រុស្ស៊ី វាយប្រហារទូទាំងប្រទេសអ៊ុយក្រែន សម្លាប់មនុស្ស ៨នាក់ និងបង្កការបំផ្លិចបំផ្លាញធ្ងន់ធ្ងរ

យោងតាមសេចក្តីរាយការណ៍របស់ BBC នៅថ្ងៃអាទិត្យទី២៥ខែឧសភាឆ្នាំ២០២៥ រុស្ស៊ីបានបើកការវាយប្រហារទ្រង់ទ្រាយធំ នៅទូទាំងប្រទេសអ៊ុយក្រែន ដែលជាលទ្ធផលបណ្តាលឲ្យមនុស្សចំនួន៨នាក់ បាត់បង់ជីវិត និង៣០នាក់រងរបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីរាយការណ៍ខាងលើបន្តថា ក្នុងចំណោមមនុស្សស្លាប់ទាំងអស់ គឺមាន៤នាក់នៅក្នុងតំបន់ Khmelnytskyi ភាគខាងលិច, ៣នាក់ក្នុងទីក្រុងកៀវ និងម្នាក់នៅទីក្រុង Mykolaiv​ ភាគខាងត្បូង។

ក្រៅពីមនុស្សស្លាប់ហើយនោះ, អភិបាលតំបន់ Khmelnytskyi លោក Serhiy Tyurin បានបញ្ជាក់លើ Facebook ថា ផ្ទះ៦ខ្នងត្រូវខ្ទេចទាំងស្រុង ខណៈ២០ខ្នងទៀត រងរបួសការខូចខាត។

ការវាយប្រហារនេះកើតឡើងពីរថ្ងៃប៉ុណ្ណោះ បន្ទាប់ពីរុស្ស៊ី-អ៊ុយក្រែន ដោះដូរអ្នកទោសទ្រង់ទ្រាយធំបំផុត គិត​ចាប់តាំងពី​សង្គ្រាម​​​ផ្ទុះ​ឡើង​ក្នុងខែកុម្ភៈ​ឆ្នាំ​២០២២។

កាល​ពី​ថ្ងៃ​សុក្រ​ទី​២៣​ខែ​ឧសភា ភាគីនីមួយៗបានដោះលែង​មនុស្ស​ចំនួន ៣៩០​នាក់ ដែលរួមមានបុគ្គលិកយោធាចំនួន ២៧០​នាក់ និងជនស៊ីវិល ១២០​នាក់នៅក្នុងដំណាក់កាលដំបូងនៃកិច្ចព្រមព្រៀងផ្លាស់ប្តូរ​អ្នក​ទោស​​សរុប​ចំនួន ២ ០០០​នាក់​ពី​ភាគី​ទាំង​ពីរ​។

ការដោះដូរ​នេះ ធ្វើឡើងបន្ទាប់ពី​កិច្ច​ចរចាដោយផ្ទាល់នៅទីក្រុងអ៊ីស្តង់ប៊ុល នៃប្រទេសតួកគី ដែលជា​កិច្ចសន្ទនាដ៏សំខាន់លើកដំបូងរវាង​ប្រជាជាតិ​ទាំង​ពីរ​ក្នុងរយៈពេលបីឆ្នាំ។

ដ្បិតគ្មានបទឈប់បាញ់ត្រូវបានបង្កើតឡើងក្នុងអំឡុងពេលកិច្ចចរចានោះក៏ដោយ ប៉ុន្តែការដោះដូរអ្នកទោសនេះ គឺតំណាង​ឲ្យ​កាយវិការមនុស្សធម៌ដ៏គួរ​ឲ្យ​កត់សម្គាល់ចំពេល អរិភាពកំពុងបន្ត៕

អត្ថបទ៖ សុខ សុវណ្ណ

ចុចអាន៖ ត្រាំ កំពុងរៀនសូត្រ ពីសង្គ្រាមដ្រូន រវាង រុស្ស៊ីនិងអ៊ុយក្រែន