ទីបំផុតដឹងមូលហេតុធ្លាក់យន្តហោះ Air india ដែលសម្លាប់មនុស្ស ២៦០នាក់ហើយ

យោងតាមការចេញផ្សាយរបស់ទីភ្នាក់ងារព័ត៌មាន​R euters នៅថ្ងៃទី១២ ខែ កក្កដា របាយការណ៍ថ្មីៗនេះបានលាតត្រដាងថា ភាពច្របូកច្របល់នៅក្នុងកាប៊ីនយន្ដហោះដែលបណ្ដាលមកពីកុងតាក់ប្រេងអាចនាំឱ្យមានសោកនាដកម្មធ្លាក់យន្តហោះ Air India កាលពីថ្ងៃទី ១២ ខែមិថុនា ដែលបានសម្លាប់មនុស្ស ២៦០ នាក់ទាំងអ្នកនៅលើដី។

គួររម្លឹកថាយន្តហោះ Boeing 787 Dreamliner កំពុងហោះហើរពីទីក្រុង Ahmedabad ប្រទេសឥណ្ឌា ទៅកាន់ទីក្រុងឡុងដ៍ប្រទេសអង់គ្លេស ប៉ុន្តែយន្តហោះនេះបានធ្លាក់ភ្លាមៗបន្ទាប់ពីហោះឡើង។ ការស៊ើបអង្កេតបានរកឃើញថា កុងតាក់ប្រេងម៉ាស៊ីនទាំងពីររបស់យន្តហោះត្រូវបានប្តូរពី «run» ទៅ «cutoff» ភ្លាមៗបន្ទាប់ពីយន្តហោះហោះចេញ។ សកម្មភាព​នេះ​បាន​កាត់ផ្តាច់​ប្រេងឥន្ធនៈ​ដល់​ម៉ាស៊ីន ដែល​បណ្តាល​ឱ្យ​យន្តហោះ​បាត់បង់​ថាមពល និង​ធ្លាក់​ចុះ។

របាយការណ៍នេះត្រូវបានចេញផ្សាយដោយការិយាល័យស៊ើបអង្កេតគ្រោះថ្នាក់យន្តហោះរបស់ប្រទេសឥណ្ឌា (AAIB) ដែលបាន​បង្ហាញ​ថា​មួយ​សន្ទុះ​មុន​ការ​ធ្លាក់ អ្នក​បើក​យន្តហោះ​ម្នាក់​បាន​សួរ​អ្នកបើកយន្តហោះម្នាក់​ទៀត​ថា «ហេតុ​អ្វី​បាន​ជា​អ្នក​ផ្តាច់​ប្រេង?»។ អ្នកបើកយន្តហោះទីពីរបានឆ្លើយថា អត់ទេ។ ក្រុមអ្នកស៊ើបអង្កេតមិនអាចបញ្ជាក់បានថាអ្នកបើកបរម្នាក់ណាជាអ្នកនិយាយអ្វីនោះទេ។

អ្នកជំនាញនិយាយថា វាមិនទំនងទេដែលកុងតាក់ទាំងនេះអាចបត់ដោយចៃដន្យ ខណៈមិនមានការសង្គ្រោះបន្ទាន់នៅលើយន្តហោះដែលតម្រូវឱ្យបិទម៉ាស៊ីននោះទេ។ ជាធម្មតា កុងតាក់ទាំងនេះត្រូវបានប្រើដើម្បីបិទម៉ាស៊ីនតែប៉ុណ្ណោះ បន្ទាប់ពីយន្តហោះបានចុះចត ឬអំឡុងពេលមានអាសន្នធ្ងន់ធ្ងរ ដូចជាភ្លើងឆេះម៉ាស៊ីនជាដើម។ ការ​បិទ​កុងតាក់​នៅ​ពេល​ដែល​យន្តហោះ​កំពុង​ឡើង​នោះ​នឹង​បណ្តាល​ឱ្យ​ម៉ាស៊ីន​ខូច​ភ្លាមៗ។

យ៉ាងណាអ្នកបើកយន្តហោះទាំងពីរនាក់សុទ្ធតែមានបទពិសោធន៍ ដោយអ្នកបើកយន្តហោះលោក Sumeet Sabharwal មានអាយុ ៥៦ ឆ្នាំ មានបទពិសោធន៍ហោះហើរជាង ១៥,០០០ ម៉ោង។ លោក​ក៏​ធ្លាប់​ធ្វើ​ជា​គ្រូ​បង្ហាត់​ជើង​ហោះ​ហើរ​ផង​ដែរ។ សហអ្នកបើកបររបស់គាត់ឈ្មោះ Clive Kunder មានអាយុ ៣២ ឆ្នាំក៏មានជើងហោះហើរច្រើនជាង ៣,៤០០ ម៉ោងផងដែរ។

