ព្យុះ ត្រាមី បង្កទុក្ខវេទនាខ្លាំងនៅហ្វីលីពីន, មនុស្សស្លាប់និងបាត់ខ្លួន កើនដល់ ១៣៦នាក់ 

ក្នុងនាមជាព្យុះកំណាចមួយដែលវាយប្រហារតំបន់អាស៊ីអាគ្នេយ៍ក្នុងឆ្នាំនេះ ព្យុះ ត្រាមី បានបង្កជាទឹកជំនន់និងគ្រោះបំណាក់ដី នៅប្រទេសហ្វីលីពីន ដោយគិតត្រឹមព្រឹកថ្ងៃចន្ទទី២៨ខែតុលាឆ្នាំ២០២៤ តួលេខមនុស្សស្លាប់និងបាត់ខ្លួន បានកើនឡើងដល់ ១៣៦នាក់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Aljazeera, ព្យុះនេះបានវាយប្រហារភាគពាយព្យប្រទេសហ្វីលីពីនជាមួយកម្លាំងខ្យល់ល្បឿនជិត១០០គីឡូម៉ែត្រក្នុងមួយម៉ោង កាលពីថ្ងៃសុក្រទី២៥ខែតុលា ដោយសម្លាប់មនុស្សចំនួន១០០នាក់ និងបាត់ខ្លួន៣៦នាក់។

ក្រៅពីសម្លាប់មនុស្ស ព្យុះត្រាមី បានបង្កទុកវេទនាដល់ប្រជាជនហ្វីលីពីន ជាក់ស្តែងមនុស្សជាងកន្លះលាននាក់ ត្រូវជម្លៀសចេញពីផ្ទះសម្បែង, គ្មានអគ្គិសនីប្រើប្រាស់ ខណៈជើងហោះហើរមួយចំនួនក៏ត្រូវផ្អាកផងដែរ។

ទោះបីជាយ៉ាងណាក៏ដោយ ក្រុមអ្នកជួយសង្គ្រោះសន្និដ្ឋានថា តួលេខមនុស្សស្លាប់អាចបន្តកើនឡើងទៀត ព្រោះនៅមានមនុស្សមួយចំនួនត្រូវជាប់ក្រោមដីបាក់សង្កត់។

មិនត្រឹមប៉ុណ្ណឹង រឿងដែលគេព្រួយបារម្ភខ្លាំងគឺថា ព្យុះ​ត្រាមី នឹង​អាច​​វិល​ត្រឡប់​ទៅ​វាយ​ប្រហារប្រទេស​ហ្វីលីពីន​ម្ដង​ទៀត​នៅ​សប្ដាហ៍​នេះ ក្រោយចាកចេញពីវៀតណាម។

សូមបញ្ជាក់ថា មួយឆ្នាំៗ មានព្យុះតូចធំប្រហែល២០ ចូលវាយលុកប្រទេសហ្វីលីពីន ដែលជាប្រជុំកោះអាស៊ីអាគ្នេយ៍ ស្ថិតនៅចន្លោះមហាសមុទ្រប៉ាស៊ីហ្វិកនិងសមុទ្រចិនខាងត្បូង។

ក្នុងឆ្នាំ២០១៣ ហៃយ៉ាន ដែលជាព្យុះស៊ីក្លូនត្រូពិកខ្លាំងបំផុតមួយ បានបណ្តាលឲ្យមនុស្សជាង ៧ ៣០០នាក់ស្លាប់ឬបាត់ខ្លួន និងបង្កការបំផ្លិចបំផ្លាញធំធេង៕

អត្ថបទ៖ សុខ សុវណ្ណ

ចុចអាន៖ ព្យុះ ត្រាមី អាច​ត្រឡប់​ទៅហ្វីលីពីន​ម្ដង​ទៀត​នៅ​សប្ដាហ៍​ក្រោយ ខណៈ​អ្នកស្លាប់​កើន​​ដល់ ៤៦​នាក់