ជិះម៉ូតូទាក់ដៃចង្កូតជាមួយអ្នកជិះបញ្ច្រាសផ្លូវ ដួលចូលក្រោមកង់រថយន្ដកិនស្លាប់ភ្លាមៗ

យុវជនម្នាក់ត្រូវបានរថយន្តដឹកទំនិញកិនបណ្ដាលឲ្យស្លាប់ភ្លាមៗនៅនឹងកន្លែង ខណៈពេលធើ្វដំណើរតាមផ្លូវមានម៉ូតូមួយគ្រឿងទៀតជិះបញ្ចៀសទិសទាក់ដៃចង្កូតដួលចូលក្រោមកង់រថយន្ត។

ហេតុការណ៍​នេះបាន​កេីត​ឡេីង​កាល​ពី​វេលា​ម៉ោង​៨និង១០នាទី​យប់​ ថ្ងៃ​ទី​២៦​ ខែ​ឧសភា​ ឆ្នាំ​២០២៥​ ស្ថិត​តាម​បណ្ដោយ​ផ្លូវ​២០០៤​ សង្កាត់​អូរបែកក្អម​ ខណ្ឌ​សែនសុខ​ រាជធានី​ភ្នំពេញ​។

បើតាមប្រភពពីកន្លែងកើតហេតុបានអោយដឹងថា មុនពេលកើតហេតុគេបានឃើញយុវជនរងគ្រោះជិះម៉ូតូមួយគ្រឿងម៉ាក Honda Dream ពណ៌ខ្មៅ ពាក់​ផ្លាក​លេខ​ ភ្នំពេញ​ 1JV-4882 ធើ្វដំណើរតែម្នាក់ឯងក្នុងទិសដៅពីលិចទៅកើត ខណៈមកដល់ចំណុចកើតហេតុមានម៉ូតូមួយគ្រឿងទៀតមិនចាំម៉ាកបើកបញ្ចៀសទិសចរាចរណ៍ បានទាក់ដៃចង្កូតជាមួយជនរងគ្រោះបណ្ដាលឲ្យដួលចូលក្រោមកង់រថយន្តដឹកទំនិញពាក់​ផ្លាក​លេខ​ ភ្នំពេញ​ 3D-6678 ផ្នែកខាងក្រោមកិនស្លាប់ភ្លាមៗនៅនឹងកន្លែងកើតហេតុ។

បើតាមការបញ្ជាក់ពីអ្នករួមដំណើរជាមួយរថយន្តដឹកទំនិញបានអោយដឹងថា គាត់មិនដឹងមានមនុស្សដួលចូលរថយន្តរបស់គាត់ទេ ដោយសារជនរងគ្រោះនៅពេលដួលគឺចូលកង់ក្រោយ បើដួលពីមុខរថយន្តគាត់អាចចាប់ហ្វ្រាំងទាន់។

ក្រោយ​ពេល​កេីត​សមត្ថកិច្ច​ជំនាញ​ចរាចរណ៍​ផ្លូវ​គោក​នៃ​ស្នងការដ្ឋាន​នគរបាល​រាជធានី​ភ្នំពេញ​ចុះ​មក​ធ្វើ​ការ​វាស់​វែង​យក​រថយន្ត​ និង​ម៉ូតូ​ ទៅ​រក្សា​ទុក​រង់ចាំ​ការ​ដោះស្រាយ​នៅ​ពេល​ក្រោយ​។ ចំណែក​ឯ​សព​ជន​រងគ្រោះ​ប្រគល់​ឲ្យ​សាច់​ញាតិ​យកទៅ​ធ្វើ​បុណ្យ​តាម​ប្រពៃណី​៕

អត្ថបទ៖ ម៉េង