ព័ត៌មានអន្ដរជាតិ

លោក Netanyahu៖ អ៊ីរ៉ង់ខ្លាចប្រជាជនខ្លួនឯង ជាងខ្លាចអ៊ីស្រាអែល

បានផុស

២ years មុន

នៅ

ថ្ងៃព្រហស្បតិ៍ ១៤ វិច្ឆិកា ២០២៤

ដោយ

Chheang

នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយនៅក្នុងសារជាវីដេអូផ្ទាល់មួយទៅកាន់ប្រជាជនអ៊ីរ៉ង់ថា រដ្ឋាភិបាលរបស់លោក Ayatollah Ali Khamenei ដែលជាមេដឹកនាំកំពូល មានការបារម្ភភ័យខ្លាចប្រជាជនអ៊ីរ៉ង់ខ្លួនឯងច្រើនជាងខ្លាចអ៊ីស្រាអែលទៅទៀត។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters កាលពីថ្ងៃទី១៣ខែវិច្ឆិកាឆ្នាំ២០២៤។

លោក Ali Khamenei និងលោក Benjamin Netanyahu (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Netanyahu បានប្រាប់ប្រជាជនអ៊ីរ៉ង់ថា៖ «នោះហើយជាមូលហេតុដែលពួកគេចំណាយពេលវេលា និងប្រាក់យ៉ាងច្រើនដើម្បីព្យាយាមកម្ទេចក្តីសង្ឃឹមរបស់អ្នក និងរារាំងក្តីសុបិនរបស់អ្នក។ មែនហើយ ខ្ញុំសូមប្រាប់អ្នកថា កុំឲ្យសុបិនរបស់អ្នករលាយសូន្យ។ ខ្ញុំឮសំលេងខ្សឹបខ្សៀវពី ស្ត្រី ជីវិត សេរីភាព»។

លោក Netanyahu បានបន្តថា៖ «កុំអស់សង្ឃឹម។ ហើយត្រូវដឹងថា អ៊ីស្រាអែល និងប្រទេសដទៃទៀតក្នុងពិភពលោកសេរី ឈរនៅជាមួយអ្នក»។

នៅក្នុងសារនេះ នាយករដ្ឋមន្ត្រីអ៊ីស្រាអែល ចង់សំដៅទៅលើការវាយប្រហារដោយមីស៊ីលប៉ាលិស្ទិក កាលពីថ្ងៃទី១តុលារបស់អ៊ីរ៉ង់ ទៅលើអ៊ីស្រាអែល។ លោកថា រដ្ឋាភិបាលអ៊ីរ៉ង់ចំណាយប្រហែល ២,៣ពាន់លានដុល្លារ នៃលុយប្រជាជន ប៉ុន្តែបានបង្កការខូចខាតតិចតួចប៉ុណ្ណោះនៅលើទឹកដីអ៊ីស្រាអែល។

លោក Netanyahu បាននិយាយទៀតថា ជីវិតនៅក្នុងប្រទេសអ៊ីរ៉ង់អាចមានភាពខុសប្លែកគ្នា បើប្រទេសនេះមានសេរីភាព ហើយមូលនិធិនោះអាចប្រើប្រាស់សម្រាប់ការអប់រំ ផ្លូវថ្នល់ ទឹក និងមន្ទីរពេទ្យ ជំនួសឲ្យសង្រ្គាម។

លោកសង្កត់ធ្ងន់ថា៖ «ប៉ុន្តែនោះជាអ្វីដែលរបបរបស់លោក Khamenei បដិសេធអ្នកជារៀងរាល់ថ្ងៃ។ ពួកគេឈ្លក់វង្វេងនឹងការបំផ្លាញអ៊ីស្រាអែល ជាជាងការកសាងអ៊ីរ៉ង់។ ខ្ញុំដឹងថាអ្នកមិនចង់បានសង្រ្គាមនេះទេ។ ខ្ញុំក៏មិនចង់បានសង្រ្គាមនេះដែរ។ ប្រជាជនអ៊ីស្រាអែលមិនចង់បានសង្រ្គាមនេះទេ»៕

ដោយ៖ ឈាង