ខេត្តតាកែវទទួលបានភ្ញៀវទេសចរជាង១លាន​៧សែន​នាក់រយៈពេល៣ថ្ងៃ នៃពិធីបុណ្យចូលឆ្នាំថ្មី

តាមរបាយការណ៍របស់រដ្ឋបាលខេត្តតាកែវ ក្នុងរយៈពេល៣ថ្ងៃនៃពិធីបុណ្យចូលឆ្នាំប្រពៃណីជាតិខ្មែរចាប់ពីថ្ងៃទី១៤ ដល់ថ្ងៃទី១៦ សម្រាប់ខេត្តតាកែវទាំងមូលទទួលបានភ្ញៀវទេសចរចំនួន១,៧៨៣,៦៦៣ ក្នុងនោះភ្ញៀវទេសចរបរទេសចំនួន២,៧១៥ នាក់។ ក្នុងចំណោមភ្ញៀវទេសចរជាង១លាន៧សែននាក់ដែលមកទស្សនាខេត្តតាកែវ ក្រុងដូនកែវដែលរដ្ឋបាលខេត្តតាកែវបានរៀបចំតាកែវសង្ក្រាន្តឆ្នាំ ២០២៥ នៅសួនច្បារមាត់បឹងតាកែវ មានភ្ញៀវទេសចរជាតិ និងអន្តរជាតិបានមកចូលរួមមានកម្សាន្តចំនួនជាង ៨០ម៉ឺននាក់។

ដោយឡែកពាក់ព័ន្ធទៅនឹងសន្តិសុខសុវត្ថិភាពនៅក្នុងពិធីបុណ្យចូលឆ្នាំរយៈពេល៣ថ្ងៃនេះ ត្រូវបានលោកឧត្តមសេនីយត្រី សេង មហា មេបញ្ជាការកងរាជអាវុធហត្ថខេត្តតាកែវបានថ្លែងឲ្យដឹងថា បញ្ហាសន្តិសុខ និងសុវត្ថិភាពជូនប្រជាពលរដ្ឋនៅក្នុងពិធីបុណ្យចូលឆ្នាំរយៈពេល ៣ថ្ងៃនេះ គឺកម្លាំងសមត្ថកិច្ចបានខិតខំប្រឹងប្រែងថែរក្សាបានយ៉ាងល្អប្រសើរតែទោះបីជាយ៉ាងណាក៏ដោយនៅមានបញ្ហាតិចតួចបានកើតឡើងដូចជាការបាត់ទូរសព្ទការវង្វេងក្មេងក៏ប៉ុន្តែសមត្ថកិច្ចបានជួយអន្តរាគមន៍ទាន់ពេលវេលា៕

អត្ថបទ៖ វីរ: