក់ពាក្យស្នើសុំអាហារូបករណ៍ដែលរដ្ឋាភិបាលអូស្ត្រាលី តែងតែផ្ដល់ជូនកម្ពុជា ជារៀងរាល់ឆ្នាំ។ ដូចគ្នានេះ អាហារូបករណ៍ឆ្នាំ ២០២៥ នឹងប្រកាសជាផ្លូវការ នាពេលខាងមុខ ស្ថានទូតអូស្ត្រាលីប្រចាំនៅភ្នំពេញ នឹងរង់ចាំធ្វើកិច្ចសហការជាមួយអគ្គលេខាធិការដ្ឋានរដ្ឋសភាកម្ពុជា។ លើសពីនេះទៀត លោក បានលើកឡើងពីកិច្ចសហប្រតិបត្តិការដ៏ល្អ នៃរដ្ឋសភាប្រទេសទាំងពីរ ដែលគាំទ្រគ្នាទៅវិញទៅមក នៅតាមវេទិកាអន្តរសភានានា ក្នុងនោះ ថ្នាក់ដឹកនាំរដ្ឋសភាកម្ពុជា ធ្លាប់អញ្ជើញទៅចូលរួមកិច្ចប្រជុំវេទិកាសភាអាស៊ី-ប៉ាស៊ីហ្វិក(APPF) នៅប្រទេសអូស្ត្រាលី ហើយថ្នាក់ដឹកនាំសភាអូស្ត្រាលី ក៏ធ្លាប់មកចូលរួមកិច្ចប្រជុំនៅកម្ពុជាផងដែរ៕

អត្ថបទ ៖ ពិសី

សេចក្ដីជូនដំណឹង១ សប្តាហ៍ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា