​អ្នក​ឡើង​ភ្នំ​ពី​​អ៊ីតាលីនិង​កូរ៉េ​ខាង​ត្បូង៤​នាក់​ស្លាប់​​ជិត​កំពូល​ភ្នំ Mont Blanc​ នៅបារាំង​

ក្រុមមន្ត្រីជួយសង្គ្រោះបានរកឃើញសាកសពអ្នកឡើងភ្នំជនជាតិអ៊ីតាលី២នាក់ និងកូរ៉េខាងត្បូង២នាក់នៅជិតកំពូលភ្នំ Mont Blanc នៅខាង​ប្រទេសបារាំង​និង​​ជា​ភ្នំខ្ពស់បំផុត​ទី២​​នៅ​អឺរ៉ុប​ បន្ទាប់ពីពួកគេបានបាត់ខ្លួនកាលពីចុងសប្តាហ៍មុនក្នុងអាកាសធាតុអាក្រក់ក្នុងអំឡុងពេលឡើងភ្នំនេះ។

​ទីភ្នាក់ងារព័ត៌មានAP​នៅថ្ងៃទី១១ខែកញ្ញានេះ​ បាន​ផ្សាយ​ថា​ ក្រុមស្វែងរក​និងជួយសង្គ្រោះ Chamonix-Mont Blanc បានរកឃើញអ្នកឡើងភ្នំ​ទាំង​បួននាក់នៅកម្ពស់៤៧០០ម៉ែត្រ នៅលើកំពូលភ្នំខ្ពស់បំផុតរបស់ភ្នំអាល់ ខណៈមន្ត្រីជួយសង្គ្រោះបាននិយាយថា ពួកគេបានស្លាប់ដោយសារការ​អាកាសធាតុ​ចុះ​ត្រជាក់ខ្លាំងពេក។

អ្នកឡើងភ្នំដែលមិនបានរួមដំណើរជាមួយអ្នកស្លាប់៤នាក់នោះ បានជូនដំណឹងដល់ក្រុមអ្នកជួយសង្គ្រោះកាលពីរសៀលថ្ងៃសៅរ៍ ប៉ុន្តែលក្ខខណ្ឌអាកាសធាតុនៅតែបន្តយ៉ាប់យ៉ឺន ដែលរារាំងអ្នកជួយសង្គ្រោះមិនឱ្យទៅដល់ទីតាំងរបស់ពួកគេឬដោយ​មធ្យោបាយ​ឧទ្ធម្ភាគចក្រ​​​។

ដោយឡែកអ្នកឡើងភ្នំជនជាតិកូរ៉េពីរនាក់ផ្សេងទៀតក៏ត្រូវបានជួយសង្គ្រោះដោយជោគជ័យកាលពីព្រឹកថ្ងៃអាទិត្យនៅរយៈកម្ពស់៤១០០​ម៉ែត្រ បន្ទាប់ពីក្រុមអ្នកជួយសង្គ្រោះបានដាក់ពង្រាយប្រតិបត្តិការដ៏ស្មុគស្មាញមួយក្នុងការជួយសង្គ្រោះ។ទោះយ៉ាងណាអាជ្ញាធរបារាំងបានកំពុងបើកការស៊ើបអង្កេតដើម្បីបញ្ជាក់បន្ថែមពីករណីស្លាប់នេះ។

ភ្នំ Mont Blanc ជាភ្នំខ្ពស់បំផុតនៅតំបន់ភ្នំអាល់ និងជាភ្នំខ្ពស់បំផុតនៅអឺរ៉ុបមានកម្ពស់ ៤៨០៥,៥៩ ម៉ែត្រ និងមានទីតាំងនៅព្រំដែនបារាំង-អ៊ីតាលី។ វាគឺជាភ្នំដែលលេចធ្លោជាងគេទីពីរនៅអឺរ៉ុប បន្ទាប់ពីភ្នំ Elbrus​ នៅ​ចន្លោះ​រុស្ស៊ី​និង​អឺរ៉ុប​​ និង Mont Blanc​ ជាភ្នំលេចធ្លោជាងគេទី១១នៅលើពិភពលោក៕

អត្ថបទ៖ ប៊ុន សុភាព