កីឡា

ក្រុមជម្រើសជាតិបាល់ទះកម្ពុជា ការប្រមូលផ្ដុំត្រៀម Sea V Cup លើកនេះមានកីឡាករចាស់ៗច្រើន

បានផុស

៣៤ វិនាទី មុន

នៅ

ថ្ងៃព្រហស្បតិ៍ ៩ កក្កដា ២០២៦

ដោយ

សហព័ន្ធកីឡាបាល់ទះកម្ពុជា បន្ទាប់ពីបញ្ចប់ភារកិច្ចនៅតេជោលីគ រដូវកាលទី៣ រួចរាល់ហើយនោះក៏មានការប្រមូលផ្ដុំកីឡាករឡើងវិញភ្លាមៗផងដែរដើម្បីហ្វឹកហាត់ត្រៀមប្រកួតប្រជែងនៅ Sea V Cup ដែលនឹងធ្វើឡើងអំឡុងថ្ងៃទី១៥ ខែកក្កដា ឆ្នាំ២០២៦ ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិដ្ឋភាពប្រមូលផ្ដុំ

ការប្រមូលផ្ដុំកីឡាករបាល់ទះលើកនេះហាក់ភ្ញាក់ផ្អើលដល់អ្នកតាមដានវិស័យកីឡាមួយនេះផងដែរមានកីឡាករចាស់ៗជាច្រើនរូបដើម្បីពង្រឹងសមត្ថភាពក្រុមជម្រើសជាតិប្រជែងជាមួយប្រទេសខ្លាំងៗដូចជា ឥណ្ឌូណេស៊ី និងម្ចាស់ផ្ទះហ្វីលីពីន។

អំឡុងពេលហ្វឹកហាត់ប៉ុន្មានថ្ងៃមកនេះគេឃើញមានកីឡាករ សួន ចាន់ណារ៉ូ ខឹម សុវណ្ណដារ៉ា ធី ម៉េងហួង និងមួយចំនួនទៀតជាកីឡាករយុវជនចំណូលថ្មីដែលមានសមត្ថភាពលេចធ្លោកាលពីពានរង្វាន់ក្រឡាហោម និងតេជោលីគកាលពីពេលថ្មីៗនេះ។ ក្រៅពីនោះជាកីឡាករជម្រើសជាតិដែលជាប់ពីមុនៗមក។

កម្មវិធីនៅ Sea V Cup

វត្តមានកីឡាករចាស់ៗលើកនេះជាការកែសម្រួល និងបំពេញនូវចន្លោះខ្វះខាតរបស់ក្រុមជម្រើសជាតិបាល់ទះកម្ពុជាដែលមានកន្លងមក។ កម្ពុជាស្ថិតនៅក្នុងពូល A ដែលជួបសុទ្ធតែជាជើងខ្លាំង ដូច្នេះហើយទើបសហព័ន្ធព្យាយាមធ្វើយ៉ាងណាដើម្បីក្រុមជម្រើសជាតិមានសមត្ថភាពប្រសើរឡើងវិញ ព្រោះការប្រកួតនៅឆ្នាំមុននោះទទួលលទ្ធផលពុំល្អនោះឡើយ។

ទិដ្ឋភាពប្រមូលផ្ដុំ

បញ្ជាក់ដែរថា បច្ចុប្បន្ននេះសហព័ន្ធកីឡាបាល់ទះកម្ពុជាកំពុងធ្វើការប្រមូលផ្ដុំទាំងកីឡាករចាស់-ថ្មី ទ្រុងទ្រាយធំដែលមានចំនួនច្រើនផងដែរ។ សហព័ន្ធក៏មិនទាន់បញ្ជាក់ថាកីឡាកររូបណាខ្លះជាប់ឈ្មោះចុងក្រោយបានចេញទៅប្រកួតនៅ Sea V Cup នៅថ្ងៃទី១៥ ខែកក្កដា ឆ្នាំ២០២៦ នោះដែរ។ រង់ចាំមើលកីឡាកររូបណាខ្លះដែលអាចមានឈ្មោះប្រកួតក្នុងពានរង្វាន់អន្តរជាតិមួយនេះ៕