ត្រាំ កំពុងរៀន​សូត្រ​ ពី​សង្គ្រាម​ដ្រូន​ រវាង ​រុស្ស៊ី​និងអ៊ុយក្រែន

ក្នុងសុន្ទរកថាទៅកាន់និស្សិតបញ្ចប់ការសិក្សា នៅបណ្ឌិតសភាយោធា West Point ក្នុងទីក្រុងញូវយ៉ក ប្រធានាធិបតីអាមេរិក ដូណាល់ ត្រាំ បាននិយាយថា លោកកំពុងរៀនសូត្រពីយុទ្ធសាស្រ្តថ្មីនៃសង្គ្រាមរុស្ស៊ី-អ៊ុយក្រែន ជាពិសេសគឺពាក់ព័ន្ធនឹងការប្រើដ្រូនច្បាំងគ្នាតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាការពិត ក្នុងសង្គ្រាមនេះ ដ្រូនបានក្លាយជាអាវុធដែលភាគីទាំងសងខាង ប្រើញឹកញាប់បំផុត ដើម្បីវាយប្រហារលើគ្នាទៅវិញទៅមក ខុសពីសង្គ្រាមផ្សេងៗ។

ជុំវិញរឿងនេះ លោក ត្រាំ លើកឡើងថា៖ «សហរដ្ឋអាមេរិក កំពុងសិក្សាយ៉ាងសកម្មនិងល្អិតល្អន់ជាទីបំផុតចំពោះយុទ្ធសាស្រ្តថ្មីនេះ ព្រោះវាជាទម្រង់ខុសប្លែក។ យើងឃើញដ្រូនហោះចេញពីគ្រប់មុំ ជាមួយល្បឿនដ៏លឿននិងវាយប្រហារចំគោលដៅជាក់លាក់។ យើងមិនដែលឃើញរឿងបែបនេះពីមុនទេ ដូច្នេះយើងកំពុងរៀនសូត្រពីវា»។

ទន្ទឹមនោះ លោកអំពាវនាវដល់និស្សិតទាំងឡាយ ត្រូវមានភាពក្លាហានហ៊ានប្រថុយនិងធ្វើអ្វីៗផ្សេងពីគ្នា ដើម្បីតាមឲ្យទាន់សម័យកាលក្នុងវិស័យតាក់ទិកនិងយុទ្ធសាស្ត្រយោធា។

សូមជម្រាបថា ដ្រូនបានក្លាយជាអាវុធដ៏សំខាន់មួយ នៅក្នុងជម្លោះរុស្ស៊ី-អ៊ុយក្រែន ដោយវាបានផ្លាស់ប្តូរយុទ្ធសាស្ត្រយោធានិងសក្ដានុពលសមរភូមិ។

ព្រឹត្តិការណ៍ធំមួយបានកើតឡើងកាលពីថ្ងៃទី២៤ខែឧសភាឆ្នាំ២០២៥ ដោយរុស្ស៊ីបើកការវាយប្រហារតាមអាកាសលើទីក្រុងកៀវ ជាមួយដ្រូន Shahed ប្រមាណ២៥០គ្រឿង ព្រមទាំងមីស៊ីលផ្លោង១៤គ្រាប់ផងដែរ បណ្តាលឲ្យជនស៊ីវិល១៥នាក់រងរបួស និងបង្កការខូចខាតធ្ងន់ធ្ងរនៅសង្កាត់មួយចំនួន។

ជាការសងសឹក អ៊ុយក្រែនក៏បង្កើនប្រតិបត្តិការរបស់ខ្លួនវិញ ដោយបាញ់បង្ហោះដ្រូនប្រហែល៨០០គ្រឿង ចូលទៅក្នុងទឹកដីរុស្ស៊ីក្នុងរយៈពេល៧២ម៉ោងកន្លងមកនេះ៕

អត្ថបទ៖ សុខ សុវណ្ណ