សេដ្ឋកិច្ច

អ្នកឧកញ៉ា សួរ វីរៈ ចង់ឱ្យប្រជាពលរដ្ឋញែកឱ្យដាច់រវាងផលិតផលក្នុងស្រុក និងផលិតផលនាំចូល

បានផុស

១០ ខែ មុន

នៅ

ថ្ងៃអង្គារ ១៩ សីហា ២០២៥

ដោយ

អ្នកឧកញ៉ា សួរ វីរៈ អគ្គនាយកក្រុមហ៊ុន វិរៈ ប៊ុនថាំ ចង់ឱ្យប្រជាពលរដ្ឋញែកឱ្យដាច់រវាងផលិតផលក្នុងស្រុក និងផលិតផលនាំចូល បន្ទាប់ពីប្រជាពលរដ្ឋបង្ហាញជំហរពហិការកូកាកូឡា ក្រោយពីក្រុមហ៊ុនកូកា-កូឡា បានផ្ដាច់កុងត្រាជាមួយលោក វណ្ណដា តារាចម្រៀងរ៉េបកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកឧកញ៉ា សួរ វីរៈ បានបញ្ជាក់ថា ផលិតផលក្នុងស្រុក ជាផលិតផលដែលផលិតនៅក្នុងប្រទេសកម្ពុជា ដែលជួយផ្ដល់ការងារដល់ប្រជាពលរដ្ឋក្នុងប្រទេស និងបង់ពន្ធចូលរដ្ឋ ព្រមទាំងបង្កើនទំនុកចិត្តដល់វិនិយោគិនផ្សេងៗទៀត ដែលមកវិនិយោគនៅកម្ពុជា។

រាជរដ្ឋាភិបាលកម្ពុជាបានព្យាយាមទាក់ទាញវិនិយោគនៅលើពិភពលោក ដើម្បីឱ្យមកវិនិយោគ នៅក្នុងប្រទេសកម្ពុជា ខណៈអ្នកឧកញ៉ា សួរ វីរៈ ចង់ឱ្យបងប្អូនប្រជាពលរដ្ឋពិចារណាពីផលិតផលដែលផលិតក្នុស្រុក ទោះបីផលិតផលនោះ អ្នកវិនិយោគមកពីប្រទេសណាក៏ដោយ គឺជាផលិតផលដែលបានផលិតនៅក្នុងស្រុកយើង។

អ្នកឧកញ៉ា សួរ វីរៈ បន្ថែមថា៖ «ប្រទេសណាក៏ដូចគ្នាដែរ មិនប្រាកដថា ប្រទេសវៀតណាម ម៉ាឡេស៊ី ឬប្រទេសណាផ្សេងទេ គឺមិនមែនស្ថាបនិកគឺជាប្រជាជនក្នុងប្រទេសនោះទាំងស្រុងទេ»។

អ្នកឧកញ៉ា សួរ វីរៈ បានបន្តថា នៅពេលដែលយើងព្យាយាមពហិការ ឬជាតិនិយមពេក វាក្លាយជាជ្រុលនិយម ហើយអ្វីដែលជាផលប៉ះពាល់ ចង់ឱ្យបងប្អូនពិចារណាថា វានឹងប៉ះពាល់ទៅដល់សេដ្ឋកិច្ចកម្ពុជាទាំងមូល វាប៉ះពាល់ទៅដល់ការជឿជាក់របស់វិនិយោគិនផ្សេងៗ ដែលគាត់ចង់មកវិនិយោគនៅកម្ពុជា។

អ្នកឧកញ៉ា គាំទ្រការពហិការមិនប្រើផលិតផលរបស់ថៃ តែសូមញែកឱ្យដាច់ថា អ្វីដែលផលិតក្នុងស្រុក គឺជាផលិតផលក្នុងស្រុក ទោះបីគាត់ជាវិនិយោគមកពីប្រទេសណាក៏ដោយ ព្រោះលុយហ្នឹងគឺបានចូលភាគច្រើនទៅលើប្រជាពលរដ្ឋ និងរាជរដ្ឋាភិបាល។

ពាក់ព័ន្ធនឹងបញ្ហានេះ ក្រុមឧត្តមប្រឹក្សាផ្ទាល់ព្រះមហាក្សត្រ និងជាប្រធានព្រឹទ្ធសភាកម្ពុជា សម្ដេចតេជោ ហ៊ុន សែន អំពាវនាវដល់ប្រជាពលរដ្ឋរក្សាភាពស្ងប់ស្ងាត់ និងពិចារណាឱ្យបានដិតដល់ករណីដែលក្រុមហ៊ុនកូកាកូឡាផ្ដាច់កុងត្រាតារាចម្រៀងវណ្ណដា។ សម្ដេចតេជោថាសត្រូវកំពុងរុញឱ្យកម្ពុជាក្លាយជាសត្រូវជាមួយអាមេរិក។

សម្ដេចថា៖ «គេរុញយើងឲ្យធ្វើជាសត្រូវជាមួយអាមេរិកតែម្តងដែលរឿងនេះវាបង្កើតនូវបញ្ហាខាងការទូតសេដ្ឋកិច្ច ពាណិជ្ជកម្ម វិនិយោគរវាងកម្ពុជាជាមួយអាមេរិកតែម្តង។សូមកុំចូលអន្ទាក់របស់សត្រូវយើងឲ្យសោះ»។

សម្ដេចតេជោ ហ៊ុន សែន អំពាវនាវដល់ពលរដ្ឋរក្សាភាពស្ងប់ស្ងាត់ និងពិចារណាដោយសារតែការធ្វើពហិកាចំពោះក្រុមហ៊ុនកូកាកូឡា ដោយថាក្រុមហ៊ុននេះមានរោងចក្រនៅកម្ពុជាផ្ដល់ការងារដល់ពលរដ្ឋខ្មែររាប់ពាន់នាក់ និងបានបង់ពន្ធមកកម្ពុជាដែលជាការរួមចំណែកមួយដល់កំណើនសេដ្ឋកិច្ចកម្ពុជា ហើយបើក្រុមហ៊ុននេះដកខ្លួននោះកម្ពុជាគឺជាអ្នកខាតបង់ហើយសត្រូវគឺជាអ្នកទទួលផល

សម្ដេចបន្ថែមថា៖ «ខ្ញុំមិនជំទាស់ទេប្រសិនបើកូកានេះផលិតនៅថៃបងប្អូនអាចឈប់ប្រើ បានតែបើកូកានេះផលិតនៅកម្ពុជាបងប្អូនពហិការមិនប្រើកម្ពុជាគឺជាអ្នកខាតបង់ទាំងការងារទាំងប្រាក់ចំណូលដោយផ្ទាល់និងដោយប្រយោលរបស់ប្រជាជននិងចំណូលរដ្ឋ»៕

អត្ថបទ៖ ឡេង ដេត