បេះតែបន្លែដាំ​​តាម​របងផ្ទះលក់ ​ស្រ្តី​ចំណាស់ៗ ៣ នាក់​រកចំណូល​​មួយ​ថ្ងៃ​​មិនក្រោម ៤ មុឺនរៀល ដោយមិនប្រើដើមទុន

បន្លែធម្មជាតិ ដែលដុះតាមព្រៃល្បោះឬដាំ​តាមរបងដីលំនៅដ្ឋាន បានក្លាយជាប្រភព​ចំណូលប្រចាំថ្ងៃរបស់ពលរដ្ឋ​​មួយ​ចំនួន​ដោយមិនចាំបាច់​ប្រើដើមទុន។ បន្លែធម្មជាតិដែល​​ពលរដ្ឋ​ដើរបេះប្រមូល​ដុះ​លូតលាស់ជាបន្តបន្ទាប់ ដើម្បីយកទៅលក់លើទីផ្សារជា​រៀងរាល់ថ្ងៃ។

រស់នៅក្នុងភូមិកូនខ្លុង នៃស្រុកមោងឫស្សី អ្នកស្រី សុីម ក្នុងវ័យ ៦៦ ឆ្នាំ បានឲ្យដឹងថា អ្នកស្រីអាចរកចំណូលបានចន្លោះពី ៤-៥ មុឺនរៀល គ្រាន់តែ​ដើរ​បេះបន្លែ​នៅក្រោយផ្ទះនិងតាមរបង ដែលអាច​ឲ្យអ្នកស្រី​អាច​រកកម្រៃបានយ៉ាងងាយ។

ស្រ្តី​រូបនេះ​បន្តថា បន្លែដែលអ្នកស្រីប្រមូលបានរាល់ថ្ងៃមានតែ ២ ប្រភេទដែល​ដុះខ្លួនឯងនោះគឺ ស្លឹកបាសនិងស្លឹកងប់ ដោយអ្នកស្រីប្រមូលឆ្លាស់គ្នា។

“ខ្ញុំពេលខ្លះដឹកទៅទីផ្សារលក់ខ្លួនឯង ត្រឹម ២ ទៅ ៣ ម៉ោងលក់អស់។ ថ្ងៃខ្លះមានអ្នកនៅជិតផ្សារមកលើកលក់បន្ត គឺស្រួលរកចំណូលបានប្រចាំថ្ងៃ ព្រោះទាំងគ្រួសារខ្ញុំក៏និយមស្លរស្លឹកបាសនិងស្លឹកងប់ដែរ ហើយវាក៏ជួយសុខភាពបានច្រើនទៀតផង”។

ចំណែកអ្នកស្រី ចាន់ថា វ័យ ៧២ ឆ្នាំ រស់នៅក្នុងឃុំចែងមានជ័យ ស្រុកបាណន់ បានឲ្យដឹងដែរថា អ្នកស្រីរកកម្រៃបានចន្លោះ ពី ៥ ទៅ ៦ មុឺនរៀល ក្នុងមួយថ្ងៃ អាស្រ័យលើកម្លាំង បើប្រមូលបានច្រើនអាចបាន ៦ មុឺនរៀលក្នុងមួយថ្ងៃ។

ក្រៅពីស្លឹកបាស និងស្លឹកងប់ មានត្រួយម្រុំដែលអ្នកស្រីបានដាំតាមរបងផ្ទះ​​។ អ្នកស្រីបន្តថា “ការដើរប្រមូលបន្លែធម្មជាតិលក់ ជាការរកចំណូលបានយ៉ាងល្អបំផុត មិនចាំចាច់ទៅរកដើមទុនអីទេ វាបានលុយដោយងាយៗឲ្យតែយើងឧស្សាហ៍ ហើយកុំមើលរំលង ដោយបោះបង់ឬដើរបោចវាចោល នោះសុទ្ធតែជាផលប្រយោជន៍របស់យើង ក្នុងការរស់នៅប្រចាំថ្ងៃ ជាងដើរសុីឈ្នួលគេឆ្ងាយពីគ្រួសារ”។

