រដ្ឋមន្រ្តីក្រសួង​ពាណិជ្ជកម្ម​ ផ្តល់យុទ្ធសាស្ត្រ ៤ ចំណុច ដើម្បីពង្រឹងសិទ្ធិអំណាចខាងសេដ្ឋកិច្ចដល់ស្ត្រី

លោក​ស្រី ចម និម្មល រដ្ឋមន្ត្រីក្រសួងពាណិជ្ជកម្ម ក្នុងពិធីបើកសិក្ខាសាលាស្តីពី “ការផ្ទៀងផ្ទាត់ការសិក្សាទស្សនៈវិស័យស្ត្រីក្នុងពាណិជ្ជកម្ម” ដែលសហការរៀបចំឡើងដោយក្រសួងពាណិជ្ជកម្ម និងមជ្ឈមណ្ឌលពាណិជ្ជកម្មអន្តរជាតិ បាន​លើក​ឡើង​យុទ្ធសាស្ត្រ ៤ ចំណុច ដើម្បីចូលរួមដោះ​ស្រាយ​បញ្ហាប្រឈម និងលើកកម្ពស់ការពង្រឹងសិទ្ធិអំណាចខាងសេដ្ឋកិច្ចដល់ស្ត្រី។

រដ្ឋមន្ត្រីក្រសួងពាណិជ្ជកម្ម​បាន​លើក​ឡើង​ថា ក្រសួងពាណិជ្ជកម្ម​បាន​កំពុងដើរតួយ៉ាងសកម្ម ក្នុង​ការបង្កើត​បរិយាកាសធុរកិច្ចប្រកបដោយយុត្តិធម៌ និងគាំទ្រទាំងបុរស និងស្ត្រី ដោយ​បានផ្តល់កម្មវិធីបណ្តុះបណ្តាល និងអប់រំជា​ច្រើនសំដៅជួយស្ត្រីឱ្យទទួលបានភាពជោគជ័យខ្ពស់ក្នុងអាជីវកម្ម និងលើក​កម្ពស់​គោលនយោបាយនានាដែលទទួលស្គាល់ និងផ្តល់​ការកោតសរសើរ​ដល់សមិទ្ធផល​នានា​របស់​ស្ត្រី។

ដើម្បី​ចូលរួមដោះ​ស្រាយ​បញ្ហាប្រឈម រដ្ឋមន្រ្តីក្រសួងពាណិជ្ជកម្ម​បាន​ផ្តល់​​យុទ្ធសាស្រ្ត​ ៤ ចំណុច ទី​១. ត្រូវបង្កើនការរួមបញ្ចូលផ្នែកហិរញ្ញវត្ថុសម្រាប់សហគ្រិនជាស្ត្រី តាមរយៈ​ការផ្តល់កម្មវិធីផ្តល់​ប្រាក់កម្ចីមានគោលដៅ​ជាក់លាក់ ការផ្តល់នូវគ្រឹះស្ថានមីក្រូហិរញ្ញវត្ថុ និងការផ្តល់នូវ​ការបណ្តុះបណ្តាល​ចំណេះ​ដឹងផ្នែក​ហិរញ្ញវត្ថុដល់ស្ត្រី។ ទី២. កំណែទម្រង់​គោលនយោបាយ​មានភាព​ចាំបាច់​ក្នុងការ​លើកកម្ពស់​សមភាពយេនឌ័រ​ក្នុងវិស័យ​ពាណិជ្ជកម្ម រួមទាំងវិធានការប្រយុទ្ធប្រឆាំងអំពើហិង្សានិងការរើសអើងលើស្ត្រី។

ទី៣. ការ​​វិនិយោគ​លើ​កម្មវិធី​អភិវឌ្ឍន៍​ជំនាញ​សម្រាប់​ស្ត្រី ដោយ​​ផ្តោត​សំខាន់លើផ្នែកពាក់ព័ន្ធពាណិជ្ជកម្ម ដូចជាការគ្រប់គ្រងអាជីវកម្ម នីតិវិធីនាំចេញ និងចំណេះដឹងផ្នែកអក្ខរកម្មឌីជីថល គឺពិតជាសំខាន់ និងទី​៤. ការ​ជំរុញ​កម្មវិធី​ណែនាំ (Mentorship) និង​ឱកាស​កសាង​បណ្តាញ​ទំនាក់ទំនង នឹង​អាចជួយ​ស្ត្រីក្នុងវិស័យ​ពាណិជ្ជកម្ម ផ្សារភ្ជាប់ខ្លួនជាមួយនឹងបុគ្គលគំរូ និងបង្កើតបណ្តាញគាំទ្រនានា។

រាជរដ្ឋាភិបាលកម្ពុជា យកចិត្តទុកដាក់ខ្ពស់ និងបានដាក់ចេញនូវគោលនយោបាយជាតិស្តីពីការងារឆ្នាំ២០១៥-២០២៥ និង​ក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជាឆ្នាំ២០២១-២០២៥ ដែលមានយន្តការដោះស្រាយវិសមភាពយេនឌ័រនៅក្នុងទីផ្សារការងារ តាមរយៈការលើកកម្ពស់​ឱ្យមានឱកាសស្មើគ្នា និងលទ្ធភាពទទួលបានការងារសមរម្យរវាងបុរសនិងស្ត្រី ព្រមទាំង​បានផ្ដល់សិទ្ធិ​អំណាច​ដល់​ស្ត្រីក្នុងការចូលរួម​យ៉ាង​​សកម្ម​នៅក្នុងសេដ្ឋកិច្ចឌីជីថល ដែល​រួមទាំង​ពាណិជ្ជកម្ម​តាម​ប្រព័ន្ធអេឡិចត្រូនិក និង​ពាណិជ្ជកម្មអនឡាញ​ផងដែរ៕ ​

​