ព័ត៌មានជាតិ

ក្រោយជួសជុល កែលម្អ សួនបាញ់ទឹកដោយស្វ័យប្រវត្តរួច បានបង្ហាញភាពស្រស់ស្អាត និងទាក់ទាញ

បានផុស

២ years មុន

នៅ

ថ្ងៃពុធ ៣០ តុលា ២០២៤

ដោយ

សួនបាញ់ទឹកសាធារណៈ នៅភ្នំពេញ ដែលរដ្ឋបាលរាជធានីភ្នំពេញធ្វើការជួសជុល លាបថ្នាំ កែលម្អ ផ្លាស់ប្ដូរអំពូលភ្លើង និងប្រព័ន្ធបញ្ជាបាញ់ទឹក ស្វ័យប្រវត្តិរួចរាល់ ជាមួយនឹងការបើកដំណើរការ ឃើញថា មានភាពស្រស់ស្អាត និងទាក់ទាញមែនទែន។

ការជួសជុល លាបថ្នាំ កែលម្អនេះ ធ្វើឡើងដើម្បីអបអរសាទរពិធីបុណ្យជាតិធំៗ ដូចជា ព្រះរាជពិធីបុណ្យខួបលើកទី ២០ នៃការគ្រងព្រះបរមសិរីរាជសម្បត្តិថ្វាយព្រះករុណាព្រះបាទសម្ដេចព្រះបរមនាថ នរោត្តមសីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត បុណ្យឯករាជ្យជាតិ និងព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក ដែលនឹងប្រព្រឹត្តិទៅបន្តបន្ទាប់គ្នានាពេលឆាប់ៗ ខាងមុខនេះ។

មន្ត្រីរដ្ឋបាលរាជធានីភ្នំពេញ បានឱ្យដឹងថា ដោយមានការគិតគូរយ៉ាងយកចិត្តទុកដាក់ពី លោក ឃួង ស្រេង អភិបាល នៃគណៈអភិបាលរាជធានីភ្នំពេញ បានណែនាំ និងបែងចែកក្រុមការងារមន្ត្រីជំនាញពាក់ព័ន្ធក្រោមឱវាទរដ្ឋបាលរាជធានីភ្នំពេញ ធ្វើការជួសជុល តុបតែង កែលម្អ លាបថ្នាំ និងផ្លាស់ប្ដូរអំពូលភ្លើងតួវិមានឯករាជ្យ សួនបាញ់ទឹកវិមានឯករាជ្យ សួនច្បារ សួនកម្សាន្តសម្រាប់កុមារ ឱ្យមានសោភ័ណភាពស្រស់ស្អាត និងស្រស់បំព្រង ដើម្បីអបអរសាទរ ព្រះរាជពិធីបុណ្យខួបលើកទី ២០ នៃការគ្រងព្រះបរមសិរីរាជសម្បត្តិថ្វាយព្រះមហាក្សត្រជាទីគោរពសក្ការៈដ៏ខ្ពង់ខ្ពស់បំផុតពិធីបុណ្យឯករាជ្យជាតិ និងព្រះរាជពិធីបុណ្យអុំទូកបណ្ដែតប្រទីប សំពះព្រះខែ និងអកអំបុក ដែលនឹងប្រព្រឹត្តិទៅបន្តបន្ទាប់គ្នាចាប់ពីពេលនេះតទៅ។

មន្ត្រីជំនាញដដែល បានឱ្យដឹងទៀតថា ចំពោះការងារជួសជុលកែលម្អរសួនទឹករួមមាន សួនបាញ់ទឹកវិមានឯករាជ្យ សួនបាញ់ទឹកមុខវត្តបទុមវតី សួនបាញ់ទឹកមុខឡឺរ៉ូយ៉ាល់ សួនបាញ់ទឹកនៅសួនកុមារវត្តភ្នំ និងសួននាគបាញ់ទឹក។

មន្ត្រីដដែល បាបបន្តថា ការងារជួសជុលកែលម្អររួមមាន ដុសខាត់ស្លែ លាបថ្នាំ ជួសជុលផ្លាស់ប្ដូរអំពូលភ្លើង ក្បាលបាញ់ទឹក ទូរបញ្ជាស្វ័យប្រវត្តិ ប្រព័ន្ធគ្រប់គ្រងភ្លើង និងឧបករណ៍សម្ភារៈភ្លើងមួយចំនួនទៀត ដែលមកដល់ពេលនេះ ការងារជួសជុលកែលម្អរួចរាល់ហើយ ព្រមទាំងបើកដំណើរការចាប់ពីថ្ងៃព្រះរាជពិធីបុណ្យខួបលើកទី ២០ នៃការគ្រងព្រះបរមសិរីរាជសម្បត្តិ ថ្វាយព្រះករុណាព្រះបាទសម្ដេចព្រះបរមនាថ នរោត្តមសីហមុនី ព្រះមហាក្សត្រ ជាទីគោរពសក្ការៈដ៏ខ្ពង់ខ្ពស់បំផុត នៃយើងនេះតទៅ៕

អត្ថបទ ៖ ស្រីរ័ត្ន