ទីបំផុត ជប៉ុន សម្រេចដាក់​បញ្ចូល Ishikawa និងតារាឆ្នើមៗ លេងពាន Nations League ហើយ

ក្រុមបាល់ទះជម្រើសជាតិ ជប៉ុន បានសម្រេច​ដាក់​បញ្ចូល​កីឡាករឆ្នើមៗរបស់ខ្លួន ត្រៀមចូលប្រកួតព្រឹត្តិការណ៍ FIVB Men’s Volleyball Nations League ២០២៥ សម្រាប់សប្តាហ៍ទី ៣ ដែល​ជា​សប្តាហ៍​សន្សំពិន្ទុ​ចុង​ក្រោយ។

នៅក្នុងការប្រកួតសប្តាហ៍ទី ៣ នេះ ជប៉ុន បានផ្លាស់ប្តូរសមាសភាពកីឡាករមួយចំនួន។ ជាពិសេស កីឡាករឆ្នើមៗ ដែលមិនមានវត្តមានកាលពីសប្តាហ៍ទី ១ និងទី ២ ដូចជាអ្នកវាយផ្តាច់ Yuki Ishikawa, Ran Takahashi និងអ្នកលេងលីប៊ើរ៉ូ Tomohiro Yamamoto ឥឡូវនេះសុទ្ធតែត្រូវបានគ្រូបង្វឹកសញ្ជាតិ បារាំង Laurent Tillie បាន​ដាក់​បញ្ចូល​ក្នុងក្រុមជម្រើសជាតិហើយ។

ទោះបីជាយ៉ាងណា សមាជិកសំខាន់ម្នាក់ទៀត គឺអ្នកលេងតួនាទីស្មាត់ម្ចាស់អាវលេខ ១ Yuji Nishida នៅតែមិនទាន់មានឈ្មោះចូលប្រកួតក្នុងពាន FIVB Men’s Volleyball Nations League ២០២៥ នេះ ទោះរូបគេស្ថិតនៅក្នុងបញ្ជីឈ្មោះរបស់ក្រុមជម្រើសជាតិ ជប៉ុន សម្រាប់ការប្រកួតក្នុងឆ្នាំ ២០២៥ នេះក្តី។

គួរឱ្យដឹងថា ក្រុមជម្រើសជាតិ ជប៉ុន បច្ចុប្បន្នកំពុងឈរនៅលេខរៀងទី ៤ ក្នុងតារាងចំណាត់ថ្នាក់ ដោយឆ្លងកាត់ការប្រកួត ៨ ប្រកួតកន្លងមកកាលពីសប្តាហ៍ទី ១ និងទី ២ ពួកគេឈ្នះ ៥ ប្រកួត និងចាញ់ ៣ ប្រកួត មាន ១៥ ពិន្ទុ។

ចំណែកការប្រកួតក្នុងសប្តាហ៍ទី ៣ នេះ ពួកគេនឹងត្រូវជួបជាមួយក្រុមខ្លាំងចំនួន ៤ ដូចជា៖

• ក្រុមជម្រើសជាតិ អាល្លឺម៉ង់ នៅថ្ងៃទី ១៦ ខែ កក្កដា ឆ្នាំ ២០២៥
• ក្រុមជម្រើសជាតិ អាហ្សង់ទីន នៅថ្ងៃទី ១៧ ខែ កក្កដា ឆ្នាំ ២០២៥
• ក្រុមជម្រើសជាតិ ប្រេស៊ីល នៅថ្ងៃទី ១៨ ខែ កក្កដា ឆ្នាំ ២០២៥
• ក្រុមជម្រើសជាតិ អាមេរិក នៅថ្ងៃទី ២០ ខែ កក្កដា ឆ្នាំ ២០២៥៕

អត្ថបទ៖ សេម កុសល