ព្យុះត្រាមី វាយប្រហារវៀតណាម ជាមួយកម្លាំងខ្យល់ល្បឿន ៨៨គីឡូម៉ែត្រក្នុងមួយម៉ោង

ជាមួយនឹងល្បឿនខ្យល់៨៨គីឡូម៉ែត្រក្នុងមួយម៉ោង ព្យុះ ត្រាមី បានវាយប្រហារខេត្ត ធឿធៀនហ្វេ និង ដាណាំង កាលពីរសៀលថ្ងៃអាទិត្យទី២៧ខែតុលាឆ្នាំ២០២៤ ដោយបណ្តាលឲ្យមានភ្លៀងធ្លាក់ខ្លាំងនិងជំនន់រហ័ស ហើយបង្កការខូចខាតខ្លាំងគួរសមដែរ។

មិនត្រឹមប៉ុណ្ណឹង ឥទ្ធិពលនៃព្យុះនេះ ក៏បោកផ្តួលរំលំបង្គោលភ្លើង បង្កទឹកជំនន់ជន់លិចដងផ្លូវនិងបំបាក់ដើមឈើនៅតាមដងផ្លូវផងដែរ ប៉ុន្តែភ្លាមៗ មិនទាន់មានសេចក្តីរាយការណ៍អំពីមនុស្សស្លាប់ បាត់ខ្លួន ឬរងរបួសទេ។

មុនមកដល់វៀតណាម ព្យុះ ត្រាមី បានបង្កទុកវេទនានៅប្រទេសហ្វីលីពីន ដោយបង្កជាទឹកជំនន់និងគ្រោះបំណាក់ដី ខណៈគិតត្រឹមព្រឹកថ្ងៃចន្ទទី២៨ខែតុលាឆ្នាំ២០២៤ តួលេខមនុស្សស្លាប់និងបាត់ខ្លួន បានកើនឡើងដល់ ១៣៦នាក់ហើយ។

លើសពីនេះ ព្យុះត្រាមី បានបង្កទុកវេទនាដល់ប្រជាជនហ្វីលីពីន ជាក់ស្តែងមនុស្សជាងកន្លះលាននាក់ ត្រូវជម្លៀសចេញពីផ្ទះសម្បែង, គ្មានអគ្គិសនីប្រើប្រាស់ ខណៈជើងហោះហើរមួយចំនួនក៏ត្រូវផ្អាកផងដែរ។

ទោះបីជាយ៉ាងណាក៏ដោយ ក្រុមអ្នកជួយសង្គ្រោះសន្និដ្ឋានថា តួលេខមនុស្សស្លាប់អាចបន្តកើនឡើងទៀត ព្រោះនៅមានមនុស្សមួយចំនួនត្រូវជាប់ក្រោមដីបាក់សង្កត់៕

អត្ថបទ៖ សុខ សុវណ្ណ

ចុចអាន៖ ព្យុះ ត្រាមី បង្កទុក្ខវេទនាខ្លាំងនៅហ្វីលីពីន, មនុស្សស្លាប់និងបាត់ខ្លួន កើនដល់ ១៣៦នាក់