កង់ចំនួន ១២ គ្រឿង និង​សម្ភារសិក្សាចែកដល់សិស្ស​ក្រីក្រតំបន់ដាច់ស្រយាលក្នុងស្រុកសំបូរ

សិស្សសាលានៅតំបន់ដាច់ស្រយាល និងមានជីវភាពខ្វះខាតជួបការលំបាក ចំនួន ៧០នាក់ នៅសាលាបឋមសិក្សាអូរក្រសាំង និងបឋមសិក្សាខ្សាច់ម្កាក់ ក្នុងឃុំបឹងចារ ស្រុកសំបូរ ខេត្តក្រចេះ ទទួលបានកង់ចំនួន ១២ គ្រឿង និងសម្ភារមួយ​ចំនួន​​ពី​អាជ្ញាធរ​ស្រុកសំបូរ។

លោក គង់ មេត្តា អភិបាលស្រុកសំបូរបានឲ្យដឹងថា សិស្សានុសិស្សចំនួន ៧០នាក់ ដែលទទួលបាន​ការ​ចែក​សម្ភារ​មាននៅសាលាបឋមសិក្សាអូរក្រសាំង និងបឋមសិក្សាខ្សាច់ម្កាក់ ដែលស្ថិតនៅតំបន់ដាច់ស្រយាល និងមានការខ្វះខាត ក្នុងឃុំបឹងចារ ស្រុកសំបូរ ខេត្តក្រចេះ។

លោកអភិបាលស្រុក ក៏បានសួរសុខទុក្ខក្មួយៗសិស្សានុសិស្សដែលកំពុងជួបការលំបាក ធ្វើ​យ៉ាងណា​ត្រូវ​ខិតខំប្រឹងសិក្សា ដើម្បីក្លាយជាធនធានមនុស្សដ៏ល្អសម្រាប់សង្គមជាតិ។ ក្នុងពេលនោះផងដែរ ក្រុមការងាររួមទាំងលោកអភិបាលស្រុកក៏បានជួយជួសជុលដល់សាលារៀន ដែលមានសភាពចាស់ទ្រុឌទ្រោមបាក់បែក ដើម្បីសម្រួលដល់ការអប់រំសិក្សាដល់ប្អូនៗ ។

អំណោយចែកជូនដល់សិស្ស រួមទាំងលោកគ្រូអ្នកគ្រូ រួមមាន៖ ប៊ិច សៀវភៅ កាតាប ដែលជាអំណោយមនុស្សធម៌របស់សប្បុរសជន និងកង់ ចំនួន ១២គ្រឿង ជាអំណោយរបស់អង្គការ World Vision  ប្រចាំស្រុកសំបូរ ក្នុងកម្មវិធីសប្បុរសធម៌ការងារអប់រំ រួមទាំងមានការរៀបចំអាហារសាមគ្គី និងជួសជុលអគារសិក្សា ជូនដល់សិស្សានុសិស្ស ផងដែរ៕

អត្ថបទ៖ ប្រុញ វិធិន