​ផ្ទុះកំហឹងពេញបណ្ដាញសង្គម ក្រោយទេសចរអេស្ប៉ាញចាក់​ស្រាបៀរចូល​ប្រម៉ោយដំរី​ក្នុង​ប្រទេស​កេនយ៉ា

ទេសចរជនជាតិអេស៉្បាញម្នាក់នៅក្នុងប្រទេសកេនយ៉ាបានបង្កឱ្យមានការខឹងសម្បារយ៉ាងខ្លាំងបន្ទាប់ពីបានបង្ហោះវីដេអូលើ Instagram បង្ហាញពីខ្លួនលោកកំពុងចាក់ស្រាបៀរចូលទៅក្នុងប្រម៉ោយដំរីដ៏ល្បីនៅកន្លែងអភិរក្សប្រភេទសត្វជិតផុតពូជ Ol Jogi Conservancy ក្នុងតំបន់ Laikipia County ប្រទេសកេនយ៉ា។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី២៩ខែសីហានេះ។

ទេសចរអេស៉្បាញខាងលើបានបង្ហោះឃ្លីបនៅលើ Instagram បង្ហាញពីសកម្មភាពលោកកាន់កំប៉ុងផឹកស្រាបៀរTusker ដែលជាស្រាបៀរក្នុងស្រុកដ៏ពេញនិយមមួយ ក្រោយមកលោកយកសាបៀរដែលនៅសល់ចាក់ចូលប្រម៉ោយដំរី។ ឃ្លីបនោះត្រូវបានលុបចេញពីគណនីរបស់លោក បន្ទាប់ពីមានប្រតិកម្មតបពីប្រជាជនកេនយ៉ា។

ក្រោយឃ្លីបនេះបែកធ្លាយបុគ្គលិក​អភិរក្ស​បាន​សម្ដែង​ការ​តក់ស្លុត​ដោយ​និយាយ​ថា​អាកប្បកិរិយា​បែប​នេះ​ត្រូវ​បាន​ហាមឃាត់​យ៉ាង​តឹងរ៉ឹង។ បុគ្គលិកម្នាក់បាននិយាយថា «រឿងនេះមិនគួរកើតឡើងទេ»។ ភ្នាក់ងារសត្វព្រៃ Kenya បានចាប់ផ្តើមការស៊ើបអង្កេត ខណៈពេលដែលជនជាតិកេនយ៉ាជាច្រើននាក់តាមអ៊ីនធឺណិតទាមទារឱ្យមានការនិរទេសអ្នកទេសចររូបនោះ។

លើសពីនេះបុរសទេចរនេះក៏បានថតពីការឱ្យចំណីសត្វរមាសនៅឯ Ol Pejita Conservancy ទោះបីជាច្បាប់របស់ឧទ្យានហាមឃាត់មិនឱ្យប៉ះពួកវាក៏ដោយ។ អ្នក​អភិរក្ស​បាន​រិះគន់​លោក​ដោយ​និយាយ​ថា​ទង្វើ​នេះ​ធ្វើ​ឱ្យ​មនុស្ស​និង​សត្វ​ប្រឈម​នឹង​ហានិភ័យ និង​ជា​គំរូ​ដ៏អាក្រក់​។

គួរបញ្ជាក់ថាឧប្បត្តិហេតុនេះកើតឡើងបន្ទាប់ពីមានភាពចម្រូងចម្រាសមួយទៀតនៅក្នុងសួនសត្វ Maasai Mara ដែលអ្នកទេសចរត្រូវបានបិទផ្លូវរបស់សត្វព្រៃ និងបង្ខំសត្វចូលទៅក្នុងទន្លេដែលពោរពេញទៅដោយក្រពើ។ ជាការឆ្លើយតប ក្រសួងទេសចរណ៍របស់ប្រទេសកេនយ៉ាបានសន្យាថានឹងដាក់ច្បាប់តឹងរ៉ឹងជាងមុន និងអប់រំទេសចរខ្លាំងជាងមុនដើម្បីការពារសត្វព្រៃ៕

អត្ថបទ៖ ប៊ុន សុភាព