ព័ត៌មានជាតិ

ទឹកជ្រោះផ្អោកគីរីវង់ ទាក់ទាញភ្ញៀវទេសចរមកលេងកម្សាន្តជាហូរហែ

បានផុស

២ years មុន

នៅ

ថ្ងៃអាទិត្យ ២៥ សីហា ២០២៤

ដោយ

អ៊ិន ពិសី

ទឹកជ្រោះផ្អោក ស្រុកគីរីវង់ ជារមណីយដ្ឋានដ៏ពេញនិយមមួយ នៅខេត្តតាកែវ ដែលអមដោយព្រៃភ្នំថ្មដាយ៉ាងស្រស់ស្អាតគួរជាទីគយគន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជ្រោះផ្អោកនេះ ប្រវែងប្រមាណជាង ១ ០០០ ម៉ែត្រ និង ទទឹងជាង ០២ ម៉ែត្រ ដែលហូរពីលើភ្នំធ្លាក់កាត់ថ្មដាតូច-ធំ ចុះមកក្រោម និងផ្ទះស្បូវសម្រាប់អង្គុយលេងកម្សាន្ត រួមទាំងមានលក់ម្ហូបអាហារតម្លៃថោកសមរម្យសម្រាប់ភ្ញៀវទេសចរមកកម្សាន្តផងដែរ។ អ្វីកាន់តែពិសេសទៀតនោះ រមណីយដ្ឋានទឹកជ្រោះផ្អោកនេះ ក៏សម្បូរត្បូងមានតម្លៃផងដែរ។

ទឹកជ្រោះផ្អោក មុនក្លាយជារមណីយដ្ឋានពេញនិយម កាលពីជាង ១០ ឆ្នាំមុន នៅទីនេះ គឺជាទីតាំងសំខាន់មានប្រជាជនជាច្រើនមកជីករកត្បូងមានតម្លៃ ហើយត្បូងដែលសម្បូរជាងគេ មានដូចជា ត្បូងទឹកសមុទ្រ ត្បូងកញ្ចក់ ត្បូងផ្កាថ្ម ត្បូងមីសិល និង ត្បូងឃ្មុំជាដើម។ បច្ចុប្បន្ន ត្បូងនៅកន្លែងដែលប្រជាជនកំពុងលេងទឹកយ៉ាងសប្បាយនេះ បានខ្សត់ខ្សោយហើយ។

ប្រសិនបើភ្ញៀវទេសចរចង់ទៅកម្សាន្តសប្បាយនឹងទឹកជ្រោះធ្លាក់ពីលើភ្នំ ហើយសម្បូរព្រៃឈើ តូច-ធំ អមដោយថ្មដា និងចង់ស្វែងយល់ពីត្បូងមានតម្លៃនៅទឹកជ្រោះផ្អោក ព្រមទាំងពិសាអាហារ ជាពិសេសបាញ់ឆែវរសជាតិឆ្ងាញ់ពិសា អាចទៅកម្សាន្តនៅរមណីយដ្ឋានទឹកជ្រោះផ្អោកបាន ដែលរមណីយដ្ឋាននេះ ស្ថិតនៅក្នុងភូមិជ្រោយស្លែង ឃុំគីរីចុងកោះ និង ភូមិត្រពាំងស្រង់ ឃុំព្រះបាទជាន់ជុំ ស្រុកគីរីវង់ ខេត្តតាកែវ៕

អត្ថបទ ៖ វីរៈ