កីឡា

ក្រុមនារីអ៊ីតាលីឈ្នះជើងឯកពិភពលោក VNL ខណៈនារីជប៉ុនឈ្នះមេដាយលើកដំបូង

បានផុស

២ years មុន

នៅ

ថ្ងៃចន្ទ ២៤ មិថុនា ២០២៤

ដោយ

ការប្រកួតបាល់ទះជើងឯកនារីពិភពលោក FIVB Women’s Volleyball Nations League ឆ្នាំ២០២៤ បានបញ្ចប់ហើយដោយជើងឯកបានទៅលើក្រុមកីឡាការិនីអ៉ីតាលី បន្ទាប់ពីព្រឹត្តិការណ៍នេះបានដំណើរការប្រកួតតាំងពី១៤ ខែឧសភា និងបញ្ចប់នៅថ្ងៃទី២៣ ខែមិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លងកាត់វគ្គសន្សំពិន្ទុក្នុងពូល ក្រុមនារីអ៉ីតាលី បានឈរលេខ២ក្នុងតារាង បន្ទាប់ពីឈ្នះ១០ប្រកួត និងចាញ់២ប្រកួត រកបាន៣១ពិន្ទុ។ នៅវគ្គ៨ក្រុមចុងក្រោយ អ៉ីតាលី បានយកឈ្នះ អាមេរិក ៣-០។ នៅវគ្គពាក់កណ្តាលផ្តាច់ព្រ័ត្រ អ៉ីតាលី បានយកឈ្នះប៉ូឡូញ ៣-០ និងវគ្គផ្តាច់ព្រ័ត្របានយកឈ្នះក្រុមនារីជប៉ុន ៣-១ ដើម្បីក្លាយជាជើងឯក(មេដាយមាស)។

នេះជាជើងឯកលើកទី២សម្រាប់ក្រុមនារីអ៉ីតាលី ខណៈក្រុមជើងឯក៣សម័យកាលគឺច្រើនជាងគេបំផុត ក្រុមនារីអាមេរិក បានធ្លាក់ត្រឹមវគ្គ៨ក្រុមចុងក្រោយក្នុងព្រឹត្តិការណ៍ឆ្នាំ២០២៤។

ក្រុមនារីជប៉ុន បានឈរចំណាត់ថ្នាក់លេខ៥ក្នុងតារាង បន្ទាប់ពីចប់វគ្គសន្សំពិន្ទុក្នុងពូលតាមរយៈជ័យជម្នះ៨លើក និងចាញ់៤លើក រកបាន២៥ពិន្ទុ។ វគ្គ៨ក្រុមចុងក្រោយ ជប៉ុនបានឈ្នះក្រុមនារីចិន ៣-០, វគ្គពាក់កណ្តាលផ្តាច់ព្រ័ត្រឈ្នះប្រេស៊ីល ៣-២ និងវគ្គផ្តាច់ព្រ័ត្រចាញ់ អ៉ីតាលី ១-៣ ដើម្បីទទួលបានជើងឯករង(មេដាយប្រាក់)។

នេះជាប្រវត្តិសាស្ត្រលើកដំបូងដែលក្រុមបាល់ទះនារីជប៉ុនបានឈ្នះមេដាយ។ គិតចាប់តាំងព្រឹត្តិការណ៍បាល់ទះនារីពិភពលោកនេះចាប់ផ្តើមលើកដំបូងនៅឆ្នាំ២០១៨ គឺក្រុមនារីជប៉ុនទើបតែទទួលបានមេដាយជាលើកដំបូង។

អ្វីដែលភ្ញាក់ផ្អើលក្នុងព្រឹត្តិការណ៍ឆ្នាំ២០២៤នេះ ក្រុមបាល់ទះនារីប្រេស៊ីលមិនស្គាល់ពាក្យចាញ់សោះក្នុងការប្រកួតវគ្គសន្សំពិន្ទុក្នុងពូល។ ពួកគេឈ្នះទាំង១២ប្រកួត រកបាន៣៤ពិន្ទុ ឈរលើកំពូលតារាង ហើយនៅវគ្គ៨ក្រុមចុងក្រោយឈ្នះក្រុមនារីថៃ ៣-០ ប៉ុន្តែបែរជាចាញ់ជប៉ុន ២-៣ នៅវគ្គ៨ក្រុមចុងក្រោយដែលធ្វើឲ្យពួកគេអស់ឱកាសតែម្តង។

ចំណាត់ថ្នាក់លេខ៣បានទៅក្រុមនារីប៉ូឡូញ បន្ទាប់ពីបានឈ្នះប្រេស៊ីល ដោយលទ្ធផល ៣-២។

ពានរង្វាន់ឯកត្តជនផ្សេងៗទៀតមានដូចជា កីឡាការិនីជប៉ុន Sarina Koga និងកីឡាការិនីអ៉ីតាលី Miriam Sylla បានឈ្នះពានរង្វាន់កីឡាការិនីវាយផ្តាច់ (OH)។ កីឡាការិនីប៉ូឡូញ Agnieszka Korneluk និងកីឡាការិនីអ៉ីតាលី Sara Fahr បានឈ្នះពានរង្វាន់អ្នកការពារកណ្តាលឆ្នើមបំផុត។ កីឡាការិនីអ៉ីតាលី Alessia Orro ឈ្នះពានរង្វាន់អ្នកប៉ះសេឆ្នើម។ កីឡាការិនីជប៉ុន Manami Kojima ឈ្នះពានរង្វាន់លីប៊ើរ៉ូឆ្នើមបំផុត។