បើតាមការស៉ើបអង្គេតមិនយូរប៉ុន្មានបន្ទាប់ពីការហោះឡើង ប្រព័ន្ធថាមពលបម្រុងហៅថា «ram air turbine» ត្រូវបានបន្លឺឡើងដែលវាកើតឡើងនៅពេលដែលម៉ាស៊ីនសំខាន់ៗឈប់ដំណើរការ។ យន្តហោះបានបាត់បង់រយៈកម្ពស់យ៉ាងលឿន ហើយបានធ្លាក់ចូលទៅក្នុងអគារនៅក្បែរព្រលានយន្តហោះ។ ក្នុង​ចំណោម​មនុស្ស​ទាំង​២៤២​នាក់​នៅ​លើ​យន្តហោះ មាន​តែ​ម្នាក់​ប៉ុណ្ណោះ​ដែល​បាន​រួច​ជីវិត ខណៈមនុស្ស ១៩នាក់ទៀតនៅលើដីក៏ត្រូវបានសម្លាប់ផងដែរ។

បន្ទាប់ពីការធ្លាក់យន្តហោះ អ្នកស៊ើបអង្កេតបានរកឃើញថា កុងតាក់ប្រេងឥន្ធនៈត្រូវបានផ្លាស់ប្តូរទៅទីតាំង «run» វិញ ដែលអាចមានន័យថា អ្នកបើកយន្តហោះបានព្យាយាមចាប់ផ្តើមម៉ាស៊ីនឡើងវិញភ្លាមៗ មុនពេលយន្តហោះធ្លាក់មកដី។ រហូតមកដល់ពេលនេះ របាយការណ៍នេះមិនបានស្តីបន្ទោសទៅលើក្រុមហ៊ុន Boeing ដែលជាក្រុមហ៊ុនផលិតយន្តហោះ ឬ ក្រុមហ៊ុនGE ដែលផលិតម៉ាស៊ីននោះទេ ខណៈក្រុមហ៊ុនទាំងពីរកំពុងគាំទ្រការស៊ើបអង្កេតនេះ។

ក្រុមហ៊ុន Air India ដែលបច្ចុប្បន្នគ្រប់គ្រងដោយក្រុមហ៊ុន Tata Group បានស្ថិតនៅក្រោមការត្រួតពិនិត្យជាសាធារណៈអំពីសុវត្ថិភាពយ៉ាងខ្លាំងចាប់តាំងពីការធ្លាក់យន្តហោះនេះ។ ក្រុមហ៊ុនអាកាសចរណ៍ក៏បានប្រឈមមុខនឹងកង្វល់សុវត្ថិភាពផ្សេងទៀតនាពេលថ្មីៗនេះផងដែរ ដូចជាការខកខានក្នុងការថែទាំទាន់ពេលវេលាលើយន្តហោះរបស់ខ្លួននិងការបំពានច្បាប់អំពីម៉ោងធ្វើការរបស់អ្នកបើកបរ។

កន្លងមកអាជ្ញាធរឥណ្ឌាសង្ឃឹមថានឹងពង្រីកឧស្សាហកម្មអាកាសចរណ៍របស់ប្រទេស និងធ្វើឱ្យប្រទេសឥណ្ឌាក្លាយជាមជ្ឈមណ្ឌលធ្វើដំណើរតាមផ្លូវអាកាសទូទាំងពិភពលោក ប៉ុន្តែគ្រោះថ្នាក់នេះបានបង្កឱ្យមានសំណួរធ្ងន់ធ្ងរអំពីសុវត្ថិភាពអាកាសចរណ៍។

ការស៊ើបអង្កេតការធ្លាក់យន្តហោះនេះនឹងនៅតែកំពុងបន្តដោយរបាយការណ៍ចុងក្រោយត្រូវបានរំពឹងទុកក្នុងរយៈពេលមួយឆ្នាំ ដោយផ្អែកលើទិន្នន័យពីប្រអប់ខ្មៅរបស់យន្តហោះ ដែលកត់ត្រាព័ត៌មានសំខាន់ៗនៃការហោះហើរ និងការសន្ទនារបស់អ្នកបើកបរ៕

អត្ថបទ៖ ប៊ុន សុភាព