លោក Macron បញ្ជាក់ច្បាស់ៗថា បារាំង មិនចង់ប៉ះរលាកភ្លើងសង្គ្រាម​ជាមួយ រុស្ស៊ី ឡើយ

“យើងមិនធ្វើសង្គ្រាមជាមួយប្រទេស ឬប្រជាជនរុស្ស៊ីជាដាច់ខាត ហើយយើងក៏មិនមានចេតនាផ្លាស់ប្ដូរក្បាលម៉ាស៊ីនដឹកនាំរបស់រដ្ឋាភិបាលទីក្រុងមូស្គូនោះដែរ” ។ នេះជាការលើកឡើងរបស់លោកប្រធានាធិបតីបារាំង Emmanuel Macron និងចុះផ្សាយដោយទីភ្នាក់ងារព័ត៌មាន Reuters កាលពីថ្ងៃទី៦ ខែឧសភាកន្លងទៅ ។

ថ្លែងចេញពីវិមាន Elysee នៅក្នុងសន្និសីទសារព័ត៌មានរួមគ្នាជាមួយលោកប្រធានាធិបតីចិន Xi Jinping កាលពីថ្ងៃចន្ទ, លោក Macron បញ្ជាក់បន្ថែមថា “បារាំងមិនចង់ប៉ះរលាកភ្លើងសង្គ្រាមជាមួយរុស្ស៊ីនោះទេ ប៉ុន្តែបណ្ដាប្រទេសសហភាពអឺរ៉ុប (EU) ក៏ត្រៀមខ្លួនរួចជាស្រេចដើម្បីគាំទ្រដល់អ៊ុយក្រែនផងដែរ នៅពេលដែលរដ្ឋាភិបាលទីក្រុងកៀវត្រូវការយើង” ។

បើទោះជាយ៉ាងនេះក្ដី ក្នុង​រយៈពេល​ប៉ុន្មាន​ខែ​ថ្មីៗ​នេះ ទំនាក់ទំនង​បារាំង​ និង​រុស្ស៊ី​កាន់តែ​ដាំក្បាលចុះក្រោម​ ដោយសារ​រដ្ឋាភិបាលទីក្រុង​ប៉ារីស​បាន​បង្កើនកិច្ចគាំទ្រ​របស់ខ្លួន​ចំពោះ​អ៊ុយក្រែន ។ ជាក់ស្ដែងកាលពីសប្តាហ៍មុន លោក Macron មិនបានទាត់ចោលការបញ្ជូនទាហានទៅកាន់ទីក្រុងកៀវនោះទេ ប្រសិនបើអ្នកចម្បាំងរុស្ស៊ីវាយបំបែកខ្សែត្រៀមជួរមុខរបស់អ៊ុយក្រែន ។

ពាក់ព័ន្ធនឹងបញ្ហានេះទៀតសោត រុស្ស៊ីក៏បានព្រមានទៅបារាំងវិញផងដែរថានឹងប៉ះរលាកមហន្តរាយធ្ងន់ធ្ងរ ប្រសិនបើហ៊ានសម្រេចចិត្តធ្វើរឿងដ៏ឆ្កួតលីលានេះ ។ យោងតាមការចេញផ្សាយដោយទីភ្នាក់ងារព័ត៌មាន TASS បានឲ្យដឹងថា រដ្ឋមន្ត្រីការពារជាតិរុស្ស៊ីលោក Sergey Shoigu បានចេញការរិះគន់មិនសំចៃមាត់ទៅសមភាគីបារាំង បើហ៊ានបញ្ជូនកម្លាំងទ័ពអ៊ុយក្រែនមែននោះ វានឹងទាញឲ្យស្ថានការណ៍កាន់តែពុះកញ្ជ្រោល និងអាចឈានដល់ការផ្ទុះសង្គ្រាមខ្នាតធំទៀតផង ។

ស្របពេលជាមួយគ្នានេះ រុស្ស៊ីតែងគ្រហឹមជារឿយៗថានឹងចាត់ទុកកងទ័ពលោកខាងលិច និងប្រព័ន្ធសព្វាវុធដែលផ្គត់ផ្គង់ដោយបរទេសនៅលើទឹកដីអ៊ុយក្រែន គឺជាគោលដៅកម្ទេចស្របច្បាប់ ហើយជាក់ស្ដែងកាលពីពេលថ្មីៗនេះ កងកម្លាំងទីក្រុងមូស្គូបានបើកការវាយប្រហារដោយមីស៊ីល និងកាំភ្លើងធំទៅលើរថភ្លើងមួយគ្រឿងដែលសង្ស័យថាដឹកសម្ភារៈយោធារបស់អង្គការណាតូទៅឲ្យទីក្រុងកៀវ ។

គិតត្រឹមពេលនេះ ភ្លើងសង្គ្រាមរវាងរុស្ស៊ី និងអ៊ុយក្រែនបានចាយពេលជាង ២ ឆ្នាំហើយ បន្ទាប់ពីកងកម្លាំងរដ្ឋាភិបាលទីក្រុងមូស្គូលើកទ័ពចូលទីក្រុងកៀវកាលពីថ្ងៃទី២៤ ខែកុម្ភៈ ឆ្នាំ២០២២ ខណៈបច្ចុប្បន្នលោកប្រធានាធិបតី Volodymyr Zelensky នៅតែបន្តដើរសុំជំនួយ ក៏ដូចជាសព្វាវុធ និងកែនទាហានជាបន្តបន្ទាប់ពីសម្ព័ន្ធមិត្តសំខាន់ៗដូចជា អឺរ៉ុប និងអាមេរិកជាដើម ។

ទោះបីជាមិនមានព័ត៌មានច្បាស់លាស់អំពីចំនួនអ្នកស្លាប់ និងរបួសក៏ដោយ ប៉ុន្តែតាមការប៉ាន់ប្រមាណរបស់អង្គការសហប្រជាជាតិបានឲ្យដឹងថា ជនស៊ីវិលអ៊ុយក្រែនជាង ១០,០០០ នាក់ត្រូវបានសម្លាប់ ខណៈយោងតាមរបាយការណ៍របស់កាសែត New York Times វិញបានអះអាងថា រហូតមកដល់ពេលនេះទាំងទាហានអ៊ុយក្រែន និងរុស្ស៊ីសរុបចូលគ្នាគឺមានជាង ៥ លាននាក់បានស្លាប់បាត់បង់ជីវិត ៕

ដោយ ៖ សុខ ជីវ័ន្ត

ចុចអាន ៖ សារព័ត៌មានធំៗលើពិភពលោក បង្ហាញគោលដៅសំខាន់ នៃដំណើររបស់លោក Xi ទៅអឺរ៉ុប លើកនេះ