សម្ដេចធិបតី ប្រកាសមិនផ្ដល់អាជ្ញាប័ណ្ណបើកកាស៊ីណូនៅក្នុងខេត្តកំពត និងកែបឡើយ

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសថា រាជរដ្ឋាភិបាលមិនអនុញ្ញាត និងមិនផ្ដល់អាជ្ញាប័ណ្ណឱ្យក្រុមហ៊ុនឯកជនបើកកាស៊ីណូនៅក្នុងភូមិសាស្ត្រខេត្តកំពត និងកែបឡើយ។

ថ្លែងចេញពីខេត្តកំពត ក្នុងពិធីសម្ពោធបើកឱ្យប្រើប្រាស់ជាផ្លូវការកំពង់ផែពហុបំណងកំពត នាព្រឹកថ្ងៃទី៦ ខែមិថុនា ឆ្នាំ ២០២៤នេះ សម្ដេចធិបតី ហ៊ុន ម៉ាណែត បានប្រកាសយ៉ាងដូច្នេះថា៖​ «កន្លងទៅមានការស៊ើបសួរអំពីការស្នើសុំអាជ្ញាប័ណ្ណបើកកាស៊ីណូនៅខេត្តកំពត ខ្ញុំសូមបញ្ជាក់ថា ការបើកកាស៊ីណូកន្លងទៅ យើងអនុញ្ញាតតែនៅច្រកព្រំដែន និងមានតែមួយទេនៅបូកគោ អ៊ីចឹង ពីនេះទៅមុខ គឺក្រៅពីកន្លែងនេះ គឺមិនចេញអាជ្ញាប័ណ្ណសម្រាប់ធ្វើកាស៊ីណូក្នុងខេត្តកំពតទៀតទេ…ខេត្តកែប ក៏អត់ផ្ដល់អាជ្ញាប័ណ្ណធ្វើកាស៊ីណូដូចគ្នា»។

សម្ដេចធិបតី ហ៊ុន ម៉ាណែត បានបញ្ជាក់ថា នេះគឺជាគោលការណ៍ដែលត្រូវអនុវត្ត ដោយសម្ដេចធិបតី បានណែនាំឱ្យគណៈកម្មការគ្រប់គ្រងល្បែងពាណិជ្ជកម្មកម្ពុជា កត់ត្រា និងអនុវត្តតាមគោលការណ៍សម្រេចនេះឱ្យមានប្រសិទ្ធភាព។

សម្ដេចធិបតី បានប្រកាសលើកទឹកចិត្ត និងស្វាគមន៍ឱ្យក្រុមហ៊ុនឯកជនស្នើសុំអភិវឌ្ឍន៍គម្រោងផ្សេងៗជំនួសវិញ ជាអាទិ៍តំបន់សេដ្ឋកិច្ចពិសេស សណ្ឋាគារ បុរី និងគម្រោងអភិវឌ្ឍន៍លើវិស័យទេសចរណ៍ផ្សេងៗទៀត ដើម្បីជាចំណែកជួយអភិវឌ្ឍន៍ និងជំរុញកំណើនសេដ្ឋកិច្ចនៅក្នុងខេត្តកំពត​ និងខេត្តកែប៕