បើករថយន្ដបុកដើមឈើ ស្លាប់ម្នាក់ និងរបួស​២នាក់

រថយន្តTOYOTA PRIUS មួយគ្រឿង បើកបរក្នុងល្បឿលឿន ជ្រុលបុកដើមឈើមួយដើមបណ្តាលឱ្យបុរសម្នាក់បាត់បង់ជីវិត និង២នាក់ទៀតរងរបួស។ ហេតុការណ៍នេះ បានកើតឡើងកាលពីវេលាម៉ោង២និង១០នាទី រំលងអធ្រាត្រឈានចូលថ្ងៃទី២៣ ខែមករា ឆ្នាំ២០២៥ ស្ថិតនៅផ្លូវបេតុង១កន្លែង ក្នុងសង្កាត់បាក់ខែង ខណ្ឌជ្រោយចង្វារ រាជធានីភ្នំពេញ។

តាមសាក្សីនៅកន្លែងកើតហេតុបានឱ្យដឹងថា ខណៈរូបគាត់ជិះម៉ូតូឆ្លងកាត់ទីនោះបានឃើញរថយន្តខាងលើ បុកដើមឈើរួចបាត់ទៅហើយ ដោយរថយន្តនោះមានម៉ាក TOYOTA PRIUS ពណ៌ខ្មៅ ពាក់ស្លាកលេខភ្នំពេញ 2U-9582 រងការខូចខាតផ្នែកខាងមុខ និងមានមនុស្សប្រុសចំនួន៣នាក់ នៅក្នុងរថយន្ត។ ភ្លាមនោះអ្នកឃើញហេតុការណ៍បានទាក់ទៅសមត្ថកិច្ច និងរថយន្តសង្គ្រោះដើម្បីដឹកជនរងគ្រោះទៅមន្ទីរពេទ្យ ក្រោយរថយន្តសង្គ្រោះមកដល់ក្រុមគ្រូពេទ្យ ពិនិត្យថា បុរសម្នាក់បានបាត់បង់ជីវិតទៅហើយ។

បើតាមប្រភពផ្សេងទៀត បានឱ្យដឹងថា រថយន្តខាងលើ បានបើកចេញកម្មវិធីមួយនៅជាប់ផ្លូវជាតិ៦ បានបើកចូលមកផ្លូវបេតុងខាងក្នុងទិសដៅពីត្បូងទៅជើង លុះមកដល់ចំណុចកើហេតុ ដោយសារបើកលឿនផង និងស្ថានភាពផ្លូវងងឹតផង ក៏ជ្រុលបុកដើមអំពិលទឹកបារាំងតែម្តង។ ចំណែកមនុស្សនៅក្នុងរថយន្តមានម្នាក់ស្លាប់ ជាអ្នកអង្គុយនៅកៅអីខាងក្រោយ រីឯអ្នកបើករងរបួសស្រាល និងម្នាក់ទៀតជាអ្នកអង្គុយក្រោយដែររងរបួសធ្ងន់ ត្រូវបានរថយន្តសង្គ្រោះមន្ទីរពេទ្យកាល់ម៉ែត្រ បញ្ជូនទៅសង្គ្រោះ។

ក្រោយពេលកើតហេតុ សមត្ថកិច្ចមូលដ្ឋានទាក់ទងទៅកាន់សមត្ថកិច្ចជំនាញ វាស់វែងយករថយន្ដទៅរក្សាទុកជាបណ្តោះអាសន្ន ដើម្បីរង់ចាំភាគីខាងម្ចាស់រថយន្តមកទទួល រីឯសព ត្រូវបានក្រុមគ្រួសារមកទទួលយកទៅធ្វើបុណ្យតាមប្រពៃណី៕

អត្ថបទ៖ សំណាង