អ៊ុយក្រែន ចាប់បានមន្ត្រីផ្ទៃក្នុង២នាក់ ប៉ុនប៉ងធ្វើឃាតលោក ហ្សេលេនស្គី

ទីភ្នាក់ងារសន្តិសុខអ៊ុយក្រែន (SBU) ប្រកាសថា មន្ត្រីពីរនាក់នៃរដ្ឋបាលសន្តិសុខរដ្ឋ ត្រូវបានចាប់ខ្លួនកាលពីថ្ងៃសៅរ៍សប្តាហ៍មុន ដោយចោទប្រកាន់ពីបទប៉ុនប៉ងធ្វើឃាតលោកប្រធានាធិបតី វ្ល៉ាឌីមៀរ ហ្សេលេនស្គី និងមន្ត្រីទីក្រុងកៀវកំពូលៗផ្សេងទៀត ហើយអាវុធមួយចំនួនក៏ត្រូវបានរកឃើញផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT, ទីភ្នាក់ងារនេះបានអះអាងនៅក្នុងការបង្ហោះលើឆានែល Telegram ថា ជនសង្ស័យទាំងពីរដែលម្នាក់ជាប្រធានរដ្ឋបាលសន្តិសុខរដ្ឋ ឈ្មោះ Andrey Guk និងសហការីឈ្មោះ Derkach គឺកំពុងរៀបចំផែនការសម្លាប់ប្រធានាធិបតីអ៊ុយក្រែន, ប្រធាន SBU លោក Vasily Malyuk និងប្រមុខចារកម្មជាតិ Kirill Budanov ព្រមទាំងអ្នកផ្សេងទៀត។

SBU និយាយថា បុរសទាំងនោះ គឺជាភ្នាក់ងារនៃបណ្តាញមួយរៀបចំនិងបញ្ជាចេញពីទីក្រុងមូស្គូ ហើយកំពុងធ្វើការឃ្លាំមើលលោក ហ្សេលេនស្គី ព្រមទាំងមន្ត្រីរដ្ឋាភិបាលផ្សេងទៀតជាមួយចេតនាបើកដៃឲ្យមានការវាយប្រហារដោយមីស៊ីល និងដ្រូន kamikaze លើពួកគេ។

ចំពោះការធ្វើឃាតវិញ បើតាមការចុះផ្សាយរបស់ BBC, ពួកគេបានរៀបផែនការសម្លាប់ មុនពិធីបុណ្យអ៊ីស្ទើរនៅថ្ងៃទី៥ខែឧសភា ជាមួយនឹងការផ្តាច់ជីវិតលោក ហ្សេលេនស្គី ដើម្បីធ្វើជាកាដូដល់លោក ពូទីន មុនពិធីសម្ពោធចូលកាន់តំណែងរបស់គាត់ ជាប្រធានាធិបតីរុស្ស៊ី អាណត្តិទី៥។

ទោះបីជាយ៉ាងណាក៏ដោយ ជនសង្ស័យទាំងពីរ ត្រូវ​បាន​ចោទ​ប្រកាន់​ពី​បទ​ក្បត់​ជាតិ និង​រៀបចំ​ការ​វាយ​ប្រហារ​ភេរវកម្ម ហើយ​ឥឡូវ​ ត្រូវ​ប្រឈម​នឹង​ការ​ជាប់​ពន្ធនាគារ​អស់​មួយ​ជីវិត។

តាមពិតទៅប្រព័ន្ធផ្សព្វផ្សាយលោកខាងលិច តែងរាយការណ៍ថា លោក ហ្សេលេនស្គី បានក្លាយជាគោលដៅចម្បងរបស់ទីក្រុងមូស្គូ តាំងតែពីដើមដំបូងនៃប្រតិបត្តិការយោធាពិសេសរបស់រុស្ស៊ី នៅអ៊ុយក្រែនមកម្ល៉េះ ហើយក៏មានការប៉ុនប៉ងធ្វើឃាតលោក ជាច្រើនលើកច្រើនសាផងដែរ។

កាលពីខែមុន បុរសសញ្ជាតិប៉ូឡូញម្នាក់ ក៏ត្រូវបានចាប់ខ្លួនផងដែរ និងចោទប្រកាន់ពីបទសហការជាមួយចារកម្មរុស្ស៊ី ដើម្បីធ្វើឃាតលោក ហ្សេលេនស្គី។

ទោះបីជាយ៉ាងណាក៏ដោយ ទីក្រុង​មូស្គូ ​មិន​ទាន់​ធ្វើ​អត្ថាធិប្បាយ​លើ​ការ​ចោទ​ប្រកាន់នេះទេ ប៉ុន្តែអតីតប្រធានាធិបតីរុស្ស៊ី លោក Dmitry Medvedev លើកឡើងថា ឧប្បត្តិហេតុនៅក្នុងប្រទេសប៉ូឡូញ បានបង្ហាញថា ក្រុមអ្នកគាំទ្រលោកខាងលិចរបស់ទីក្រុងកៀវ កំពុងព្យាយាមកម្ចាត់លោក ហ្សេលេនស្គី៕

អត្ថបទ៖ សុខ សុវណ្ណ

ចុចអាន៖ ប៉ូឡូញ ចាប់ខ្លួនបុរសម្នាក់ ដែលគេចាត់មក ឲ្យធ្វើឃាតលោក Zelensky