ពូទីន ដាក់បញ្ជា ត្រូវកម្ចាត់ទ័ពអ៊ុយក្រែនចេញពីតំបន់ Kursk ឲ្យបានលឿនបំផុត

ក្នុងដំណើរទស្សនកិច្ចលើកដំបូងទៅកាន់តំបន់ Kursk ចាប់តាំងពីអ៊ុយក្រែនបើកការវាយលុកទីនោះក្នុងខែសីហាឆ្នាំ២០២៤, មេដឹកនាំវិមានក្រឹមឡាំងលោក វ្ល៉ាឌីមៀរ ពូទីន បានចេញបញ្ជាឲ្យកងម្លាំង ត្រូវកម្ចាត់កងទ័ពអ៊ុយក្រែនដែលឈ្លានពានតំបន់នោះឲ្យបានលឿនបំផុត។

តាមការចុះផ្សាយរបស់ RT កាលពីថ្ងៃពុធទី១២ខែមីនាឆ្នាំ២០២៥ លោកពូទីន បានចុះទៅប៉ុស្តិ៍បញ្ជាការក្នុងតំបន់ Kursk ដោយជួបជាមួយមេទ័ពជាច្រើនរូប ហើយពិនិត្យរបាយការណ៍អំពីវឌ្ឍនភាពនៅលើសមរភូមិ។

លោកពូទីននិយាយថា «គោលដៅរបស់យើង គឺត្រូវកម្ចាត់សត្រូវនៅលើទឹកដី Kursk ឲ្យបានលឿនបំផុត ហើយទីក្រុងមូស្គូ នឹងពិចារណាបង្កើតតំបន់សន្តិសុខ នៅតាមបណ្តោយព្រំដែនជាមួយអ៊ុយក្រែន។ កងកម្លាំងអ៊ុយក្រែនដែលឈ្លានពានក្នុងតំបន់នេះ គួរតែចាត់ទុកជាភេរវករ រួមទាំងអ្នកប្រយុទ្ធដែលត្រូវបានចាប់ខ្លួននៅក្នុងតំបន់នោះផងដែរ»។

ទោះបីជាយ៉ាងណាក៏ដោយ លោកពូទីន មិនបានលើកឡើងពីបទឈប់បាញ់ដែលរៀបរៀងដោយអាមេរិក និងទទួលបានការឯកភាពពីភាគីអ៊ុយក្រែនរួចទៅហើយ នោះទេ។

ដំណើរទស្សនកិច្ចរបស់លោកពូទីន កើតឡើងចំពេលមានសេចក្តីរាយការណ៍ថា កងទ័ពរុស្ស៊ីកំពុងឡោមព័ទ្ធកម្លាំងអ៊ុយក្រែននៅតំបន់ Kursk ភាគខាងលិចប្រទេសរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាម​ការ​បញ្ជាក់​របស់​ប្រធាន​អគ្គសេនាធិការ​ចម្រុះលោក Valery Gerasimov, គិតត្រឹមពេលនេះ ទឹកដី៨៦%ត្រូវរំដោះបាន ហើយសត្រូវកំពុងបាក់ទ័ពយ៉ាងខ្លាំង។

សូមបញ្ជាក់ថា ប្រតិបត្តិការរបស់ទីក្រុងមូស្គូនៅតំបន់ Kursk កំពុងឈានចូលដល់ដំណាក់កាលចុងក្រោយហើយ ពោលគឺមានរយៈពេលប្រាំពីរខែ បន្ទាប់ពីអ៊ុយក្រែន បើកការវាយប្រហារដ៏គួរឲ្យភ្ញាក់ផ្អើល និងដណ្តើមបានផ្នែកមួយនៃទឹកដីរបស់ខ្លួន៕

អត្ថបទ៖ សុខ សុវណ្ណ

ចុចអាន៖ រុស្ស៊ី បោះពាក្យថា លក្ខខណ្ឌបទឈប់បាញ់គឺខ្លួនជាអ្នកកំណត់ មិនមែនសម្រេចដោយអាមេរិកទេ