ការ​ប្រកួតកង់​​ជើង​ឯក​ជាតិ​ នៅកំពត​លើកដំបូង​ ទទួល​បាន​ការ​ចាប់​អារម្មណ៍ខ្លាំង

ការ​ប្រកួត​កីឡា​ទោចក្រ​យាន ជ្រើស​រើស​ជើង​ឯក​ថ្នាក់​ជាតិ ​ប្រចាំ​ឆ្នាំ​២០២៤ ​​បាន​បញ្ចប់​ទៅ​កាល​ពី​ថ្ងៃ​ទី​២៦ ខែ​មករា ឆ្នាំ​២០២៥ នៅ​ខេត្ត​កំពត​ ​ដោយ​ទទួល​បាន​ការ​ចាប់​អារម្មណ៍​ខ្លាំង​ពី​មហាជន​ដែល​​​ជំរុញ​ឲ្យ​ព្រឹត្តិការណ៍​ប្រព្រឹត្ត​ទៅ​បាន​យ៉ាង​រលូន។

លោក នូ ចំរើន អគ្គលេខាធិការ​នៃ​សហព័ន្ធ​កីឡា​ទោចក្រយាន​កម្ពុជា ​បាន​ឲ្យ​ដឹង​ថា ការ​ប្រកួត​ទោចក្រយាន​ ជ្រើស​រើស​ជើង​ឯក​ថ្នាក់​ជាតិ ប្រចាំ​២០២៤ ​​មាន​ការ​ចូល​រួម​ច្រើន​ពី​កីឡាករ កីឡាការិនី។ អត្តពលិក​មក​ពី​ក្លិប​ជាង​២០​ ទូទាំង​​រាជ​ធានី-ខេត្ត​ មាន​ដូច​ជា​​ខេត្ត​កំពត ព្រះ​សីហនុ  បន្ទាយមានជ័យ សៀមរាប ភ្នំពេញ កំពង់ឆ្នាំង និង​ខេត្ត​ជា​ច្រើន​ទៀត ព្រម​ទាំង​ក្រុម​ទោចក្រយាន​​មក​ពី​ក្រសួង​ការពារ​ជាតិ និង​ក្រសួង​មហា​ផ្ទៃ ក៏​បាន​ចូល​រួម។

លោក​អគ្គលេខាធិការ​បាន​បញ្ជាក់​ថា គោល​បំណងសំខាន់​នៃ​ការ​ប្រកួត​ជើង​ឯក​ថ្នាក់​ជាតិ​នេះ​គឺ​ដើម្បី​វាស់​ស្ទង់ និង​វាយ​តម្លៃ​ពី​កម្រិត​សមត្ថភាព និង​បច្ចេកទេស​របស់​កីឡាករ កីឡាការិនី។ ជា​ពិសេស​ក្រុម​ជម្រើស​ជាតិ​ដែល​បាន​ប្រមូលផ្តុំ​ហ្វឹក​ហាត់​យ៉ាង​ដិត​ដល់​កាល​ពី​ឆ្នាំ​២០២៤។ ការ​ធ្វើ​តេស្ត និង​វាយ​តម្លៃ​សមត្ថភាព​នេះ​គឺ​ដើម្បី​ត្រៀម​ខ្លួន​ចូល​រួម​ប្រកួត​កីឡា​ស៊ីហ្គេម លើក​ទី​៣៣ នា​ខែ​ធ្នូ ឆ្នាំ​២០២៥ នៅ​ប្រទេស​ថៃ។

នេះ​​ជា​លើក​ទី១​​ដែល​ការ​ប្រកួត​ទោចក្រយាន ថ្នាក់​ជាតិ​រៀប​ចំ​នៅ​ខេត្ត​កំពត​ដោយ​​បាន​ដំណើរ​ការ​ទៅ​យ៉ាង​​រលូន។ លោក នូ ចំរើន បាន​បន្ត​ថា ៖«ការ​រៀបចំ​នៅ​ខេត្ត​កំពត​លើក​ទី១​នេះ​​មាន​អំណោយ​ផល​ល្អ ទី​កន្លែង​ស្អាត​ ផ្លូវ​​ប្រកួត ​សុវត្ថិភាព និង​បរិយាកាសល្អ។ ជា​ពិសេស អាជ្ញា​ធរ​​ខេត្ត​បាន​ចូល​រួម​សហការ​យ៉ាង​ល្អ​​ក្នុង​ការ​រៀបចំ​។ ក្រៅ​ពី​ថ្នាក់​ដឹក​នាំ អាជ្ញាធរ​​ យើង​ឃើញ​មាន​​សិស្សានុសិស្ស​ មហា​ជន​​យ៉ាង​ច្រើន​កុះករ​បាន​ចូល​រួម​គាំទ្រ​លើក​ទឹក​ចិត្ត​ដល់​អត្តពលិក​ដែល​បាន​ជំរុញ​ឲ្យ​ការ​ប្រកួត​កាន់​តែ​ទាក់​ទាញ»។

លោក នូ ចំរើន ក្នុងនាម​អគ្គលេខាធិការ​តំណាង​ឲ្យ​សហព័ន្ធ​កីឡាទោចក្រយាន​កម្ពុជា​សូម​ថ្លែង​អំណរ​គុណ​ដល់​អាជ្ញា​ធរ​​ខេត្ត​គ្រប់​លំដាប់​ថ្នាក់ សិស្សានុសិស្ស មហាជន និង​ដៃគូសហការ​ឧបត្ថម្ភ Miracle city world group និងភេសជ្ជៈ Zummer ​ដែល​បាន​​ធ្វើ​ឲ្យ​​ព្រឹត្តិការណ៍​ប្រកួត​ប្រព្រឹត្ត​​បាន​យ៉ាង​ល្អ។

​ការប្រកួត​មាន​​កង់គួក​ចម្ងាយឆ្ងាយ ចាប់ផ្តើមចេញដំណើរពីខាងមុខសាលា ខេត្តកំពត និង​បញ្ចប់​ នៅរូបសំណាក់លោកយាយម៉ៅ លើភ្នំបូកគោ។ ការប្រកួត​វិញ្ញាសា​កង់ភ្នំ ចាប់ផ្តើមចេញដំណើរ និង​បញ្ចប់ នៅជើងភ្នំស ខេត្តកំពត និង​ការប្រកួត​វិញ្ញាសា​កង់គូក​ចម្ងាយខ្លី ចាប់ផ្តើមចេញដំណើរ និងបញ្ចប់​ នៅខាងមុខសាលា ខេត្តកំពត។

ការ​ប្រកួត​មាន​រយៈ​ពេល​៣​ថ្ងៃ​គិត​ចាប់​ពី​ថ្ងៃ​ទី​២៤ ដល់ទី​២៦ ខែ​មករា ក្នុង​នោះ​ពិធី​បើក​ជា​ផ្លូវ​ការ​នៅ​ព្រឹក​ថ្ងៃទី២៥ ខែមករា ដោយ​មាន​ការ​អញ្ជើញ​ចូល​រួម​ពី​ លោក អ៊ឹង ឆាយ អភិបាលរងខេត្ត​កំពត។

លទ្ធផល

វិញ្ញាសា​កង់គួក​បុរស (Men Road Master)

• លេខ​១ មេដាយ​មាស៖ កីឡាករ Vasco Ramsperger
• លេខ​២ មេដាយ​ប្រាក់៖ កីឡាករ ឆុន ភារម្យ
• លេខ​៣ មេដាយ​សំរិទ្ធ៖ កីឡាករ Koh Wai Kait

វិញ្ញាសាកង់គួក​បុរស (Men Road Junior)

• លេខ១ មេដាយ​មាស៖ សាត រីដេវីត
• លេខ២ មេដាយ​ប្រាក់៖ រ៉ាត់ ជា​ស៊ិន
• លេខ៣ មេដាយ​សំរិទ្ធ៖ សែ ឈៀងលី

វិញ្ញាសាកង់​គួកបុរស (Men Road Elite)

• លេខ​១ មេដាយ​មាស៖ ស្ព័រីយ៉េ ដាវីត
• លេខ​២ មេដាយ​ប្រាក់៖ អ៊ុង សុខណៃ
• លេខ​៣ មេដាយ​សំរិទ្ធ៖ យ៉ាត សុវណ្ណខេមរា

វិញ្ញាសា​កង់គួកបុរស (Men Road Criterium)

• លេខ១ មេដាយ​មាស៖ សាត រីដេវីត
• លេខ២ មេដាយ​ប្រាក់៖ អ៊ុង សុខណៃ
• លេខ៣ មេដាយ​សំរិទ្ធ៖ ស្ព័រីយ៉េ ដេវីត

អត្ថបទ៖ វីរបុត្រ