ព័ត៌មានអន្ដរជាតិ

IMF បារម្ភពីបំណុលសាធារណៈរបស់ថៃ លើសពីអត្រាមធ្យមអាស៊ាន

បានផុស

១ year មុន

នៅ

ថ្ងៃព្រហស្បតិ៍ ២៤ មេសា ២០២៥

ដោយ

មូលនិធិរូបិយវត្ថុអន្តរជាតិ (IMF) លើកឡើងពីការព្រួយបារម្ភជុំវិញកំណើននៃបំណុលសាធារណៈរបស់ប្រទេសថៃ ដែលលើសពីអត្រាមធ្យម ៦០ ភាគរយ របស់អាស៊ាន ដោយណែនាំឱ្យមានការគ្រប់គ្រងសារពើពន្ធដោយប្រុងប្រយ័ត្ន។ នេះបើតាមការចុះផ្សាយរបស់កាសែត The Nation នៅថ្ងៃព្រហស្បតិ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រួយបារម្ភធ្វើឡើង ក្រោយ IMF បានចេញរបាយការណ៍ទស្សនវិស័យសេដ្ឋកិច្ចពិភពលោក ដោយព្យាករថា សេដ្ឋកិច្ចសកលនឹងកើនឡើងត្រឹមតែ ២,៨ ភាគរយ ប៉ុណ្ណោះ ដោយសារតែភាពតានតឹងពាណិជ្ជកម្ម និងភាពមិនប្រាកដប្រជាសកល។

អំឡុងសន្និសីទសារព័ត៌មានស្តីពីការតាមដានសារពើពន្ធឆ្នាំ ២០២៥ កាលពីថ្ងៃពុធ IMF ក៏បានចេញផ្សាយទស្សនវិស័យសារពើពន្ធជាសាកលរបស់ខ្លួនផងដែរ ដោយបានបង្ហាញពីនិន្នាការកើនឡើងនៃបំណុលសាធារណៈសកល ហើយបានសម្តែងការព្រួយបារម្ភថា បំណុលសាធារណៈធៀបនឹងផលិតផលក្នុងសរុប (GDP) របស់ប្រទេសថៃ គឺខ្ពស់ជាងមធ្យមភាគអាស៊ាន។

អនុប្រធាននាយកដ្ឋានកិច្ចការសារពើពន្ធរបស់ IMF លោកស្រី Era Dabla-Norris បានកត់សម្គាល់ថាលក្ខខណ្ឌសារពើពន្ធមានភាពខុសប្លែកគ្នាយ៉ាងខ្លាំងនៅទូទាំងបណ្តាប្រទេសអាស៊ាន ដោយតំបន់នេះជាទូទៅរក្សាបាននូវអនុបាតបំណុលធៀបនឹង GDP ទាបជាងប្រទេសមានទីផ្សារកំពុងរីកចម្រើនផ្សេងទៀត។

យ៉ាងណាមិញ បំណុលសាធារណៈធៀបនឹង GDP របស់ប្រទេសថៃ មានច្រើនជាង ៦០ ភាគរយ ដែលខ្ពស់ជាងកម្រិតរបស់អាស៊ានបន្តិច។ ដូច្នេះ IMF ណែនាំរដ្ឋាភិបាលថៃ ឱ្យអនុវត្តគោលនយោបាយសារពើពន្ធដោយប្រុងប្រយ័ត្ន និងមានប្រសិទ្ធភាព។

លោកស្រី Dabla-Norris បាននិយាយយ៉ាងដូច្នេះថា៖ «ជាមធ្យម បណ្តាប្រទេសអាស៊ានមានអនុបាតបំណុលធៀប GDP ទាបជាងប្រទេសកំពុងរីកចម្រើន និងកំពុងអភិវឌ្ឍដទៃទៀត។ ប៉ុន្តែក្នុងប្រទេសថៃ កម្រិតបំណុលគឺខ្ពស់ជាងអត្រាមធ្យមរបស់អាស៊ាន ដែលលើសពី ៦០ ភាគរយ នៃផលិតផលក្នុងស្រុកសរុប»។

រដ្ឋមន្ត្រីក្រសួងហិរញ្ញវត្ថុថៃ លោក Pichai Chunhavajira បាននិយាយថា ដោយមើលឃើញពីស្ថានភាពសេដ្ឋកិច្ចក្នុងស្រុកនាពេលបច្ចុប្បន្ន រដ្ឋាភិបាលថៃកំពុងរៀបចំផែនការជំរុញសេដ្ឋកិច្ចទ្រង់ទ្រាយធំ ដែលរំពឹងថានឹងលើសពី ៥០០ ប៊ីលានបាត។ ការជំរុញនេះ នឹងផ្តោតលើវិស័យសំខាន់ៗចំនួន ៣ រួមមាន ការជំរុញការចំណាយរបស់អ្នកប្រើប្រាស់ ការជំរុញការវិនិយោគក្នុងស្រុក និងការផ្តល់នូវប្រាក់កម្ចីមានអត្រាការប្រាក់ទាប។

លោកបានពន្យល់ថា៖ «ប្រទេសជាច្រើនមានបំណុលខ្ពស់ ប៉ុន្តែអ្វីដែលសំខាន់នោះ គឺរបៀបដែលថវិកាត្រូវបានប្រើប្រាស់។ ប្រសិនបើវាជំរុញកំណើនសេដ្ឋកិច្ចឱ្យបានគ្រប់គ្រាន់ នោះអនុបាតបំណុលធៀប GDP នឹងថយចុះ»៕

សេចក្ដីជូនដំណឹង១ សប្តាហ៍ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា