លោក ត្រាំ ក្លាយជាប្រធានាធិបតីអាមេរិកដំបូងគេ ត្រូវបានកាត់ទោសពីបទឧក្រិដ្ឋធ្ងន់ធ្ងរ

តាមការចុះផ្សាយរបស់ CNN នៅថ្ងៃសុក្រទី៣១ខែឧសភា អតីតប្រធានាធិបតីអាមេរិក លោក ដូណាល់ ត្រាំ ត្រូវបានរកឃើញថាមានពិរុទ្ធ ពីបទក្លែងបន្លំកំណត់ត្រាអាជីវកម្មដើម្បីជួយដល់ការជាប់ឆ្នោតឆ្នាំ២០១៦ ហើយករណីនេះក៏ពាក់ព័ន្ធនឹងការចោទប្រកាន់ថា លោកបានបង់ប្រាក់បំបិទមាត់ដល់តារាសិច Stormy Daniels ផងដែរ នាំឲ្យលោក ត្រាំ ក្លាយជាប្រធានាធិបតីអាមេរិកដំបូងគេ ដែលត្រូវបានកាត់ទោសពីបទឧក្រិដ្ឋធ្ងន់ធ្ងរ។

រឿងក្តីគឺចាប់ផ្តើមតាំងពីឆ្នាំមុនមកម្ល៉េះ ពេលដែលមេធាវីសង្កាត់ Manhattan លោក Alvin Bragg នៅខាងគណបក្សប្រជាធិបតេយ្យ បានចោទប្រកាន់លោក ត្រាំ ជាមួយនឹងអំពើឧក្រិដ្ឋកម្មចំនួន៣៤ករណី ដោយចោទថា អ្នកនយោបាយគណបក្សសាធារណរដ្ឋរូបនេះ ព្យាយាម លាក់បាំងព័ត៌មានខុសឆ្គងនិងសកម្មភាពខុសច្បាប់ពីប្រជាជនអាមេរិក មុននិងក្រោយការបោះឆ្នោតឆ្នាំ២០១៦។

ក្រោយមក គណៈវិនិច្ឆ័យបានពិចារណាអស់រយៈពេលពីរថ្ងៃ ហើយក៏ប្រកាសសាលក្រម មុនម៉ោង៥ល្ងាចថ្ងៃព្រហស្បតិ៍ទី៣០ខែឧសភាឆ្នាំ២០២៤ថា លោក ត្រាំ ពិតជាមានកំហុសលើការចោទប្រកាន់ទាំងអស់មែន។

ទោះបីជាយ៉ាងណាក៏ដោយ ក្រោយការប្រកាសសាលក្រមភ្លាម លោក ត្រាំ បានប្រាប់ទៅអ្នកយកព័ត៌មានមួយរំពេចថា “នេះគឺជាការកាត់ក្តីដ៏ឃោរឃៅ និងគួរឲ្យអាម៉ាស់បំផុត។ សាលក្រមពិតនឹងធ្វើឡើងនៅថ្ងៃទី៥ ខែវិច្ឆិកាដោយប្រជាជនអាមេរិក។ ​យើង​នឹង​បន្ត​ប្រយុទ្ធ! យើង​នឹង​តស៊ូ​ដល់​ទី​បញ្ចប់ ហើយ​យើង​នឹង​ឈ្នះ”។

សូមបញ្ជាក់ថា ការចោទប្រកាន់ទាំង៣៤ករណីនេះ គឺសំដៅទៅលើវិក្កយបត្រចំនួន១១សន្លឹក, បង្កាន់ដៃ១២សន្លឹកនិងមូលប្បទានប័ត្រ១១សន្លឹក ដែលលោក ត្រាំ ផ្តល់ជូនអតីតមេធាវីរបស់គាត់ឈ្មោះ Michael Cohen ឲ្យប្រគល់ប្រាក់ ១៣០ ០០០ដុល្លារដើម្បីបំបិទមាត់តារាសិច Daniels ជុំវិញរឿងអាស្រូវផ្លូវភេទ ហើយដោយសាររឿងទាំងនេះហើយ ទើបលោកមេធាវី Bragg អះអាងថា វាស្មើនឹង “ការក្លែងបន្លំកំណត់ត្រាអាជីវកម្ម”។

យ៉ាងណាក្តី លោក ត្រាំ បាន​បដិសេធ​ម្តងហើយម្តងទៀត រាល់​ទំនាក់ទំនង​ជាមួយ​តារា​សិច Stormy Daniels ហើយអះអាងថា ការចោទប្រកាន់ទាំងឡាយគឺជាការធ្វើទុក្ខបុកម្នេញ ខាងនយោបាយសុទ្ធសាធ៕

អត្ថបទ៖ សុខ សុវណ្ណ

ចុចអាន៖ លោក ត្រាំ គំរាមមាន “ការបង្ហូរឈាម” បើចាញ់ឆ្នោត