នគរបាល ប្រជាការពារ និងកម្មករប្រមូលសំរាមក្នុងសង្កាត់ស្ទឹងមានជ័យទី១ ទទួលបានអំណោយ​ពីលោកអភិបាលខណ្ឌមានជ័យ

ដើម្បីជាការលើកទឹកចិត្ត និងជាផ្នែកនៃការគិតគូរដល់មន្ត្រីនៅក្រោមឱវាទផងនោះ លោក សេង គន្ធ អភិបាលខណ្ឌមានជ័យ និងជាប្រធានកិត្តិយសអនុសាខាកាកបាទក្រហមកម្ពុជាខណ្ឌមានជ័យ បានផ្តល់អំណោយជូនដល់មន្ត្រីនគរបាលប៉ុស្តិ៍ ប្រជាការពារសង្កាត់ស្ទឹងមានជ័យទី១ រួមជាមួយកម្មករប្រមូលសំរាម សរុបទាំងអស់៥០នាក់។

ពិធីសំណេះសំណាល និងផ្តល់អំណោយជូននេះ ធ្វើឡើងនាព្រឹកថ្ងៃទី១៥ ខែតុលា ឆ្នាំ២០២៤នេះ នៅក្នុងបរិវេណវត្តចង្ក្រានតាព្រហ្ម ហៅវត្តស្ទឹងមានជ័យ ដោយមានការអញ្ជើញចូលរួមជាពីព្រះចៅអធិការវត្ត ព្រះគ្រូសូត្រស្តាំសូត្រឆ្វេង និងញាតិញ៉ោមពុទ្ធិបរិស័ទមួយចំនួនទៀត ដែលបានចូលជាបច្ច័យ និងទេយ្យទានជាច្រើនប្រគេនព្រះសង្ឃ ហើយត្រូវបានព្រះសង្ឃវេរជាទានសប្បុរសបន្តទៅកងកម្លាំងដែលកំពុងមានវត្តមាននៅទីនោះ។

លោក សេង គន្ធ អភិបាលខណ្ឌ បានមានមតិសំណេះសំណាលជាមួយកងកម្លាំង ដោយលោកបានធ្វើការកោតសសើរកម្លាំងទាំង២ ទាំងនគរបាល និងប្រជាការពារ ដែលបានយកចិត្តទុកដាក់ក្នុងការបម្រើប្រជាពលរដ្ឋ មិនប្រកាន់ពេលវេលាយប់ ឬថ្ងៃ។ លើកពីនោះ កម្លាំងទាំង២នេះ បានដើរតួនាទីសំខាន់ក្នុងការល្បាតពួនស្ទាក់ និងបង្ក្រាបបទល្មើសក្នុងមូលដ្ឋាន ធានាសន្តិសុខសុវត្ថិភាពជូនពលរដ្ឋ ពិសេសនោះ គឺតែងចុះសម្របសម្រួលលំហូរចរាចរណ៍លើដងផ្លូវ ខណៈសង្កាត់ស្ទឹងមានជ័យទី១ តែងជួបជាប្រចាំលើការកកស្ទះ។

សូមបញ្ជាក់ថា អំណោយដែលត្រូវចែកជូន ក្នុងម្នាក់ទទួលបាន អង្ករ ១បេ ២៥គីឡូក្រាម មី ១កេស ទឹកត្រី ១យួ ទឹកស៊ីអ៊ីវ ១យួ តែ ស្ករស ទឹកដោះគោ និងថវិការមួយចំនួនទៀតផងដែរ។

អំណោយចែកជូននៅពេលនេះ ក៏ជាការលើកទឹកចិត្តចំពោះការជួយការពារសុវត្ថិភាព និងសម្របសម្រួលចរាចរណ៍ ក្នុងវត្តអារាមទាំងអស់ ក្នុងមូលដ្ឋាន កំឡុងឱកាសបុណ្យកាន់បិណ្ឌ និងភ្ជុំបិណ្ឌដែលមានរយៈពេល១៥ថ្ងៃផងដែរ ដោយកម្លាំងពិតជាបានសស្រាក់សស្រាំគ្នាជាខ្លាំង ក្នុងការបំពេញភារកិច្ចរបស់ខ្លួន៕

អត្ថបទ៖ សុភា