ព្រះមហាក្សត្រ និងហ្លួងម៉ែ នឹងត្រូវគង់នៅប៉េកាំងមួយរយៈបន្តទៀត ដោយសារមានបញ្ហាសុខភាព

ព្រះមហាក្សត្រនៃកម្ពុជា ព្រះករុណាព្រះបាទសម្ដេចព្រះបរមនាថ នរោត្ដម សីហមុនី និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ នឹងត្រូវបន្តគង់ប្រថាប់នៅទីក្រុងប៉េកាំងមួយរយៈទៀត។ ការបន្តគង់ប្រថាប់នេះ ត្រូវបានក្រសួងព្រះបរមរាជវាំង បញ្ជាក់ថា គឺដោយសារមានបញ្ហាសុខភាព ដែលក្រុមគ្រូពេទ្យតម្រូវឱ្យមានការតាមដានបន្ត។

ក្រសួងព្រះបរមរាជវាំង តាមរយៈសេចក្តីប្រកាសព័ត៌មាន នៅនៅថ្ងៃទី៣១ ខែមីនា ឆ្នាំ២០២៦នេះ បានឱ្យដឹងថា តាមការពិនិត្យដោយយកចិត្តទុកដាក់ ល្អិតល្អន់ជាទីបំផុតពីក្រុមគ្រូពេទ្យនៃមន្ទីរពេទ្យរដ្ឋធានីប៉េកាំង ក្នុងប្រទេសចិន គឺការពិនិត្យព្រះរាជសុខភាពថ្វាយព្រះករុណាព្រះមហាក្សត្រកម្ពុជា និងហ្លួងម៉ែ នៅពុំទាន់បានចប់សព្វគ្រប់នៅឡើយ ដោយនៅមានបញ្ហាសុខភាពមួយចំនួន។

តាមការបញ្ជាក់របស់ក្រសួងព្រះបរមរាជវាំង ក្រុមគ្រូពេទ្យចិនតម្រូវឱ្យព្រះអង្គទាំងទ្វេគង់ប្រថាប់បន្តមួយរយៈទៀត ដើម្បីត្រូវតាមដានពិនិត្យ និងព្យាបាលព្រះរាជសុខភាពជាបន្តទៀត ដែលពុំអាចយាងនិវត្តន៍មកកាន់មាតុប្រទេសនៅពេលនេះបានទេ។

ក្នុងលិខិតរបស់ក្រសួងព្រះបរមរាជវាំង ក៏បានបញ្ជាក់ពីការនឹករលឹកពីព្រះអង្គទាំងទ្វេដល់ប្រជានុរាស្ត្រកម្ពុជា ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ នាពេលខាងមុខនេះផងដែរ។

គួររំលឹកថា ព្រះករុណាព្រះមហាក្សត្រ និងហ្លួងម៉ែ បានចាកចេញពីប្រទេសកម្ពុជា កាលពីថ្ងៃទី២៧ ខែកុម្ភៈ ឆ្នាំ២០២៦ ដោយស្តេចយាងទៅកាន់រដ្ឋធានីប៉េកាំង ប្រទេសចិន ដើម្បីពិនិត្យព្រះរាជសុខភាព។ ក្នុងពេលព្រះករុណព្រះមហាក្សត្រ ស្ដេចយាងគង់ពិនិត្យ និងព្យាបាលព្រះរាជសុខភាពនៅមន្ទីរពេទ្យក្នុងប្រទេសចិន បានប្រគល់ភារកិច្ចដល់សម្តេចតេជោ ហ៊ុន សែន ប្រធានព្រឹទ្ធសភា ទទួលជួយក្នុងព្រះបរមនាម ជាប្រមុខរដ្ឋស្តីទីនៃកម្ពុជា៕

ដោយ៖ ធឿន វ៉ាន់សុង