ឥទ្ធិពលព្យុះភ្លៀងនៅរដ្ឋភាគខាងជើងឥណ្ឌា បណ្តាលឲ្យមនុស្ស ៧៨នាក់ស្លាប់

ចូលដល់ខែកក្កដានេះ ផ្នែកមួយចំនួននៃ​ពិភពលោកកំពុងរងការវាយប្រហារដោយគ្រោះធម្មជាតិសូម្បីនៅរដ្ឋតិចសាស់ សហរដ្ឋអាមេរិក។ យ៉ាងណា នៅឯប្រទេសឥណ្ឌាក្នុងទ្វីបអាស៊ីវិញ ក៏ត្រូវព្យុះភ្លៀងវាយប្រហារធ្ងន់ធ្ងរផងដែរ ខណៈគិតត្រឹមថ្ងៃចន្ទទី៧ តួលេខមនុស្សស្លាប់ដោយសារឥទ្ធិពលព្យុះភ្លៀងមូសុងក្នុងរដ្ឋ Himachal Pradesh ភាគខាងជើង បានកើនឡើងដល់៧៨នាក់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីរាយការណ៍របស់ Anadolu, មជ្ឈមណ្ឌលប្រតិបត្តិការគ្រាអាសន្នរបស់រដ្ឋនេះ អះអាងថា ក្រៅពីមនុស្សស្លាប់ នៅមានមនុស្ស១២១នាក់ទៀតរងរបួស និង៣៧នាក់កំពុងបាត់ខ្លួន។

ជុំវិញបញ្ហានេះ អាជ្ញាធរឥណ្ឌាបានបញ្ជូនកម្លាំងឆ្លើយតបគ្រោះមហន្តរាយជាតិ និងកងកម្លាំងឆ្លើយតបគ្រោះមហន្តរាយរដ្ឋទៅតំបន់សំខាន់ៗរួចហើយ ដើម្បីបើកប្រតិបត្តិការស្វែងរកនិងជួយសង្គ្រោះ ជាពិសេសនៅតំបន់ Mandi និង Kullu ដែលជាកន្លែងមានអ្នកបាត់ខ្លួនច្រើន។

ទន្ទឹមនោះ នាយកដ្ឋានឧតុនិយមឥណ្ឌា ក៏បានចេញការព្រមានពណ៌ក្រហម (កម្រិតខ្ពស់) ផងដែរសម្រាប់ស្រុក Mandi, Kangra និង Sirmaur ព្រោះបើតាមការព្យាករ ទីនោះនឹងប្រឈមជាមួយភ្លៀងធ្លាក់ខ្លាំងបំផុតនៅប៉ុន្មានថ្ងៃខាងមុខ។

សូមជម្រាបថា រដូវមូសុងនៅប្រទេសឥណ្ឌា តែងចាប់ផ្តើមក្នុងខែមិថុនា បន្តរហូតដល់ខែកញ្ញា ហើយក្នុងអំឡុងពេលនោះ វាតែងបង្កឲ្យមានព្យុះភ្លៀង ទឹកជំនន់រហ័ស និងបំណាក់ សម្លាប់មនុស្សរាល់ឆ្នាំ៕

អត្ថបទ៖ សុខ សុវណ្ណ

ចុចអាន៖ ទឹកជំនន់​នៅ​ភាគ​ខាងជើង​ឥណ្ឌា ឆក់យកជីវិត​មនុស្ស​​៣​នាក់ និង​បាត់​ខ្លួន​រាប់សិប​នាក់​