ព្រះមហាក្សត្រយាងទៅពិនិត្យព្រះរាជសុខភាពនៅប្រទេសចិននៅព្រឹកថ្ងៃសៅរ៍នេះ

ព្រះមហាក្សត្រ សម្តេចព្រះបរមនាថ នរោត្តម សីហមុនី និងសម្តេចព្រះមហាក្សត្រី ព្រះវររាជមាតាជាតិខ្មែរ បានយាងចាកចេញពីកម្ពុជាហើយ នាព្រឹកថ្ងៃទី២៣ ខែសីហា ឆ្នាំ២០២៥ តាមព្រះទីនាំងយន្តហោះពិសេស  ដើម្បីទៅពិនិត្យព្រះរាជសុខភាពមួយរយៈ នៅឯទីក្រុងប៉េកាំង សាធារណរដ្ឋប្រជាមានិតចិន។

បើយោងតាមព្រះរាជសាររបស់ព្រះករុណាព្រះមហាក្សត្រជូនជនរួមជាតិ ចុះថ្ងៃទី២០ ខែសីហា ឆ្នាំ២០២៥ ព្រះអង្គបានគូសបញ្ជាក់ថាក្នុងអំឡុង​ពេល​ព្រះរាជអវត្តមានរបស់​ព្រះអង្គ សម្ដេច​តេជោ ហ៊ុន សែន ប្រធានព្រឹទ្ធសភានឹងជួយ​ព្រះអង្គ​ក្នុង​នាម​ជា​ប្រមុខ​រដ្ឋស្ដីទី។

ព្រះអង្គបាន​គូសបញ្ជាក់​ថា៖ «នៅក្នុងឱកាសអវត្តមានរបស់ទូលព្រះបង្គំ ខ្ញុំព្រះករុណា ខ្ញុំ ខាងលើនេះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នឹងទទួលជួយក្នុងព្រះបរមនាមទូលព្រះបង្គំ ខ្ញុំព្រះករុណា ខ្ញុំ ជាប្រមុខរដ្ឋស្តីទី នៃព្រះរាជាណាចក្រកម្ពុជា»។

នេះគឺជាព្រះរាជដំណើរយាងជាទៀតទាត់របស់ព្រះករុណា ព្រះមហាក្សត្រ និងសម្តេចព្រះមហាក្សត្រី រយៈពេលពីរងក្នុងមួយឆ្នាំ ទៅកាន់ទីក្រុងប៉េកាំង សាធារណរដ្ឋប្រជាមានិតចិន ដើម្បីពិនិត្យព្រះរាជសុខភាព តាមការយាងរបស់ក្រុមគ្រូពេទ្យជំនាញនៅប្រទេសចិន៕

អត្ថបទដោយ ហ៊ុន សិរីវឌ្ឍន៍