ព័ត៌មានអន្ដរជាតិ

Modi ប្តេជ្ញាតាមចាប់អ្នកវាយប្រហារនៅកាស្មៀរដល់ជើងមេឃ និងចោទប្រកាន់ប៉ាគីស្ថាន

បានផុស

១ year មុន

នៅ

ថ្ងៃសុក្រ ២៥ មេសា ២០២៥

ដោយ

នាយករដ្ឋមន្ត្រីឥណ្ឌាប្តេជ្ញាតាមចាប់អ្នកវាយប្រហារនៅតំបន់កាស្មៀរដែលបានបាញ់សម្លាប់អ្នកទេសចរយ៉ាងសាហាវ រហូតដល់ជើងមេឃ និងចោទប្រកាន់ប៉ាគីស្ថានថា គាំទ្រការវាយប្រហារនេះ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី២៥ខែមេសានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយករដ្ឋមន្ត្រីឥណ្ឌា លោក Narendra Modi បាននិយាយនៅក្នុងសុន្ទរកថាលើកដំបូងរបស់លោកក្នុងអំឡុងទស្សនកិច្ចនៅរដ្ឋ Bihar ចាប់តាំងពីការវាយប្រហារនៅក្នុងតំបន់ហិម៉ាឡៃថា៖«ខ្ញុំនិយាយទៅកាន់ពិភពលោកទាំងមូលថា ឥណ្ឌានឹងកំណត់អត្តសញ្ញាណ តាមដាន និងដាក់ទណ្ឌកម្មរាល់ភេរវករ និងអ្នកគាំទ្រពួកគេ។ យើងនឹងដេញតាមពួកគេរហូតដល់ចុងផែនដី ។ លោកក៏បានចោទប្រកាន់ប៉ាគីស្ថានថាគាំទ្រ «អំពើភេរវកម្មឆ្លងដែន»ផងដែរ។

លោក Modi ក៏បាននិយាយដែរថា៖«ខ្ញុំនិយាយយ៉ាងច្បាស់លាស់ថា អ្នកណាដែលបានធ្វើការវាយប្រហារនេះ នឹងត្រូវតបស្នងលើសពីការគិតរបស់ពួកគេ»។ លោកបន្ថែមថា «មិនថាដីតូចប៉ុណ្ណាដែលមានភេរវករទាំងនេះ ពេលនេះវាជាពេលវេលាដើម្បីកម្ទេចពួកវាទៅជាធូលី។ ប្រជាជនឥណ្ឌា ១.៤ ពាន់លាននាក់នឹងបំបែកឆ្អឹងខ្នងភេរវករទាំងនេះ»។

ជាមួយគ្នានេះលោក Modi ក៏បានដឹកនាំការស្មឹងស្មាធិ៍រយៈពេលពីរនាទីឧទ្ទិសទៅដល់អ្នកដែលត្រូវបានសម្លាប់ ដែលក្នុងនោះមានម្នាក់ជាជនជាតិឥណ្ឌា។

គួររម្លឹកថា កាលពីថ្ងៃពុធទី២៣ខែមេសាឆ្នាំ២០២៥ ខ្មាន់កាំភ្លើងបានបើកការវាយឆ្មក់ បាញ់ប្រហារយ៉ាងរន្ធត់ទៅលើទេសចរដែលនាំគ្នាទៅលេងក្រុង Pahalgam នៃតំបន់កាស្មៀរខាងគ្រប់គ្រងដោយប្រទេសឥណ្ឌា បណ្តាលឲ្យស្លាប់ចំនួន២៦នាក់។

ដ្បិតមិនទាន់មានក្រុមណាចេញមុខអះអាងទទួលខុសត្រូវ ប៉ុន្តែប៉ូលិសឥណ្ឌាហ៊ានអះអាថា ខ្មាន់កាំភ្លើងមានគ្នា៣នាក់ ជាសមាជិកនៃក្រុមសកម្មប្រយុទ្ធ Lashkar-e-Taiba (LeT) ដែលមានមូលដ្ឋាននៅប្រទេសប៉ាគីស្ថាន។ប៉ូលិសឥណ្ឌាបានប្រកាសផ្តល់ប្រាក់រង្វាន់ចំនួនពីរលានរូពី (២៣៥០០ដុល្លារអាមេរិក) សម្រាប់ព័ត៌មានដែលនាំទៅដល់ការចាប់ខ្លួនចំណាប់ខ្មាំងម្នាក់ៗទៀតផង។

ឆ្លើយតបទៅនឹងការវាយប្រហារកងទ័ពឥណ្ឌាបានបើកប្រតិបត្តិការតាមប្រមាញ់ខ្មាន់កាំភ្លើងយ៉ាងទូលំទូលាយដោយមនុស្សមួយចំនួនធំត្រូវបានឃុំខ្លួននៅក្នុងប្រតិបត្តិការនេះ និងទាហានម្នាក់ត្រូវបានសម្លាប់កាលពីថ្ងៃព្រហស្បតិ៍នៅក្នុងការប៉ះទង្គិចជាមួយខ្មាន់កាំភ្លើងនៅ Basantgarh ក្នុង តំបន់កាស្មៀរ ។

គួរបញ្ជាក់ថាពួកក្រុមឧទ្ទាមបានធ្វើសកម្មភាពបះបោរនៅតំបន់កាស្មៀរដែលគ្រប់គ្រងដោយឥណ្ឌាចាប់តាំងពីឆ្នាំ១៩៨៩ មកម្លេះដោយទាមទារឯករាជ្យ ឬការរួមបញ្ចូលគ្នាជាមួយប៉ាគីស្ថាន។

កាលពីឆ្នាំ២០១៩ ក៏មានការវាយប្រហារសម្លាប់ទាហានឥណ្ឌាចំនួន ៤១ នាក់នៅតំបន់កាស្មៀរ និងបានបង្កឱ្យមានការវាយប្រហារតាមអាកាសរបស់ឥណ្ឌានៅខាងក្នុងប៉ាគីស្ថាន៕