ស្ត្រីវ័យ ៤៦ ឆ្នាំម្នាក់ទៀត រស់នៅក្នុងសង្កាត់រតន: ក្រុងបាត់ដំបង គឺអ្នកស្រី សួន នី ដែលមាន​កូនស្រីតូចៗក្នុងវ័យ សិក្សាចំនួន ៣ នាក់ទៀតក្នុង​បន្ទុក ក្រៅពីមើលថែកូន អ្នកស្រីអាចរកចំណូលបានពីការលក់បន្លែដែលមាននៅតាម​របង​ដីនិងដាំដុះ​ដោយខ្លួនឯងបន្តិចបន្តួចផង អាចរកថវិការបន្ទាប់បន្សំបានយ៉ាងហោចមួយព្រឹក ៣ មុឺនរៀលដែរ សម្រាប់ឲ្យកូនរៀនប្រចាំថ្ងៃ។ ក្នុង​នោះ​អ្នកស្រីថា មានដូចជាផ្កា ព្រលឹតនៅក្នុងស្រះក្រោយផ្ទះបន្តិច ស្លឹកបាសតាមរបងបន្តិច និងស្លឹក​ងប់បន្តិច ហើយថ្ងៃខ្លះក៏អាចរកបាន ៤ មុឺនរៀល ហើយក៏មិនលំបាកដែរព្រោះនៅមិនឆ្ងាយពីផ្សារប៉ុន្មានទេ។

បើតាមស្ត្រីវ័យចំណាស់ៗខាងលើបានបញ្ជាក់ថា ពួកគាត់រកចំណូលបាន តាមរយះបន្លែធម្មជាតិនេះ ស្របពេល​ដែល​ច្រកព្រំដែនត្រូវបានភាគីថៃបិទ ហើយបានផ្តាច់ការនាំចូលបន្លែ​ធ្វើ​ឲ្យតម្រូវការ​បន្លែសរីរាងធម្មជាតិមានទីផ្សារ​ដែល​​ធ្វើឲ្យពួកគាត់រកចំណូលបានជាប្រចាំថៃ។

បើតាមមន្ត្រីកសិកម្មខេត្តបាត់ដំបង​បាន​បញ្ជាក់ថា ស្លឹកបាសជាបន្លែម្យ៉ាងដែលងាយរកអាចដាំបានដោយងាយស្រួល គ្រាន់តែយកគ្រាប់ពីផ្លែទុំមកបណ្ដុះ ឬយកដើមចាស់ៗមកដោតនៅក្នុងដី និងស្រោចទឹកឱ្យបានញឹកញាប់ និង​យក​ឈើ​មក​ធ្វើជាបង្គោល ឬតាមរបងសំណាញ់សម្រាប់វៀរឡើងគឺឆាប់បានប្រមូលផលហើយ។ ចំណែកដើមងប់ក៏ងាយស្រួលដាំប្រហាក់ប្រហែលគ្នានិងដើមវល្លិ៍បាសដែរ។

បន្លែ២ប្រភេទនេះក៏ពេញនិយមរបស់ប្រជាជនទូទៅដែរសម្រាប់ផ្សំជាធាតុម្ហូបយ៉ាងឆ្ងុយឆ្ងាញ់ ហើយក្នុងនោះក៏វាបានផ្តល់នូវអត្ថប្រយោជន៍ដល់សុខភាពយ៉ាងច្រើនផងដែរ។ វល្លិ៍បាសក្រៅពីស្លឹករបស់វា ក៏អ្នកខ្លះអាចយកផ្លែធ្វើជាបន្លែដ៏មានរស ជាតិ ខណះបន្លែ២ប្រភេទនេះកាន់តែកាត់ឬបេះស្លឹកវា ក៏កាន់តែដុះលូតលាស់បន្ថែមយ៉ាឆាប់៕

អត្ថបទ÷សៅ សារិទ្ធ