ព័ត៌មានជាតិ

តំណាងអាម៉េរិកនៅភ្នំពេញថ្វាយព្រះពរព្រះមហាក្សត្រខ្មែរឆាប់បានជាសះស្បើយពីព្រះរោគ

បានផុស

២ សប្តាហ៍ មុន

នៅ

ថ្ងៃចន្ទ ១៣ មេសា ២០២៦

ដោយ

ស្ថានទូតសហរដ្ឋអាម៉េរិកប្រចាំនៅរាជធានីភ្នំពេញ បានចេញសារថ្វាយព្រះពរព្រះករុណាព្រះមហាក្សត្រកម្ពុជាឆាប់បានជាសះស្បើយពីព្រះរោគ ក្រោយមានការ បញ្ជាក់ពីក្រុមគ្រូពេទ្យចិន ថា ព្រះអង្គមានព្រះរោគមហារីកក្រពេញប្រូស្តាត។

ព្រះករុណាព្រះបាទសម្តេចព្រះបរមនាថ នរោត្តម សីហមុនី កាលពីថ្ងៃទី១០ ខែមេសា បានផ្ញើព្រះរាជសារជូនជនរួមជាតិបញ្ជាក់ពីស្ថានភាពព្រះរាជសុខភាពរបស់ព្រះអង្គ ដោយក្នុងព្រះរាជសារនោះ បានឱ្យដឹងថា ព្រះអង្គមានព្រះរោគមហារីកនៅក្រពេញប្រូស្ដាត។ តាមវេជ្ជបញ្ជារបស់ក្រុមគ្រូពេទ្យចិន គឺតម្រូវឱ្យព្រះអង្គបន្តគង់ប្រថាប់នមន្ទីរពេទ្យក្នុងរដ្ឋធានីប៉េកាំងមួយរយៈបន្ថែមទៀត ដើម្បីពិនិត្យព្យាបាលព្រះរោគនេះ។

ស្ថានទូតសហរដ្ឋអាម៉េរិក នៅថ្ងៃទី១៣ ខែមេសា ឆ្នាំ២០២៦នេះ បានបង្ហាញសារចូលរួមជាមួយប្រជាជនកម្ពុជា ក្នុងការគោរពប្រណិប័តន៍ និងថ្វាយព្រះពរព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា សូមព្រះអង្គឆាប់បានជាសះស្បើយពីព្រះរោគាពាធ។ «ការបួងសួងរបស់យើងមួយនេះ នឹងនៅស្ថិតស្ថេរជាមួយព្រះអង្គ ព្រះរាជវង្សានុវង្ស និងប្រជាជនកម្ពុជា»។ សំណេររបស់ស្ថានទូតអាម៉េរិក បន្ថែមយ៉ាងដូច្នេះតាមរយៈសារលើបណ្ដាញសង្គម។

គួរជម្រាបថា មិនត្រឹមតែស្ថានទូតអាម៉េរិកប៉ុណ្ណោះទេ តែក្រោយទទួលបានព័ត៌មានជុំវិញព្រះរាជសុខភាពព្រះមហាក្សត្រកម្ពុជា បណ្ដាស្ថានទូតបរទេសនានាប្រចាំនៅកម្ពុជា បានចេញសារជាបន្តបន្ទាប់ថ្វាយព្រះពរព្រះអង្គឱ្យឆាប់ជាសះស្បើយពីព្រះរោគឡើងវិញ។ ស្ថានទូតទាំងនោះ មានជាអាទិ៍ អូស្ត្រាលី តួកគី អឺរ៉ុប ជប៉ុន កាណាដា បារាំង អាល្លឺម៉ង់ ជាដើម។

ស្ថិតក្នុងពេលដែលកម្ពុជាប្រារព្វពិធីចូលឆ្នាំថ្មី ប្រពៃណីជាតិខ្មែរផងនោះ ស្ថានទូតបរទេសខាងលើក៏បានជូនពរដល់ប្រជាជាតិខ្មែរទាំងមូលជួបតែសេចក្តីសុខ សេចក្តីចម្រើន និងសុខភាពល្អបរិបូរណ៍ផងដែរ៕

ដោយ៖ ធឿន វ៉ាន់សុង