មន្ត្រីជាន់ខ្ពស់កម្ពុជា អំពាវនាវឱ្យពលរដ្ឋទុកចិត្តលើរាជរដ្ឋាភិបាល ជុំវិញដំណោះស្រាយ​ការ​ដំឡើង​​ពន្ធរបស់អាមេរិក

លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម មានប្រសាសន៍ថា ការដំឡើងពន្ធ​របស់​លោកដូណាល់ ត្រាំ គឺជាវិធានការសេដ្ឋកិច្ច ដែលរដ្ឋបាលរបស់លោក ដូណាល់ ត្រាំ ព្យាយាម​ធ្វើតុល្យភាពជញ្ជីងពាណិជ្ជកម្មរបស់ខ្លួន ជាមួយដៃគូទាំង​​អស់នៅ​លើពិភពលោក មិនមែន​តែកម្ពុជានោះទេ។

លោកស្រីអំពាវនាវដល់សាធារណៈជនទាំងអស់កុំឱ្យមានការព្រួយបារម្ភ ឬសង្ស័យចំពោះដំ​ណោះស្រាយចំពោះមុខ ខណៈប្រមុខរាជរដ្ឋាភិបាលបានយកចិត្តទុកដាក់ខ្ពស់។

សូមឱ្យពល​រដ្ឋទុកចិត្តលើរាជរដ្ឋាភិបាលក្នុងការពារអត្ថប្រយោជន៍របស់ប្រជាពលរដ្ឋ ក៏ដូចជា​កម្មករកម្ម​ការិនី ពិសេសនៅក្នុងឧស្សាហកម្មដែលលេចធ្លោ។

លោកស្រីរដ្ឋមន្ត្រី បានថ្លែងថា៖ «សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា​បានដាក់​នូវ​វិធានការជាបន្ទាន់ ឱ្យលោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និង​ហិរញ្ញវត្ថុ និងជាប្រធានគណៈកម្មាធិការគោលនយោបាយសេដ្ឋកិច្ច ដឹកនាំកោះ​ប្រជុំជា​មួយ​ក្រសួងពាណិជ្ជកម្ម និងក្រសួងពាក់ព័ន្ធ និងវិស័យឯកជន ក្នុងការចូលរួមសិក្សា និង​លើក​យោ​បល់ជូនសម្ដេច ដើម្បីរៀបចំវិធានការឆ្លើយតប ហើយទិសដៅធំជំរុញពាណិជ្ជកម្មកម្ពុជា មិន​ថា​ជាមួយអាមេរិក និងដៃគូពាណិជ្ជកម្មផ្សេងៗ ទិសដៅធំគឺបន្តធ្វើពិពិធកម្ម និងការ​សហ​កា​រជាមួយគ្នានៅក្នុងមូលដ្ឋាននៃពាណិជ្ជកម្មអន្តរជាតិ ដោយមានច្បាប់ និងមានភាព​ច្បាស់​លាស់»។

នៅថ្ងៃទី០៣ខែមេសាឆ្នាំ២០២៥ ប្រធានាធិបតីអាមេរិក ដូណាល់ ត្រាំ បានប្រកាសពីការ​ដំឡើងពន្ធគយ ក្នុងនោះប្រទេសកម្ពុជា ស្ថិតក្នុងចំណោម​ដៃគូពាណិជ្ជកម្ម​ដែល​អាមេ​រិក​ យកពន្ធច្រើនបំផុតចំនួន ៤៩%។

លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា ការដំឡើង​ពន្ធ​របស់សហ​រដ្ឋអាមេរិក មិនប៉ះពាល់ ១០០% សម្រាប់វិស័យនាំចេញ​របស់កម្ពុជានោះទេ។

លោកថា ការដាក់ពន្ធនេះជាការដាក់ទូទាំងពិភពលោក គ្រាន់តែ​ដាក់​ក្នុង​អត្រាខុសគ្នា អាស្រ័យ​ទោះលើជញ្ជីងពាណិជ្ជកម្មរវាងអាមេរិក និងប្រទេសនីមួយៗតែប៉ុណ្ណោះ។

លោក ហេង សួរ បញ្ជាក់ថា កន្លងទៅកម្ពុជាក៏មានការបង់ពន្ធដែរ មិនមែនអត់បង់ពន្ធទាំងស្រុង តាមប្រព័ន្ធ GSP នោះទេ។ លោកប្រធានាធិបតី ត្រាំ ក៏បានដំឡើងពន្ធ ៤៦% លើប្រទេស​វៀត​ណាម និងដំឡើងពន្ធលើប្រទេសបង់ក្លាដែស​ក្នុងអត្រាមួយខ្ពស់ផងដែរ។​ អញ្ចឹងវាមិនបង្កឱ្យមានការលម្អៀងខ្លាំងលើថ្លៃដើមផលិតនៅកម្ពុជា ធៀបនឹងប្រទេសដទៃ​ដែល​ជា​ដៃ​គូប្រជែងយើងនោះទេ។

បើតាមលោក ហេង សួរ សម្រាប់ឆ្នាំ២០២៥នេះ ផលប៉ះពាល់គឺមិនមាននោះទេ ដោយសារ​ការបញ្ជាទិញសម្រាប់វិស័យកាត់ដែរ គឺមានមុនពេលដែលពន្ធត្រូវបានដាក់ ហើយការដាក់ពន្ធនេះគឺមិនមែនដាក់តែលើកម្ពុជានោះទេ គឺដាក់គ្រប់ប្រទេស​ដែលនាំចេញសម្លៀកបំពាក់។

ប្រសិនជាគេលុបចោលការបញ្ជាទិញ គេក៏ត្រូវបង់​ការពិន័យនៃការលុបចោល ដែលចំណាយដើមទុនច្រើនជាងថ្លៃបង់ពន្ធ។ ចំណែកវិស័យស្បែកជើង ការបញ្ជាទិញគឺភាគច្រើនគឺដាក់ ៣ឆ្នាំ ជាប់គ្នា។ ដូច្នេះការបញ្ជាទិញឆ្នាំនេះ គឺសម្រាប់ឆ្នាំ២០២៦ និង ២០២៧ផងដែរ។ ប៉ុន្តែឆ្នាំ២០២៧ អាចមានការបញ្ហាប្រឈមខ្លះ ប្រសិនជាស្ថានភាពពន្ធនេះមានការបន្ធូរបន្ថយចំពោះប្រទេសគេ ប៉ុន្តែមិនមានការបន្ធូរបន្ថយសម្រាប់កម្ពុជាយើង។

លោក ហេង សួរបន្ថែមថា ការនាំចេញរបស់យើងក្នុងរយៈពេល ៥ឆ្នាំ ជាប់ៗគ្នានេះ គឺទៅអឺរ៉ុប ច្រើនជាងអាមេរិក។ ដូច្នេះយើងមានលទ្ធភាពពង្រីកទីផ្សារអឺរ៉ុបបន្ថែមទៀត៕

អត្ថបទ៖ ឡេង ដេត