រុស្ស៊ី ប្រកាសត្រៀមខ្លួនធ្វើសង្គ្រាមជាមួយ ណាតូ

ក្នុងជំនួបជាមួយក្រុមមន្ត្រីកំពូលៗនៅទីក្រុងមូស្គូកាលពីថ្ងៃចន្ទទី១៦ខែធ្នូឆ្នាំ២០២៤ រដ្ឋមន្ត្រីការពារជាតិរុស្ស៊ីលោក អាន់ដ្រេ បេលូសូហ្វ បានប្រកាសឲ្យប្រទេសត្រូវត្រៀមខ្លួនចំពោះសង្គ្រាមដោយផ្ទាល់ជាមួយអង្គការណាតូ ដែលអាចផ្ទុះឡើងនៅរយៈពេល១០ឆ្នាំខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT, លោកព្រមានថា ជម្លោះរវាងទីក្រុងមូស្គូនិងសហរដ្ឋអាមេរិកព្រមទាំងសម្ព័ន្ធមិត្តរបស់ពួកគេ នៅតែបន្តក្នុងទ្រង់ទ្រាយធំទៅៗ។ ដូច្នេះក្នុងលក្ខខណ្ឌបែបនេះ គោលដៅធំដែលក្រសួងការពារជាតិត្រូវធានាឲ្យបាន នោះគឺត្រូវត្រៀមខ្លួនឲ្យបានពេញលក្ខណៈសម្រាប់ការវិវត្តនៃស្ថានភាពដ៏អាក្រក់។

យ៉ាងណាក្តី រដ្ឋមន្ត្រីរូបនេះ បានស្តីបន្ទោសចំៗទៅលោកខាងលិចថា ជាអ្នកបង្កើនភាពតានតឹងនិងបញ្ឆេះសង្គ្រាម មិនមែនទីក្រុងមូស្គូទេ។ ជាក់ស្តែង លោកអះអាងថា ណាតូ នឹងដាក់ពង្រាយអង្គភាពមួយដែលមានកម្លាំង ១០០ ០០០ម៉ឺននាក់ នៅតាមបណ្តោយព្រំដែនភាគខាងលិចរបស់រុស្ស៊ីក្នុងរយៈពេល១០ថ្ងៃខាងមុខ, ដាក់ពង្រាយ ៣០០ ០០០នាក់នៅមួយខែទៀត និង ៨០០ ០០០នាក់នៅ ១៨០ថ្ងៃទៀត។

សេចក្តីប្រកាសនេះកើតឡើងមិនដល់មួយសប្តាហ៍ផង បន្ទាប់ពីប្រមុខអង្គការណាតូលោក Mark Rutte បានព្រមានចេញពីទីក្រុងព្រុចសែល នៃប្រទេសបែលហ្ស៊ិក ឲ្យរដ្ឋជាសមាជិកទាំងអស់ ត្រូវត្រៀមខ្លួនចំពោះការផ្ទុះសង្គ្រាមជាមួយរុស្ស៊ី ដែលអាចកើតឡើងក្នុងរយៈពេលពី៤ទៅ៥ឆ្នាំទៀត។

លោកថ្លែងថា «រុស្ស៊ីបានត្រៀមខ្លួនរួចហើយដើម្បីប្រឈមមុខជាមួយអ៊ុយក្រែននិងណាតូ ក្នុងរយៈពេលយូរ។ ដូច្នេះហើយ យើងត្រូវតែត្រៀមលក្ខណៈឲ្យបានរួចរាល់សម្រាប់សង្គ្រាមដែលអាចកើតឡើងក្នុងរយៈពេល៤ទៅ៥ឆ្នាំទៀត។ អ៊ីចឹង សមាជិកទាំងអស់ត្រូវងាកទៅរកផ្នត់គំនិតសម័យសង្គ្រាមវិញ ហើយចាំបាច់ណាស់ ត្រូវតែពង្រឹងការ​ចំណាយ​លើ​វិស័យ​ការពារជាតិនិងបង្កើនសមត្ថភាពកងទ័ព»។

ស្របពេលជាមួយគ្នានោះ លោក Rutte ក៏បានលើកឡើងពី គោលដៅចំណាយ២% នៃ GDP របស់ប្រទេសជាសមាជិកផងដែរ ដោយព្រមានថា សមាជិកទាំងឡាយ គួរចំណាយឲ្យចំគោលដៅ ព្រោះ បើថាយើងមិនចំណាយជាមួយគ្នាទេនោះ ពេលមានសង្គ្រាមផ្ទុះឡើង យើងអាចចំណាយលើសនេះទៀតដើម្បីប្រយុទ្ធក្នុងសង្គ្រាមនោះ ក៏អាចថាបាន។

ក្នុងឆ្នាំ២០១៤ សមាជិកសម្ព័ន្ធភាពមួយនេះ បានប្តេជ្ញាចំណាយយ៉ាងហោចណាស់ ២% នៃ GDP របស់ពួកគេជារៀងរាល់ឆ្នាំ លើវិស័យការពារជាតិ ប៉ុន្តែកាលពីឆ្នាំមុន សមាជិកភាគច្រើនមិនអាចបំពេញតាមគោលដៅបានឡើយ ហើយក្នុងចំណោមនោះ មានប្រទេសធំ២ ដែលមិនអាចបំពេញតាមគោលការណ៍បាន មួយគឺបារាំង និងមួយទៀតគឺអាល្លឺម៉ង់ ដែលសុទ្ធជាប្រទេសមហាអំណាចសេដ្ឋកិច្ចរបស់សហភាពអឺរ៉ុប និងជាសមាជិកស្ថាបនិកនៃសម្ព័ន្ធភាពនេះទៀតផង៕

អត្ថបទ៖ សុខ សុវណ្ណ

ចុចអាន៖ ប្រមុខណាតូ ព្រមានប្រទេសជាសមាជិក ឲ្យត្រៀមខ្លួនសម្រាប់សង្គ្រាមជាមួយរុស្ស៊ី