វឿន វាសនា បាន​ក្លាយ​ជាកីឡាករបាល់ទះមានប្រជាប្រិយភាពបំផុតនៅតៃវ៉ាន់

កីឡាករបាល់ទះជម្រើសជាតិ កម្ពុជា និងបច្ចុប្បន្នជាកីឡាកររបស់ក្លិប Win Streak វឿន វាសនា ត្រូវបានគេចាត់ទុកជាកីឡាករ ដែលមានប្រជាប្រិយភាពបំផុតនៅ កោះតៃវ៉ាន់។

កីឡាករបាល់ទះឆ្នើមកម្ពស់ ១.៩៨ ម៉ែត្រមកពីខេត្ត បាត់ដំបង រូបនេះបានចូលរួមជាមួយក្លិប Win Streak កាលពីឆ្នាំ ២០២៣ ខណៈក្នុងការលេងនៅទីនេះ ២ រដូវកាលកន្លងមក វាសនា បានជួយឱ្យក្លិប ដែលមានមូលដ្ឋាននៅទីក្រុង Taichung ឈ្នះពាន​លីគ TVL ពីរ​ឆ្នាំជាប់ៗគ្នា។ រូបគេបានឈ្នះពានឯកត្តជនដល់ទៅ ៣ ម្នាក់ឯង បន្ទាប់ពីជួយឱ្យ Win Streak ឈ្នះពាន TVL រដូវកាល ២០២៤-២០២៥។

វឿន វាសនា បច្ចុប្បន្នទទួលបានប្រជាប្រិយភាពខ្លាំងមែនទែននៅ តៃវ៉ាន់។ ជាក់ស្តែងសូម្បីការប្រកួតប្រជែងក្នុងពានរង្វាន់ Win Streak Volleyball Invitational 2025 ដែលទើបបញ្ចប់ថ្មីៗនេះ រូបគេត្រូវបានកម្មវិធីទាំងមូលដាក់រូបតំណាងធំជាងគេនៅលើបដាផ្សព្វផ្សាយតែម្តង ហើយរូបរបស់​កីឡាករ​កម្ពុជា​រូប​នេះ​ក៏ត្រូវបានផ្សព្វផ្សាយពេញដងវិថី​​នានា​នៅទីក្រុង Taichung ផងដែរ។

ចំណែកក្នុងពេលថ្មីៗនេះវិញ វឿន វាសនា បានចូលរួមក្នុងកម្មវិធីមួយ ហើយត្រូវបានអ្នកគាំទ្រ​ទាំង​បុរស និង​នារី​ជាច្រើន​បាន​ចោម​រោម​​សុំ​ឲ្យ​ចុះ​ហត្ថលេខា ដែលបញ្ជាក់ពីការគោរពស្រឡាញ់ និងការគាំទ្ររបស់ពួកគេទៅលើកីឡាករកម្ពុជារូបនេះ។

គួរដឹងថា វឿន វាសនា គឺជាកីឡាករដ៏សំខាន់បំផុតម្នាក់របស់ Win Streak បច្ចុប្បន្ន ហើយបើតាមអ្វីដែលលោក អាំង សិរីពិសិដ្ឋ អគ្គលេខាធិការ និង​ជា​អនុប្រធាន​សហព័ន្ធ​កីឡា​បាល់ទះ​កម្ពុជា​ ធ្លាប់បញ្ជាក់ គឺរូបគេទទួលបានប្រាក់ពលកម្មនៅទីនោះចំនួនជិត ២០ ម៉ឺនដុល្លារអាមេរិកក្នុងមួយ​ឆ្នាំ៕

អត្ថបទ៖ សេម កុសល